Ya şvabeləri ayaqlarına bağlasınlar, ya da...

“Korrupsion Seele” (korrupsiya ruhu) ləqəbi ilə ta­nınan Almaniyanın Avropa Şurası Parlament Assamb­leyasındakı nümayəndə heyətinin rəhbəri, ermənipərəst Frank Şvabenin son günlərdəki “aktivliyi” fonunda bir məqamın vurğulanmasına ehtiyac var. 

Əvvəla ondan başlayaq ki, Prezident İlham Əliyevin İtaliyaya səfəri Avropada böyük rezonans doğurdu. “Köhnə qitə”nin medi­ası dövlətimizin başçısının çıxışlarına, görüşlərinə geniş yer verdi. Görünür, bu, xaricdəki bəzi dairələrin kürklərinə birə saldı. İkinci bir amil kimi bu ilin noyabrında Bakıda keçiriləcək BMT-nin İqlim Dəyişmələri üzrə Çərçivə Konvensiyasına Tərəf Dövlətlərin 29-cu Konfransı (COP29) üzərində dayanılmalıdır. Mötəbər tədbirlər öncəsi anti-Azərbaycan ritorikasının güclənməsinə də öyrəncəliyik. Vurğula­maq istədiyimiz məqam isə sırf Avropa Şurası müstəvisindədir. Daha doğrusu, AŞPA müstəvisində.

Məlumdur ki, bu il yanvarın 24-də Azərbaycanın AŞPA-dakı nümayəndə heyəti qurumda iştirakını qeyri-müəy­yən müddətə dayandırdığnı bildirib. Nü­mayəndə heyətimizin üzvləri həmin gün Strasburqda bəyanat yayaraq özlərinin eti­madnaməsinin qəbul edilməməsi ilə bağlı təşəbbüsün ölkəmizə qarşı aparılan qərəzli kampaniyanın bir hissəsi olduğunu vurğu­layıblar. 

Bəyanatda bildirilmişdi ki, Azərbaycan tarixi qələbəsindən və ərazi bütövlüyünün bərpasından sonra qarayaxma kampaniyası ilə üz-üzədir. Məqsəd ölkəmizi ləkələmək və xalqımıza qarşı inkar edilmiş ədalətin bərpası istiqamətindəki nailiyyətlərimizə kölgə salmaqdır və AŞPA-dan bunun üçün platforma kimi istifadə olunur: “Bəzi qərəzli qruplar AŞPA-nın əsas prinsiplərin­dən öz dar maraqları üçün sui-istifadə edir­lər. AŞPA-da siyasi korrupsiya, ayrı-seç­kilik, etnik və dini nifrət, ikili standartlar, təkəbbür, şovinizm üstünlük təşkil edən praktikaya çevrilib”.

Bəyanatda, eyni zamanda, bildirilmiş­di ki, Azərbaycanın AŞPA-dakı nümayən­də heyətinin bu qurumda səlahiyyətlərinə etiraz etmək təşəbbüsü ölkəmizdəki möv­cud seçki prosesinə müdaxilə cəhdi və demokratik təsisatları sarsıdan, qurumun nüfuzuna və qərəzsizliyinə ciddi zərbə ola­caq addımdır, habelə AŞPA-dakı dözülməz irqçilik, azərbaycanofobiya və islamofobi­yanın göstəricisidir. Buna görə də ölkəmiz onunla əməkdaşlığı və təşkilatda iştirakını qeyri-müəyyən müddətə dayandırıb.

Qeyd edək ki, azərbaycanlı deputatla­rın səlahiyyətlərinin məhdudlaşdırılması ilə bağlı təşəbbüsün müəllifi haqqında söz açdığımız F.Şvabe olub. Əlbəttə, alman deputatın gətirdiyi arqumentlər gülünc və absurddur. Tam aydındır ki, bu şəxs sifa­riş yerinə yetirir. Onun indi anti-Azərbay­can yönümlü fikirlər səsləndirməsi də, bir müddət əvvəlki oxşar mülahizələri də hə­min sifarişin nəticəsidir. Belə bir durumda sual yaranır: Avropa Şurası Azərbaycanla yollarını ayırmaq istəyir? Məgər qurumda anlamırlar ki, Şvabe kimi keçmişi və bu günü qaranlıq adamların ortaya salınması bütün körpülərin yandırılması deməkdir?

O da məlumdur ki, AŞPA-nın Azərbay­canın nümayəndə heyətinin etimadnamə­sinin qəbul edilməməsi ilə bağlı qərarı ölkəmizin assambleyadan bir il müddətinə kənarlaşdırılmasıdır. Qarşıda üç ay var. Belə görünür, Şvabenin ortaya atılması ilə bir illik müddətin artırılması üçün zə­min hazırlanır. Şübhə yoxdur ki, qarşıdakı aylarda alman deputat daha fərqli həya­sızlıqlara əl atacaq. Daha doğrusu, Qərbin anti-Azərbaycan fəaliyyətinin yeni təzahür formalarını nümayiş etdirəcək.

Ümumən, şvabelərin ortaya atılması­nın məqsədləri sırasında bir çox amillər dayanır. Otuz ilə yaxın müddətdə Azər­baycan torpaqlarının işğalına göz yummuş Avropa Şurası kollektiv Qərbin təmsilçisi kimi Ermənistanı qorumaq siyasətini həya­ta keçirir. Mövcud siyasət Cənubi Qafqaz­da sülhün yaranma imkanlarını aradan qaldırmağa hesablanıb. Ona görə də Azər­baycanın gözdən salınması prosesi gedir. Ölkəmizə qarşı total antipatiya mühiti for­malaşdırılır ki, ölkəmiz qeyri-adekvat sülh şərtləri ilə razılaşsın. Nəticə etibarilə Qər­bin erməni avantürizmi davamını tapsın. 

Ancaq məlumdur ki, Azərbaycan şva­belərin və onları kukla kimi oynadanların qarşısından geri çəkilməyəcək. Ölkəmiz daim öz prinsiplərinə sadiq qalacaq. Bunun alternativi yoxdur. Əgər Avropa Şurasında buna dəyər verən yoxdursa, Azərbayca­na da belə bir qurumda təmsilçilik lazım deyil. Yəni, düşünmək növbəsi AŞ-dəki rəhbər şəxslərindir. Ya şvabelərini dartıb ayaqlarına bağlasınlar, ölkəmizlə normal münasibət saxlasınlar, ya da təşkilatı tama­milə tərk edirik. Qarşıda çox yox, cəmi üç ayları var. 

Ə.RÜSTƏMOV
XQ