“Azərbaycanım” beynəlxalq jurnalının baş redaktoru, Beynəlxalq Elmlər Akademiyasının müxbir üzvü Emil Nəsirli Türkiyə Prezidenti Rəcəb Tayyib Ərdoğanın və Türkiyə Xarici İşlər Nazirliyinin təşəbbüsü ilə martın 1-3-də keçirilən Antalya Diplomatiya Forumunda iştirak etmək üçün bu ölkəyə səfəri çərçivəsində xarici işlər naziri Hakan Fidanla görüşüb.
AZƏRTAC xəbər verir ki, görüşdə baş redaktor jurnalın Redaksiya Şurasının qərarı ilə xarici işlər naziri Hakan Fidanın “Azərbaycanım” beynəlxalq jurnalının Redaksiya Şurasının Fəxri üzvü seçildiyini və iki ölkənin xalqları arasında dostluq əlaqələrinin inkişafında xidmətlərinə görə “Azərbaycanın dostu” Qızıl Ordeni ilə təltif olunduğunu bildirib.
Sonra Emil Nəsirli Redaksiya Şurasının Fəxri üzvlük sertifikatını və “Azərbaycanın Dostu” Qızıl Ordenini xarici işlər naziri Hakan Fidana təqdim edib.
Baş redaktor dərin köklərə, ortaq maraq və dəyərlərə əsaslanan iki ölkə arasında çoxşaxəli və strateji müttəfiqlik münasibətlərinin inkişafı üçün birgə səylərin daha da möhkəmlənəcəyindən əmin olduğunu bildirib. O vurğulayıb ki, Azərbaycan-Türkiyə münasibətləri kifayət qədər çoxşaxəli və genişmiqyaslıdır. Bu münasibətlər qardaşlığa, dostluğa və strateji müttəfiqliyə əsaslanır.
“Əminliklə söyləmək olar ki, son zamanlar iki ölkənin müxtəlif sahələrdə birgə həyata keçirdikləri layihələr Azərbaycan ilə Türkiyə arasında münasibətləri daha yüksək səviyyəyə gətirib çıxaracaq.
Azərbaycan Türkiyə ilə olan birliyini nümayiş etdirməklə dostları qürurlandırır, düşmənlərə isə gözdağı verərək vahimələndirir. Ancaq hamı bilir ki, Azərbaycan-Türkiyə birliyi regional və beynəlxalq təhlükəsizliyin təminatçısıdır. Bu qardaşlıq və müttəfiqlik siyasi, iqtisadi, sosial, mədəni və başqa sahələrdə əməkdaşlığa üstünlük verir. Bakı və Ankara bu istiqamətdə fəaliyyət göstərmək istəyən xoş məramlılara qapılarını açıq saxlayır. Azərbaycan-Türkiyə birgə hərbi təlimləri bu xoş məramları bir daha təsdiqləyir”, - deyə baş redaktor qeyd edib.
Türkiyənin xarici işlər naziri Hakan Fidan öz növbəsində “Azərbaycanım” beynəlxalq jurnalının Redaksiya Şurasının Fəxri üzvü seçildiyinə və “Azərbaycanın Dostu” Qızıl Ordeninə layiq görüldüyünə görə jurnalın Redaksiya Şurasının üzvlərinə təşəkkürünü bildirib.
Hakan Fidan vurğulayıb ki, builki forumun əsas mövzusu “Təcavüz dövrlərində diplomatiyanın inkişafı” olacaq. “Bu mövzu dünyamızın keçdiyi təlatümlü dövrdən sülh yolu ilə çıxış yolu axtarmaq üçün hərtərəfli əks və vasitə kimi xidmət etmək məqsədi daşıyır. Davam edən müharibələr, terror aktları, qeyri-qanuni miqrasiya, ksenofobiyanın və islamofobiyanın artması, süni intellektin gözlənilməz riskləri, iqlim dəyişikliyi, təbii fəlakətlər, pandemiyalar və genişlənən sosial-iqtisadi boşluqlar qlobal problemlərin tam olmayan siyahısını təşkil edir. Qaydalara əsaslanan beynəlxalq nizamın aşınması və sonradan etibarın itirilməsi də dövlətlərin fəaliyyət göstərdiyi mühitin proqnozlaşdırılmasına xələl gətirən narahatedici tendensiyadır”, - deyə Hakan Fidan bildirib.
Qeyd edək ki, Antalya Diplomatiya Forumu dövlət və hökumət başçılarını, nazirləri, diplomatları, biznes liderlərini, alimləri, tədqiqatçıları, gənclər və media nümayəndələrini hərtərəfli debatlar üçün bir araya gətirir.
