Naxçıvan Dövlət Universitetinin tibb fakültəsinin həkim, rezident və tələbələrinin iştirakı ilə akademik Zərifə Əliyeva adına Kəngərli rayon Şahtaxtı kənd tam orta məktəbində görkəmli oftalmoloq-alimin anadan olmasının 100-cü ildönümünə həsr olunmuş görüş keçirilib.

Qonaqlar akademik Zərifə Əliyeva­nın adına məktəbin foyesindəki büstü­nün önünə gül dəstələri qoyub, bu kənd­də dünyaya göz açmış alimin həyat və fəaliyyətini əks etdirən muzeylə tanış olublar. Məktəbin konfrans salonunda müəllim və şagirdlərlə keçirilən görüş­də dünya şöhrətli akademikin həyat və fəaliyyətinə həsr olunmuş film nümayiş etdirilib. 

Naxçıvan Dövlət Universitetinin rek­toru, dosent Elbrus İsayev Prezident İlham Əliyevin “Akademik Zərifə Əliye­vanın 100 illik yubileyinin qeyd edilmə­si haqqında” 2022-ci il 3 noyabr tarixli sərəncamı ilə bağlı ölkəmizin elm və təh­sil müəssisələrində, səhiyyə sistemində görkəmli elm xadiminin yubileyinin geniş qeyd olunduğunu diqqətə çatdırıb. O bildirib ki, akademikin çoxcəhətli elmi-tibbi fəaliyyəti təkcə öz dövründə olduğu kimi, bu gün də nəzəri-təcrübi baxımdan önəmlidir və aktuallığını qoruyur. 

Şahtaxtı kənd tam orta məktəbini di­rektoru Ehtimad Məmmədov, universite­tin ümumi təbabət və klinik fənlər kafed­rasının müdiri, dosent Gültəkin Əliyeva, həmin kafedranın müəllimi, tibb üzrə fəlsəfə doktoru Nüsrət Həsənov akade­mik Zərifə xanım Əliyevanın zəngin və şərəfli ömür yolundan, dünya şöhrətli alimin Azərbaycan tibb elminin inkişa­fındakı xidmətlərindən və oftalmologiya sahəsində qazandığı nailiyyətlərdən da­nışıblar. 

Sonra tibb fakültəsi əməkdaşları­nın müəllifi olduqları 20-yə yaxın kitab, dərslik, dərs vəsaiti, monoqrafiya, 50-yə qədər buklet məktəbin kitabxanasına hə­diyyə edilib.

Səbuhi Həsənov,
“Xalq qəzeti”