Politoloq Artur Xaçikyan hansı məqamları fərqləndirir?

Məlum olduğu kimi, müxtəlif xarici qüvvələr özlərinin, loru dildə desək, yağlı vədləri ilə Ermənistanı illüziya bataqlığına çəkməklə məşğuldurlar. Bu meyil ölkənin siyasi dairələrinə də yaxşı məlumdur. Elə baş nazir Nikol Paşinyanın tərəfdarlarına da. Sadəcə, ikincilərdən fərqli olaraq, birincilər bu barədə susmamağa, danışmağa üstünlük verirlər. Susmayıb da­nışanlardan biri də ABŞ-ın Stenford Universitetinin erməni əsilli siyasi elmlər doktoru, poli­toloq Artur Xaçikyandır. A.Xaçikyan özünün də bildirdiyi kimi, Ermənistanda bir qrup qrant yeyən təşviqatçının son bir neçə ildə yaydığı yalan vədlərin və nağılların siyahısını tərtib edib. Beləliklə, diqqət yetirək görək, amerikalı erməni professor nələri önə çəkib:

Birinci. A.Xaçikyan ABŞ Konqresi­nin Nümayəndələr Palatasının spikeri Nensi Pelosinin Ermənistana səfərindən bəhs edir. Yada salaq ki, səfər 2022-ci ilin sentyabrında baş tutmuşdu. Bir çox si­yasi ekspertlər Pelosinin İrəvana gəlişini ölkəyə dəstək kimi qiymətləndirmişdilər. Lakin ABŞ-dakı erməni lobbi və diaspor təşkilatlarının partonajlığı ilə gerçəkləş­miş dəstəyin heç bir faydası olmadı. Xa­çikyanı əsəbləşdirən də elə budur.

İkinci. Politoloq Fransa Prezidenti Emmanuel Makronun ermənilərə dəstək məqsədi daşıyan və erməni dilində yayım­lanmış açıqlamalarını və təsirli yazılarını xatırlayır. Ancaq Xaçikyan buna qarşılıq Makronun Ermənistana görə Azərbaycana heç bir sanksiyanın tətbiq edilməyəcəyini bildirməsinə diqqət çəkməkdədir. Qeyd edək ki, rəsmi İrəvanın, ümumən erməni ictimai rəyinin ən böyük xəyal qırıqlığı da elə bu olmuşdu. Xaçikyan bütün gəlişi­gözəl fikirlərinə rəğmən, Makronun “çətin günlərdə” Ermənistana səfər etməməsinə də diqqət çəkməkdədir. 

Üçüncü. Məlumdur ki, istər baş nazir Nikol Paşinyan, istərsə də ölkənin digər rəsmiləri müxtəlif beynəlxalq tribunalar­dakı çıxışlarında Ermənistanı Qafqaz­da, bir növ, demokratiyanın qalası kimi təsəvvürə gətirirlər. Onlar mövcud xüsus­da elə görüntü yaradırlar ki, guya, Azər­baycandan üstündürlər və bu üstünlük Bakı ilə mübarizədə dünyanın İrəvanı müdafiə edəcəyi ilə bağlı yüksək təminat­dır. Xaçikyanın fikrincə, belə düşüncələrin müqabilindəki xəyal qırıqlığı ondan ibarət oldu ki, Qərb Azərbaycanı özünün etibarlı tərəfdaşı elan etdi. 

Dördüncü. Ermənistan hakimiyyətinin təmsilçiləri bu fikirdə idilər ki, Beynəlxalq Ədalət Məhkəməsinin Laçın yolunun açıl­ması ilə bağlı qərarı və beynəlxalq ictima­iyyətin təzyiqləri onlara kömək edəcək. Bildirək ki, yol humanitar yüklər üçün açıq idi. Bölgəyə silah-sursat və hərbi texnika­nın keçirilməsinə gəlincə, Ermənistanın bununla əlaqədar istəyi təmin olunmadı ki, Xaçikyan məsələyə sırf bu aspektdən de­yil, erməni avantürizmi nöqteyi-nəzərdən yanaşır və qəzəbini bildirir. 

Beşinci. Ermənistanda belə düşünən­lər də var – əgər biz Rusiyanın müttəfiqi olmasaq və Kollektiv Təhülkəsizlik Müqa­viləsi Təşkilatından çıxsaq, Qərb ölkəyə kömək göstərəcək. Bu fikirlərin də sabun köpüyü mahiyyəti daşıdığını vurğulayan A.Xaçikyan bildirir ki, Fransa Ermənista­na yalnız simvolik yardımla kifayətlənir. Azərbaycan isə Rusiyanın rəsmi tərəfda­şıdır. Lakin ABŞ-dan hərbi yardım alır. 

Altıncı. İrəvanın siyasi dairələrində belə düşüncə formalaşmışdı ki, Qərb Uk­raynaya göstərdiyi köməyi Ermənistana da göstərəcək. A.Xaçikyan vurğulayır ki, Qərb Ukraynaya ciddi yardım etdi, 250 milyard dollar ayırdı və ən müasir silahlar verdi, amma indi ölkəni tərk edir, onu Ru­siya ilə baş-başa qoyur, artıq pulun bitdi­yini də deyir. Belə bir durumda Ermənis­tanın nə isə gözləməsi sadəlövhlükdür.

Yeddinci yalan Avropa İttifaqının Er­mənistandakı mülki müşahidə missiyası ilə bağlıdır. Məlum olduğu kimi, Azərbay­can-Ermənistan şərti sərhədinin Ermə­nistan tərəfində “lövbər salmış” missiya indiyədək heç bir faydalı iş görməyib. Ona görə də ölkədə avropalı müşahidə­çilərin varlığı əvvəllərdə olduğu kimi, təh­lükəsizliyin təminatı prizmasında dəyər­ləndirilmir. 

Səkkizinci. A.Xaçikyan Ermənistan hakimiyətinin Türkiyədə baş vermiş zəl­zələ zamanı bu ölkəyə yardım göndər­məsi məsələsinə toxunur. O bildirir ki, Pa­şinyan iqtidarına yaxın dairələr məsələni Ankara-İrəvan münasibətlərinin yaxşı­laşmasına töhfə kimi qiymətləndirirdilər. Lakin “Türkiyə yardımı qəbul etdi, sonra da Azərbaycanın erməniləri Qarabağdan qovmasını dəstəklədi”. 

Doqquzuncu. Ermənistanın hakimiy­yət nümayəndələri zamanda bildirirdilər ki, Qərb Azərbaycanın Qarabağa sahib­lənməsinə imkan tanımayacaq. Əlbəttə, Xaçikyan məsələni Qərbin Qarabağda etnik təmizləməyə imkan verməməsi şək­lində ifadə edir. O, mövcud xüsusda ABŞ Dövlət Deparatmentindən və Avropa Par­lamentindən eşidilən bəyanatları yada salır. Bildirir ki, Qərb hökumətləri Azər­baycanın Qarabağa sahiblənməsinin qarşısını ala bilmədilər, üstəlik Qarabağ ermənilərinin bölgədən çıxmasını etnik təmizləmə kimi qiymətləndirmədilər. 

Onuncu. A.Xaçikyan erməni rəsmiləri­nin daha bir yalanını da sanksiya məntiqi ilə izah edir. O yazır ki, Paşinyan admi­nistrasiyasına daxil olan şəxslər, eləcədə də hakimiyyət yönümlü siyasilər Qaraba­ğın ermənisizləşdirilməsinin Azərbaycana sanksiya tətbiqinə səbəb olacağını vurğu­layırdılar. Amma bu da baş vermədi. 

On birinci. Erməni əsilli amerikalı po­litoloq bildirir ki, Paşinyanın çevrəsi belə bir fikir yayırdı ki, qonşu ölkələrlə dinc ya­şamaq üçün Qarabağ Azərbaycana təh­fil verilməlidir. Onun sözlərinə görə, indi Qarabağ verilib, ancaq Azərbaycan ank­lavları da geri istəyir, üstəlik, Ermənistan ərazisindən keçərək, Naxçıvana asan yol tələb edir.

Ə.RÜSTƏMOV
XQ