Serbiyanın Vrnyaçka Banya şəhərində kişi şahmatçılar arasında keçirilən şəxsi Avropa çempionatında təmsilçilərimiz uğurla çıxış edirlər. Yüksək zəka sahibləri arasında bir-birindən maraqlı mübarizə yaşanır.
Çempionatın səkkizinci turunda liderliyi davam etdirən ukraynalı beynəlxalq dərəcəli qrossmeyster Anton Korobov macar şahmatçısı Bencamin Qledur ilə qarşılaşıb. Görüş sülhlə başa çatıb. Bu oyundan sonra Anton Korobov xallarının sayını 7-yə çatdırıb. Bencamin Qledur hazırda 6,5 xalla turnir cədvəlində ikinci pillədə qərarlaşıb. Çempionatda ilk üçlüyü isə FİDE bayrağı altında çıxış edən rusiyalı Aleksey Sarana tamamlayır. Onun da aktivində 6,5 xal var.
Azərbaycanlı qrossmeyster Nicat Abasov səkkizinci turda Moldova şahmatçısı Kiril Şevçenko ilə görüşüb. Qara fiqurlarla oynayan həmyerlimiz bu turda da sülhə imza atıb. Bu heç-heçədən sonra Nicat Abasov xallarının sayını 6-ya çatdırıb. Bununla da o turnir cədvəlində 11-ci pillədə qərarlaşıb.
Ötən tur erməni qrossmeysteri məğlub yola salan beynəlxalq idman ustası Əhməd Əhmədzadə isə səkkizinci turda slovakiyalı Yerqus Peçak ilə görüşüb. Bu dəfə isə həmyerlimiz qrossmeysterlə dueldə sülh bağlayıb. Qürurverici haldır ki, Ə.Əhmədzadə ardıcıl iki qarşılaşmada beynəlxalq dərəcəli qrossmeysterlərlə görüşdə inamlı mübarizə sərgiləyib. Hazırda onun hesabında 5 xal mövcuddur.
Digər təmsilçimiz Misrətdin İsgəndərov isə rumıniyalı qrossmeyster Vladislav Nevedniçi ilə qarşılaşıb. Görüş həmyerlimizin xeyrinə başa çatıb. Onun aktivində 5,5 xalı var.
Qadın təmsilçimiz Ülviyyə Fətəliyeva FİDE bayrağı altında çıxış edən Nikolay Averinlə qarşılaşıb və qalib gəlib. Bu qələbədən sonra Ü.Fətəliyeva 4,5 xal toplayıb. Turun digər oyununda təmsilçimiz Namiq Quliyev polşalı qrossmeyster Mateuş Bartel üzərində qələbəyə sevinib. Bu görüşdən sonra Namiq Quliyev 6 xal toplayıb. Abdulla Qədimbəyli isə Serbiya təmsilçisi Marina Qarjçini məğlub edib. O, 5,5 xal toplayıb.
Səkkizinci turda rumıniyalı şahmatçı Çinpu Samuel-Timoteylə qarşılaşan həmyerlimiz Aydın Süleymanlı qələbə qazanıb. Onun hesabında 5,5 xal var. Növbəti turda Süleymanlı erməni qrossmeyster Şant Sarksyanla qarşılaşacaq.
Vüqar Rəsulov isə serbiyalı Vuk Damjanoviçlə sülh bağlayıb. V.Rəsulovun aktivində 5 xalı var. Sabino Brunello ilə heç-heçə edən Vüqar Manafov da xallarının sayını 5-ə çatdırıb.
Qeyd edək ki, martın 14-də yekunlaşacaq çempionatda ən yaxşı nəticə göstərən 23 şahmatçı bu il yayda Bakıda keçiriləcək Dünya Kubokuna vəsiqə əldə edəcək.
E.ABBASOV,
“Xalq qəzeti”