“Xalq qəzeti”nin bu ilin 1 mart nömrəsində “Futbol dedi-qodu sevmir” sərlövhəli geniş təhlili məqalə vermişdik. Yazmışdıq ki, Gəncə futbolunun şanlı tarixi var, gözəl ənənələri olub, Azərbaycanda bu şəhərin azarkeşləri xüsusi fəallığı ilə seçilir və sair. Lakin son vaxtlar klub ətrafında gedən söz-söhbət, bəzi süni əngəlliklər, sponsorun olmaması, texniki çətinliklər və digər amillər ən kütləvi idman növünün şəhərdə inkişafına mənfi təsir göstərir.

Məqalədən sonra oxucularımızdan xeyli məktub almışıq, Gəncədə futbolun daha da inkişafı üçün redaksiyamıza tək­liflər, minnətdarlıq məktubları daxil olub, digər tədbirlərin həyata keçirilməsinin va­cibliyi göstərilib.

Bu günlərdə şəhər icra hakimiy­yətinin, Futbolun İnkişaf Fondunun və “Kəpəz” Peşəkar Futbol Klubunun birgə təşkilatçılığı ilə “Kəpəz”ə dəstək” adlı təd­birin keçirilməsi də bir daha göstərir ki, Gəncənin rəhbərliyi də, bu işə maraqlı digər təşkilatlar da, ictimaiyyət də proble­min həllinə biganə deyil. 

…Gəncə Dövlət Filarmoniyasında ke­çirilən görüşdə şəhər icra hakimiyyətinin başçısı Niyazi Bayramov, Milli Məclisin deputatları, Futbolun İnkişaf Fondunun icraçı direktoru, “Kəpəz” PFK İdarə Heyə­tinin sədri, icra hakimiyyəti başçısı apa­ratının məsul əməkdaşları, idarə, müəs­sisə, təşkilat rəhbərləri, iş adamları və ictimaiyyət nümayəndələri iştirak ediblər.

Futbolun İnkişaf Fondunun icraçı di­rektoru Tural Piriyev və “Kəpəz” PFK İdarə Heyətinin sədri İlqar Nadiri təqdi­matlarla çıxış ediblər. Tural Piriyev fon­dun fəaliyyəti çərçivəsində “Kəpəz” ilə bağlı icra olunan “KAPAZ100K” layihəsi, ianə kampaniyaları, İlqar Nadiri isə klub­da həyata keçirilən layihələr ilə bağlı ət­raflı məlumat veriblər.

Niyazi Bayramov Gəncə futbolunun tarixindən bəhs edərək kluba dəstəyin ar­tırılmasının vacibliyini bildirib və bu işdə hamının səfərbər olmasını təklif edib. 

Şəhər rəhbərinin çağırışına millət və­killəri – Pərvin Kərimzadə, Naqif Həmzə­yev və Müşfiq Cəfərov da qoşulublar.

Futbol mütəxəssislərinin, şəhər gənc­lər və idman baş idarəsinin, ictimaiyyət nümayəndələrinin çıxışlarında koman­daya sponsorun tapılmasının əsas və­zifələrdən olduğu vurğulanıb.

Hamlet QASIMOV,
“Xalq qəzeti”nin bölgə müxbiri, 

Gəncə