Gecələr yaxşı yatmağın faydaları çoxumuza məlumdur. “Gözəllik yuxusu” ifadəsinin əbəs yerə olmadığı elmi şəkildə sübut edilmişdir. Mançester Universiteti tərəfindən aparılan araşdırmaya görə, bədənimizin təbii yuxu ehtiyacına cavab verdiyimiz zaman, kollagen ifrazı artır və eyni zamanda, əzələ bərpası baş verir. Bu, həm də daha gözəl bir görünüş əldə etməyimizə kömək edir.
Nəzərinizə çatdıraq ki, kollagen insan orqanizminin fəaliyyəti üçün çox mühüm rol oynayır. Sümüklərin, qığırdaqların, əzələlərin, vətər və bağların tərkibinə daxil olan kollagen məhz onların möhkəmliyini qoruyur. Başqa sözlə desək, kollagen bütün orqanlar üçün birləşdirici toxuma rolunu oynayan, xüsusi yapışdırıcı zülaldır.
Üz əzələlərinə dəstək verərək təbii toxumanı təmin edən kollagenin miqdarı 25 yaşdan başlayaraq tədricən azalmağa başlayır. Bu zaman dəridə quruluq və sallanmalar yaranır. Bu günə qədər kollagenin azalmasının səbəbləri arasında düzgün olmayan qidalanma, şəkərli qidaların həddindən artıq qəbulu, siqaret və çirkli hava şəraitinin olduğu məlumdur.
Kollagen bədənin birləşdirici toxumasının bütövlüyünü, elastikliyini və gücünü təmin edir. Orqanizmin yuxu saatı isə kollagenin istehsalında bərpaedici rol oynayır. Bu rolu dəstəkləmək üçün etməli olduğumuz tək şey yuxumuzu pozacaq səbəblərdən uzaq olmaq və orqanizmin ehtiyaclarına cavab verməkdir.
Araşdırmalar göstərir ki, yuxu, “mühərriki yağlamaq” kimi dəriyə qulluğu təmin edir. Sözügedən araşdırmaya görə, yuxu saatımıza diqqət etdiyimiz zaman orqanizm özünüqoruma və bərpa etmək qabiliyyətini nümayiş etdirə bilər.
Səadət RZAYEVA, “Xalq qəzeti”
