Makronun diktəsi bu qurumu nüfuzdan salır

Əslində, əvvəldən də elə bir nüfuzu yox idi. Bir neçə il qabaq Azərbaycan Prezidenti İlham Əliyev Bakıda bu qurumun təmsilçilərini intizamsız uşağı məzəmmət edirmiş kimi qınamışdı. Onlar özlərini, həqiqətən də, ipə-sapa yatmayan uşaq kimi apardılar və haqlı iradlardan nəticə çıxara bilmədilər. İndi iş o yerə çatıb ki, bu qurumun ermənipərəst təmsilçiləri başlarının üstündəki çətirin – Avropa İttifaqı rəhbərliyinin mövqelərini də tanımaq istəmirlər. Çünki ortalıqda maddi maraq var. Avropadakı erməni lobbisi bu deputatları necə şir­nikləndirirsə, heç bir ədəb-ərkan, mizan-tərəzi tanımaq istəmirlər. Qoy olsun! Bizim karvanımız onsuz da öz yolundadır... 

Söhbət ondan gedir ki, Avropa Par­lamentinin üzvləri bu il fevralın 28-də “Ümumi təhlükəsizlik və müdafiə siyasə­tinin həyata keçirilməsi” ilə bağlı qəbul et­diyi illik hesabatda yenə də Azərbaycana qarşı heç bir obyektivliyi, hüquqi əsas­ları olmayan qərəzli, birtərəfli ittihamlar irəli sürmüşlər. Bizim növbəti dəfə zibil qutusuna atacağımız həmin “sənəd”də nələr var? Brüsseldə yaşayan erməni iş adamı, brilliant qaçaqmalçılığı ilə məşğul olan Kaspar Karapetyanın arzu və istək­ləri. Vəssalam! Bir beynəlxalq təşkilat ki, kiminsə əlinə ( daha doğrusu, cibinə) baxaraq hesabat hazırlayırsa, onun nə dəyəri ola bilər? 

Mətbuat yazır ki, Kaspar Karapetyan da, Avropa Parlamenti də Fransa Pre­zidenti Emmanuel Makronun diktəsi ilə fəaliyyət göstərir. Bu, bir həqiqətdir ki, Makron prezident seçiləndən sonra Av­ropa Parlamenti Aİ-nin yox, məhz onun ssenariləri əsasında kimlərisə qaralayır, Ermənistanı isə mələyə döndərir. Halbu­ki, Avropada Ermənistanın mələk olma­dığını uşaq da bilir. Makron isə hamıya qarşı gedir. Təki, Azərbaycana qarşı böh­tan atılsın. Amma unudur ki, onun özü­nün də, Qərbin də monopoliyasının sonu çatmaqdadır. 

Yer gəlmişkən, Azərbaycan Prezi­denti İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyəti ilə gö­rüşərkən həm Fransanın, həm də Avropa Parlamentinin Azərbaycana qarşı qərəzli münasibətini konkret faktlarla ifşa etdi və dedi ki, bütün bunlar bizim haqq işi­mizə kölgə sala bilməyəcək: “Beynəlxalq hüququn normaları bizim tərəfimizdədir”, – deyən Prezident vurğuladı ki, ölkəmi­zin suverenliyini və ərazi bütövlüyünü təmin etməsi ilə bağlı bizi hər hansı gü­nahlandırma cəhdləri tamamilə əsassız və qərəzlidir. Azərbaycan öz ərazi bü­tövlüyünü və suverenliyini təmin etməklə bağlı digər ölkələrin atdığı addımlardan fərqli addımlar atmır. 

Azərbaycan Prezidenti xatırlatdı ki, bu gün ikili standartlar bir sıra beynəlxalq institutlar, o cümlədən Avropa İttifaqı üçün adi hala çevrilib. Bu baxımdan Co­zef Borrelin qeyri-adekvat bəyanatları bizi çox məyus edib. Əvvəla, onun bu bə­yanatları heç bir reallığı əks etdirmir və beynəlxalq hüququn normalarına ziddir: “Bütün bunlar Fransanın, guya, Azərbay­canın Ermənistana hücuma hazırlaşması ilə bağlı ölkəmizin demonizə edilməsinə əsaslanan anti-Azərbaycan siyasətinin bir hissəsidir”. 

Elə Azərbaycan Milli Məclisinin Av­ropa Parlamentinin “üç quruşluq hesa­batı”na münasibəti də əski qitənin ermə­nipərəst deputatlarına tutarlı cavab kimi qiymətləndirilə bilər: “Uzun illər ərzində Avropa strukturlarının, xüsusən də Av­ropa Parlamentinin Azərbaycan torpaq­larının Ermənistan tərəfindən 30 illik işğalının ağır nəticələrinə, törədilmiş van­dallıqlara, bir neçə gün əvvəl növbəti il­dönümü qeyd edilmiş Xocalı soyqırımına siyasi-hüquqi qiymət verməkdən ardıcıl surətdə imtina etməsi bu dairələrin selek­tiv və ikili standartlara əsaslanan yanaş­ması baxımından adi hala çevrilmişdi”.

Sonda onu da qeyd edək ki, Avropa Parlamentinin bu cəfəng hesabatının Cə­nubi Qafqaza sülh və sabitlik gətirilmə­sinə töhfə vermək istəyən Almaniya rəh­bərliyinin təşəbbüsü ilə Berlində keçirilən üçtərəfli danışıqlarla eyni vaxta düşməsi də təsadüfi deyil. Bu, Emmanuel Makro­nun iyrənc dirijor çubuğunun növbəti dəfə işə düşməsidir. Yəni Makron Fransası bi­zim regiona sülh gətirilməsini birmənalı olaraq, istəmir və əngəlləməyə çalışır. Yuxarıda qeyd etdiyimiz kimi, bizim haqq yolunda olan, ədalət və obyektivlik daşı­yan karvanımızı heç bir səs öz yolundan döndərə bilməyəcək. 

İttifaq MİRZƏBƏYLİ