Çin Media Qrupuna daxil olan CGTN televiziya kanalı yeni beynəlxalq “Global South Voices” layihəsinə start verib. Layihə Qlobal Cənub ölkələrinin inkişafını, onları narahat edən mövzuları diqqətdə saxlayır.

CGTN layihənin tərəfdaşlarından olan AZƏRTAC-ın Orta Dəhliz haqqında geniş süjetini yayımlayıb. “Azərbaycan Orta Dəhliz ticarət marşrutunun tutumunu genişləndirir” adlı süjetdə Çin və Cənub-Şərqi Asiyanı Avropa ilə Qazaxıstan, Xəzər dənizi, Azərbaycan, Gürcüstan və Türkiyə vasitəsilə birləşdirən Trans-Xəzər Beynəlxalq Nəqliyyat Marşrutunun səmərəli, təhlükəsiz logistika xətti kimi fəaliyyətindən söz açılıb. Qeyd olunub ki, Rusiya-Ukrayna müharibəsinin başlayanadan sonra Avrasiyada yaranmış geosiyasi vəziyyəti fonunda Orta Dəhlizin rolu əhəmiyyəti dərəcədə yüksəlib.

Vurğulanıb ki, son illərdə Azərbaycan Orta Dəhlizin potensialını fəal şəkildə inkişaf etdirərək, infrastruktura böyük investisiyalar yatırıb və onu müasir, səmərəli, dayanıqlı nəqliyyat əlaqəsinə çevirib. Bu xüsusda Avrasiyanın nəqliyyat və logistika şəbəkəsində mühüm bir qovşaq rolunu oynayan Bakı Limanının imkanlarının genişləndirilməsi, Ələt Azad İqtisadi Zonasında yeni yük hava limanının inşası vurğulanıb, infrastrukturun davamlı modernləşdirilməsi, beynəlxalq tərəfdaşlıqların genişləndirilməsi və Azərbaycanın bağlantı imkanlarının yaxşılaşdırılmasının ölkənin uzunmüddətli iqtisadi strategiyasının əsas komponentləri olduğu bildirilib.

Süjetdə Azərbaycan ilə Çin arasında strateji tərəfdaşlıq əlaqələrinin qurulması haqqında Birgə Bəyannamənin, Çin-Avropa Dəmir Yolu Ekspresi üçün Azərbaycan və Çin hökumətlərinin imzaladığı Anlaşma Memorandumunun dəhlizin inkişafına əhəmiyyətli təsir göstərdiyi, ötən il Çindən Orta Dəhliz boyunca 350-dən çox blok qatarı göndərildiyi və onların orta tranzit müddətinin Azərbaycan limanlarına 10 gün, Gürcüstan limanlarına isə 12 gün təşkil etdiyi diqqətə çatdırılıb.

Qeyd olunub ki, Azərbaycan Zəngəzur dəhlizi layihəsini həyata keçirməklə Orta Dəhlizi daha da şaxələndirməyi hədəfləyir. Bu layihə regional əlaqəni gücləndirəcək, Orta Dəhlizin vacib bir hissəsi kimi nəqliyyat və logistika sektorunun inkişafı üçün böyük imkanlar yaradacaq.