Şimali Karolina Dövlət Universi-tetinin tədqiqatçıları nəqliyyatda tıxac səviyyəsini azaltmaq üçün işıqforlara dördüncü rəng – ağ rəngin əlavə edilməsini təklif ediblər.
Onların fikrincə, yol kəsişmələri üçün təklif edilən bu konsepsiya sürücülərə yolda nə baş verdiyini daha yaxşı anlamağa kömək edəcək, eyni zamanda, nəqliyyat axınına nəzarət etməyə, vaxta və yanacağa qənaət etməyə imkan verəcək. Xəbəri “sciencealert.com” saytı verib.
Belə ki, qırmızı işıq “dayan”, yaşıl işıq “get” demək olduğu kimi, ağ işıq da sürücülərə, sadəcə, qarşıdakı avtomobili izləmələrini söyləyəcək. Avtonom (yəni, ağıllı) maşınların sürücülərinin ağ işığa “baxmağa” ehtiyacı olmayacaq, çünki onlar “wifi” vasitəsilə işıqforla əlaqələndiriləcək.
Tıxac zamanı sürücü ağ işıq vasitəsi ilə önündəki avtomobilin istiqamətini izləmək üçün məlumatlandırılacaq: avtomobil dayanarsa dayansın, davam edərsə davam etsin. Yol kəsişmələrində nəqliyyat vasitələrinin sayı müəyyən həddən aşağı düşdükdə isə işıqforlar normal qırmızı, sarı və yaşıl seçimə qayıdacaq.
Konsepsiya kompüter modellərindən istifadə edilərək kiçik bir simulyasiya üzərində sınaqdan keçirilib. Nəticədə ağ işıq nəqliyyatın hərəkətini əhəmiyyətli miqdarda sürətləndirib, tıxaclar isə azalıb. Tədqiqatçılar yeni sistemin yaxın gələcəkdə tətbiqinin çətin olacağını etiraf etsələr də, pilot sınaqlara başlayacaqlarını bildiriblər.
Əfsanə ƏHƏDLİ, “Xalq qəzeti”