Macarıstanın hakim Fides Partiyası ölkə paytaxtının küçələrində gələn ilin iyununda Avropa Parlamentinə seçkilərlə bağlı təbliğat kampaniyasının başlanması şərəfinə maraqlı reklam daşıyıcıları yerləşdirib. Baş nazir Viktor Orbanın lideri olduğu iqtidar partiyası Avropa Komissiyasının sədri Ursula von der Lyayenin ələ salındığı reklam lövhələri quraşdırıb. Avrokomissiyanın rəhbəri ilk dəfə seçki kampaniyası dövründə şəxsi hədəfə çevirib. Bu barədə məlumat yayan“Reuters” agentliyi reklam lövhələrində amerikalı maliyyəçi Corc Sorosun oğlu Aleks Sorosla yanaşı Lyayenin də portretinin nümayiş olunduğunu göstərib. Anti-reklam lövhələrində ölkə vətəndaşlarına xitabən “Gəlin onların mahnısına oynamayaq”, – şüarı yazılıb.
Qeyd edək ki, Belçikada anadan olmuş 65 yaşlı alman əsilli Ursula von der Lyayeni bundan daha yüksək vəzifəyə namizədliyi də nəzərdən keçirilib. ABŞ Prezidenti Co Bayden Yens Stoltenberqin səlahiyyət müddəti başa çatdıqdan sonra Avropa Komissiyasının sədri vəzifəsini icra edən Lyayenin NATO-nun gələcək Baş katibi olmasını istəyir. Bununla bağlı Avropa mediasında yayılan məlumatlarda deyilirdi ki, Bayden və Lyayen arasında son illər yaxın əlaqələr mövcuddur. Bu təmaslar, ilk övbədə, Çin, Ukrayna və iqlimlə bağlı sıx transatlantik mövzuları əhatə edir.
Avropa Komissiyasının sədri Ursula von der Lyayen daha əvvəl bəyan etmişdi ki, onun üçün NATO Baş katibliyinə potensial varislər siyahısında olmaq böyük şərəfdir. İntəhası, mövzu ilə bağlı jurnalistlərin sualına mətbuat xidmətindən belə cavab verilib: “O, nə indi, nə də gələcəkdə bu iş üçün hazır deyil”.
Məlumdur ki, Yens Stoltenberq NATO-nun Baş katibi vəzifəsini 2024-cü il oktyabrın 1-dək icra edəcək.
Yeri gəlmişkən, Avropa Komissiyasının rəhbəri Ursula von der Lyayen 2022-ci ilin yayında Bakıya səfəri zamanı qarşıdakı 5 il ərzində Aİ ölkələrinə Azərbaycandan qaz idxalını iki dəfə artırmaq barədə rəsmi Bakı ilə razılığa gəldiyini açıqlamışdı. Lyayenin fikrincə, bu razılaşma Rusiyadan qaz tədarükünün azaldılmasını kompensasiya etməlidir. Sənədi imzalamazdan bir qədər əvvəl, o, öz “X” səhifəsində “Aİ indi daha etibarlı enerji təchizatçılarına üz tutur” yazmışdı. Xanım Lyayen həmin paylaşımında Azərbaycanı enerji sahəsində “əsas və etibarlı tərəfdaş” adlandırmışdı.
İ.HƏSƏNQALA
XQ