Bakıdakı Milli Gimnastika Arenasında idman gimnastikası üzrə Dünya Kuboku yarışlarının final mərhələsinin ilk yarış günü bir-birindən maraqlı, gərgin anlarla yadda qalıb. 

Kişi gimnastların sərbəst hərəkətlər, paralel qollar, halqa­larda, qadınların isə dayaqlı tul­lanma və müxtəlif hündürlüklü qollar üzrə final yarışlarında mü­barizəsində ən yaxşılar müəy­yənləşib. Onların arasında əzm­karlığı, bütün mürəkkəb fəndləri böyük ustalıqla yerinə yetirməsi ilə fərqlənən Azərbaycan gimnas­tı Nikita Simonov halqalar üzrə hərəkətlərdə hakimlərdən 14,633 xal alaraq qızıl medala layiq gö­rülüb. Gimnastımızın doğma di­varlar arasında keçirilən belə bir nüfuzlu yarışda bayrağımızı yük­səltməsi yarışı izləyən yerli azar­keşlərə qürurlu anlar bəxş edib. 

İdmançımızın şərəfinə səslən­dirilən Azərbaycan himnini zalda əyləşən bütün azarkeşlər sona­dək uca səslə ifa ediblər.

Qələbə sevincini Azərbaycan Gimnastika Federasiyasının mət­buat xidməti ilə bölüşən Nikita Simonov yarışın Olimpiadaya ge­dən yolda ən vacib mərhələlərdən biri olduğunu deyib: “Hakimlərdən aldığım xal qənaətbəxşdir. Qızıl medal qazandığım üçün sevi­nirəm. Amma bununla kifayətlən­məməli, öz üzərimdə daha çox işləməliyəm. Dünya kubokunun təsnifat mərhələsində birinci ol­muşdum. Bu baxımdan bir qədər həyəcan var idi. Amma idmançı yüksək səviyyəli hazırlıq prose­si keçəndə həm də özünə inamlı olur. Qarşıda məni Avropa çem­pionatı gözləyir. Burada da yaxşı çıxış edərək, dünya çempionatın­da iştirak hüququ qazanmalıyam. Bir aydan sonra Misirdə lisenziya mərhələsi hesab olunan daha bir Dünya Kuboku yarışı olacaq. Olimpiadaya lisenziya qazanmaq üçün şansımı itirməməliyəm”. 

Halqalar üzrə hərəkətlərdə iranlı idmançı Mehdi Ahmad Ko­hani, avstriyalı Vinzenz Hoeck sonrakı pillələrdə qərarlaşıblar. 

Sərbəst hərəkətlərdə qazaxıs­tanlı Milad Kərimi uğurla çıxış edərək fəxri kürsünün ən yük­sək pilləsini tutub. Ukraynalı İlya Kovtun gümüş, ABŞ gimnası Ri­ley Lus bürünc medal qazanıblar. 

Filippinli gimnast Edriel Karlos Yulo paralel qollar üzrə yarışlarda birinci yeri tutub. Ukraynalı İlya Kovtun ikinci, fransalı idmançı Kameron-Li Bernard üçüncü yer­ləri qazanıblar. 

Qadınlar arasında müxtəlif hündürlüklü qollar üzrə yarışların yekununda çinli gimnast Qiyuan Qiun qələbə qazanıb. İtaliya təm­silçisi Giorgia Villa və niderlandlı Sanna Virman sonrakı pillələri tu­tublar. 

Zərif cinslərin mübarizəsində dayaqlı tullanma üzrə isə ən yük­sək nəticəyə K.Devillar nail olub. Özbəkistanlı Oksana Çusovitina gümüş, Çin təmsilçisi Linmin Yu bürünc medala layiq görülüblər. 

Yarışda ən yüksək icra xalı toplamış gimnastlar qadınlar ara­sında İndoneziya təmsilçisi Rifda İrfanalutfi və kişilərdə italiyalı Ni­kola Bartolini “AGF Trophy” kubo­ku ilə təltif olunublar.

Bu gün – Dünya Kuboku yarı­şının son günündə kişi gimnastlar dayaqlı tullanma, dəstəli at və tur­nik, qadın idmançılar isə sərbəst hərəkətlər və gimnastika tirində güclərini sınayacaqlar. 

Bugünkü yarışlarda millimi­zin üzvləri İvan Tixonov turnik, Nazənin Teymurova isə sərbəst hərəkətlər üzrə çıxışlarını təqdim edəcəklər. 

L.SABİRQIZI