Tarix heç nəyi unutmur, xalqların sevincini də, kədərini də yaddaşının dərin qatlarında qoruyur. Qəhrəmanları ilə qürurlanır, xəyanətləri isə susqun ittiham kimi üzə çıxarır. Bu baxımdan Azərbaycan tarixi də istisnasız olaraq qürur, ağrı dolu səhifələri ilə yüzillərin sınağından keçib. Şuşanın düşmənə təslim edilməsi, Kəlbəcərin müdafiəsiz qalması, bütün Qarabağın liderlik böhranı ucbatından işğal olunması, 1993-cü ilin sarsıntıları, müstəqilliyin itirilməsi təhlükəsi, taleyimiz sual altına düşməsi tariximizin acı dərsi kimi kitablara köçürüldü. Amma liderlər millətinin təslim olmasına imkan vermir, mənsub olduğu xalqı qoruyur, yüksəldir. Belə möcüzə sayılacaq fövqəladə nümunəni ötən əsrin sonlarında Ulu öndər Heydər Əliyev sərgiləmişdi. Heydər Əliyev Azərbaycanı qorumaqla kifayətlənmədi, eləcə də xalq adına görə bilmədiyi müqəddəs işləri həyata keçirmək üçün lider hazırladı. Böyük öndər çox gözəl bilirdi ki, onun sona çatıra bilmədiklərini yeni əsrin yeni lideri İlham Əliyev onun adına layiq bir qətiyyətlə tamamlayacaq və onun qurduğu təməlin üstündə gələcəkdə daha böyük işləri davam etdirəcək liderə ehtiyac var.
Böyük dövlətçilik məktəbi və siyasi iradə nümunəsi Azərbaycan üçün yeni dönəmin xəritəsini müəyyənləşdirdi. Prezident İlham Əliyev bu xətti davam etdirərək ölkəmizi həm qorudu, həm də gücləndirdi. Onun liderliyi milli ideyanın reallaşmasına və strateji düşüncənin praktik siyasətə çevrilməsinə şərait yaratdı. Azərbaycan yalnız mövqeyini qorumaqla kifayətlənmədi, həm də beynəlxalq aləmdə öz sözünü inamla dedi. Sonrakı proseslər bir daha onu sübut etdi ki, Ümummilli liderin uzaqgörən siyasəti təkcə tarixi qərar olmadı, xalqımızın gələcəyini müəyyən edən strateji baxışa çevrildi. İlham Əliyev isə həmin baxışı gerçək edərək dövlətimizi möhkəmləndirdi və xalqımızın inamını daha da yüksəltdi.
Prezident İlham Əliyev islahatçı lider kimi müasir və modern bir ölkə qurmağı bacardı. Yeni lider Ulu öndərin dövlətçilik ideyasına və azərbaycançılıq məfkurəsinə sadiq qalaraq seçkilərdə verdiyi vədi tam yerinə yetirdi və hər birimizin prezidenti oldu. Praqmatik düşüncə tərzi ilə Heydər Əliyevin sabitlik adasına çevirdiyi Azərbaycanı beynəlxalq problemlərin həll olunduğu məkana, iqtisadi mərkəzə, multikultural dəyərlərin ünvanına və ən möhtəşəm oyunların arenasına çevirməyə nail oldu, ölkənin qüdrətini təmin etdi. Vətəndaş inamını, etimadını və etibarını qazandı. Bütün bunlardan sonra Azərbaycan bu illər ərzində həm regionda, həm də qlobal miqyasda inkişaf nümunəsi kimi tanındı. Dövlət idarəçiliyində müasir texnologiyaların tətbiqi cəmiyyətin bütün sahələrində şəffaflığı və çevikliyi artırdı. Uğurlu beynəlxalq əməkdaşlıq siyasəti isə ölkənin siyasi, iqtisadi və humanitar platformalarda mövqeyini daha da möhkəmləndirdi.
Paralel olaraq ordu quruculuğu prosesinə diqqət artırıldı, ölkəmizin ən ağır dərdi olan Qarabağın işğaldan azad olunması dövlətin ali vəzifəsinə çevrildi. Sülh danışıqları prosesində milli maraqlarımızı ləyaqətlə müdafiə edən Prezidentin mövqeyi qəti idi: Qarabağ problemi yalnız Azərbaycanın ərazi bütövlüyü çərçivəsində həll olunmalı və bu yeganə yol hesab edilirdi.
Nəhayət, tarixi gün yetişdi. Xalqımız Prezident İlham Əliyevin siyasi qətiyyəti və hərbi qüdrəti sayəsində Qarabağı işğaldan azad etdi. Bu Qələbə birmənalı şəkildə xalqına güvənən İlham Əliyevin adı ilə bağlıdır. O, Ali Baş Komandan kimi döyüş meydanında, Prezident kimi isə diplomatiya müstəvisində işğalçı ölkəyə tarixinin ən ağır məğlubiyyətini yaşatdı və rüsvayçı təslimçilik aktı ilə düşməni Azərbaycanın ayağına gətirdi.
Bu cür Qələbəni tarixdə yalnız Atatürk öz xalqına bəxş etmişdi. General Duqlas Makarturun onun haqqında söylədiyi “Atatürk türk xalqına özünə inam və güvən hissini aşılayaraq millətin böyüklüyünü sübut etmişdir” fikri bunu aydın şəkildə ifadə edir. Bu tarixi uğuru Türk dünyasında milli ağrılarımızı və acılarımızı bizə unutduran Prezident İlham Əliyev müasir dövrdə təkrarladı və xalqa bağlılığın nümunəsini yaratdı.
Dünyanın birinci ölkəsinin birinci tribunasında ABŞ Prezidenti Donald Trampın Prezident İlham Əliyevə ünvanladığı “Siz böyük lidersiniz. Sizə daha bir hədiyyəm var. Bu, Ağ Evin rəmzi açarıdır. Mən bunu nadir hallarda təqdim edirəm” sözləri ölkəmizin başçısına verilən qlobal qiymət idi və bu heç də təsadüfi deyildi. Çünki İlham Əliyev etiraf olunduğu kimi qlobal liderdir və Azərbaycan onun siyasəti nəticəsində dünyanın seçilən və qəbul olunan ölkəsinə çevrilib.
Məhz bunların davamı olaraq yeniləşdirdiyi, bütövləşdirdiyi ölkəmizdə Prezident İlham Əliyev xalqımız üçün Azərbaycan qədər müqəddəs oldu. Tarixi bir daha sübut etdi ki, dahilər heç vaxt yanılmıllar və böyük Heydər Əliyev seçimi ilə yanılmamışdı! Azərbaycan xalqının bildiyi bu həqiqəti artıq bütün dünya etiraf edir.
Rəşad Mahmudov,
YAP İdarə Heyətinin üzvü,
Milli Məclisin deputatı
