UNESKO ekspert missiyasının bölgəyə gəlişinə kim etiraz edib? 

Keşişi də yalan danışır, diplomatı da. Rəsmisi də dünən dediyi sözü bu gün danır, siyasətçisi də. Onlar üçün yaşın da fərqi yoxdur. Otuz yaşlı nazir müavini səksən yaşlı Oskanyandan heç nə ilə fərqlənmir. 

Dünən Tehranda UNESCO-nun Qə­dim Sivilizasiyalar Forumuna üzv ölkələ­rin nazirlərinin 7-ci görüşü keçirilib. Bu mötəbər beynəlxalq toplantıda Ermənis­tan adından xarici işlər nazirinin müavi­ni Vaqe Gevorkyan iştirak və çıxış edib. Dünyanın müxtəlif nöqtələrində silahlı münaqişələrin mədəni və dini abidələrə dağıdıcı təsir göstərdiyini nəzərə çatdı­ran, qədim irsin qorunub saxlanılması üzrə etibarlı monitorinq mexanizmlərinin və qiymətləndirmənin tətbiqini, informa­siya mübadiləsini, rəqəmsal və peyk texnologiyasından faydalanmanı və mə­dəni vandalizmin qarşısının alınmasının vacibliyini önə çəkən V.Gevorkyan sonra sözünün “mustafasını” ərz edib: 

“Təəssüf ki, hazırda Dağlıq Qarabağ­dakı (?) erməni mədəni irsi daim dağıdıl­maya, təhqirə və mənimsənilməyə məruz qalır. 2023-cü ilin sentyabrında Azərbay­canın güc tətbiq etməsi Dağlıq Qarabağın (?) bütün yerli əhalisini etnik təmizləməyə məruz qoyub. Bu isə erməni mədəni irsini daha böyük təhlükə altına salıb”. 

Çıxışında daha sonra beynəlxalq ic­timaiyyəti təcili səylər göstərməyə çağı­ran V.Gevorkyan UNESCO-nun müstəqil ekspert missiyasının Dağlıq Qarabağda (?) yerləşdirilməsini dəstəklədiyi söylə­yib. Hayastan xarici diplomatiya idarə­sinin rəis müavini Azərbaycanın, guya, buna hər vasitə ilə mane olduğunu iddia edib. Bununla kifayətlənməyən Gevork­yan bir az da irəli gedərək, Ermənis­tanın UNESCO Forumunda və başqa çoxtərəfli platformalarda birgə təşəbbüs­lərin realizəsində yaxından iştiraka hazır olduğunu bəyan edib. 

Necə deyərlər, adımı sənə qoyum, səni də yana-yana. Tehranda özünü “doğma divarlar arasındakı kimi” hiss edən V.Gevorkyanın beynəlxalq tribuna­dan üfürdüyü ağ yalanların birincisi odur ki, Azərbaycan UNESCO-nun bölgəyə missiyasını göndərməyə nəinki mane olmayıb, əksinə, BMT-nin bu nüfuzlu beynəlxalq qurumunun müstəqil eks­pertlərini Qarabağa özü dəvət edib. Bu səfərin alınmamasının səbəbini həmin Gevorkyanın özündən soruşmaq gərəkir. Yaxşı axtarılsa, yəqin bu məsələdə də ABŞ-dakı erməni diasporunun barmağı görünəcək. Axı, Bakı bölgəyə gəlməyi arzulayan monitorinq qruplarına həm er­mənilərin, həm də azərbaycanlıların mə­dəni, dini, tarixi irsinin daşıyıcılarına baş çəkməyi təklif edir. Gevorkyanın ikinci yalanı isə saman altdan su yeritməyə ox­şayır. Nədənsə, bölgəyə təşrif buyuran bəzi “müstəqil ekspertlər” yalnız erməni “abidələrinə” baş çəkməyi arzuladıqları­nı bildirirlər. Belə hal bir neçə dəfə baş verib. 

Məgər UNESCO-nun ingilis, yaxud ispan mənşəli beynəlxalq monitorinqçisi Xankəndiyə, yaxud Ağdərəyə gedərkən, Ağdamdan keçə bilməzmi? Axı oraya ən yaxın yol da budur. Yoxsa, onlar burada erməni vandallarının Ağdam məscidinə tutduqları “divanı” görmək istəmirlər? Bəlkə Qarabağda dağıdılmaya, təhqirə, mənimsəməyə məruq qalan Azərbay­canın mədəni irsi UNESCO-nun məlum qorunma siyahısına düşməsi kimlərəsə sərf eləmir?

Əlqərəz, biz yenə də humanistlik göstərib, UNESCO-nun bölgəyə göndə­riləcək monitorinq qrupuna ekspert kimi hətta Vaqe Gevorkyanın da salınmasına etiraz etmirik. Amma bir şərtlə ki, qrupa bələdçiliyi azərbaycanlı, həm də qara­bağlı mütəxəssis eləsin. 

İ.HƏSƏNQALA
XQ