Soydaşlarımız İrəvan şəhəri də daxil olmaqla Qərbi Azərbaycanın bürtün bölgələrində yaşayıblar və bu ərazilərdən zaman-zaman soyqırımı və kütləvi deportasiyaya məruz qalıblar. İndiki Ermənistan ərazisindən zorla qovulmuş azərbaycanlıların öz doğma yurdlarına qayıtması onların qanuni haqlarıdır.
Qarabağ uğrunda Vətən müharibəsində torpaqlarımızın işğaldan azad edilməsindən sonra bu məsələnin gündəmə gəlməsi qanunauyğundur. Qərbi azərbaycanlılar doğma dədə-baba yurdlarına qayıtmalıdırlar. Xatırladaq ki, Qarabağ ətrafında münaqişə başlanan zaman prosesin ilk qurbanları həmin dövrdə Ermənistan SSR-də yaşayan azərbaycanlılar olublar.
Qərbi Azərbaycanda yaşayan soydaşlarımızın sonuncu nəsli öz dədə-baba yurdlarından qısa müddətdə amansız şəkildə qovuldular. Bəzi yerlərdə qətliamlar baş verdi, dinc insanlar amansızlıqlarla üzləşdilər. İndi zaman və şərait köklü surətdə dəyişib, qaçqınların və məcburi köçkünlərin dədə-baba yurdlarına qayıdışı artıq vaxtı çatmış məsələdir və bu prosesin gündəmə gətirilməsi tamamilə qanunauyğun haldır. Lakin bu prosesi reallaşdırmaq üçün, ilk növbədə, soydaşlarımızın Qərbi Azərbaycanda, yəni indiki Ermənistan ərazisində təhlükəsizliyinin təmin olunmasını formalaşdırmaq lazımdır.
Tarixi faktlar da sübut edir ki, ermənilər davamlı olaraq azərbaycanlılara qarşı terror aktları, dəhşətli soyqırımları törədiblər. Bu faciələr beynəlxalq təşkilatlar tərəfindən hələ də hüquqi qiymətini almayıb. Ermənilərin vəhşiliyini, qəddarlığını bütün dünyaya nümayiş etdirən Xocalı, Ağdaban, Qaradağlı faciələrini, sərhədboyu ərazilərdəki digər amansız qətliamları xatırlatmaq istərdim.
Vaxtilə, bütövlüklə, Azərbaycan türklərinə məxsus olmuş İrəvan xanlığının torpaqlarında “erməni dövləti” yaradıldıqdan sonra azərbaycanlılar sıxışdırılmağa, təzyiqlərlə üzləşməyə başladılar. Son nəticə dünya ictimaiyyətinin gözü qarşısındadır. Azərbaycanlıların kütləvi deportasiyası, bu zaman məruz qaldıqları vəhşiliklər, qırğınlar beynəlxalq hüquq prinsiplərinə zidd olsa da, indiyədək sükutla qarşılanıb.
Qayıdışla bağlı indiki Ermənistan ərazisində yaşayacaq azərbaycanlıların təhlükəsizliyinin təmin olunması əsas məsələlərdən biridir. 1988-ci ildə azərbaycanlıların kompakt yaşadıqları, çoxluq təşkil etdikləri ərazilərdə mədəni muxtariyyətin təmin olunması zəruri vəzifədir. Yerli və inzibati idarəçilik məhz azərbaycanlılara məxsus olmalıdır. Söhbət Zəngəzurdan, Göyçəətrafı ərazilərdən gedir. İlkin qayıdış həmin ərazilərdə təmin edilməlidir.
Tarixə nəzər saldıqda bir daha aydın olur ki, ermənilər yüz illik tarix ərzində imzaladıqları sazişlərə, müqavilələrə heç vaxt əməl etməyiblər. Ermənistan tərəfi 44 günlük müharibədən sonra imza atdığı sənədləri də icra etməkdən boyun qaçırır. Məhz o səbəbdən ikitərəfli müqavilələrlə yanaşı, beynəlxalq səviyyədə qarantın olması da əsas şərtdir. Təəssüf ki, beynəlxalq təşkilatlar Ermənistanın hüquqazidd hərəkətlərinə, qətliamlarına, terror aktlarına və deportasiyalara hələ də qiymət verməyib.
Ermənilər münaqişəyə siyasi, diplomatik, hüquqi yanaşmada məğlub olduqda tarixilik prinsipinə əl atırlar. Artıq buna adət ediblər. Halbuki, ərazi iddialarında tarixilik deyil, real məskunlaşma prinsipi əsasdır. Tarixdən ermənilərin nəinki şifahi vədlərinə, hətta imzaladıqları saziş və müqavilələrə əməl etmədikləri yaxşı məlumdur.
1918-ci ilin iyununda imzalanmış Batum müqaviləsi ilə götürdükləri öhdəlikləri yerinə yetirmədilər, 1919-cu il noyabrın 23-də imzalanmış sazişə də əməl etmədilər. Zəngəzurda yenidən azərbaycanlılar məhv edildi, müsəlman kəndlərinə divan tutuldu. Sazişin bağlanması prosesində vasitəçilik etmiş ingilis rəsmi nümayəndələrinin, Britaniya Xarici İşlər Nazirliyinin çoxsaylı yazışmaları var. İngiltərənin ən yüksək çinli siyasi və hərbi xadimləri rəsmi məlumatlarında erməni dövlətinin götürdüyü öhdəliklərə əməl etmədiyini, saziş bağladığına baxmayaraq, müsəlman kəndlərinə hücum edib, müsəlmanları məhv etdiyini bildiriblər. Ona görə də hüququ yanaşma ilə yanaşı, tarixilik də diqqətdə saxlanılmalıdır. Bu sənəd və materiallar xarici səfirliklərə, diasporlara çatdırılmalıdır.
Sonda bildirək ki, Azərbaycan Xalq Cümhuriyyətinin yaradılması prosesində xarici qüvvələrin təzyiqi ilə İrəvan şəhəri şərti olaraq ermənilərə siyasi mərkəz kimi güzəşt edilib. Həmin vaxt Ararat respublikası iki qəzada yaradılmışdı ki, onlar da İrəvan azərbaycanlılarının ərazisi idi, amma bu barədə Azərbaycan Milli Şurasının protokolunda güzəşt kimi bəhs edilməyib. İrəvan şəhərinin güzəşt edilməsinə dair protokol bu gün İrəvanın azərbaycanlıların yurdu olduğunu təsdiq edən daha bir hüququ sənəddir. Bundan diplomatik, siyasi müstəvidə istifadə etmək lazımdır.
Həmin dövrdə “Azərbaycan” qəzetində dərc edilən teleqramda yazılmışdı ki, müsəlmanlar İrəvandan başlayaraq Şuşayadək məhv edilir. İndi isə azərbaycanlıların Şuşadan başlayaraq doğma yurdlarına, o cümlədən İrəvan ellərinə qayıtmalarının zamanı çatıb.
Firdovsiyyə ƏHMƏDOVA,
Dövlət İdarəçilik Akademiyası tarix kafedrasının müdiri, dosent, Əməkdar müəllim