Ermənilər Qarabağı “ağ ölüm” zonasına çevirmişdilər 

Ermənistan işğalçılıq, separatçılıq, terrorçuluqla yanaşı, həm də narkotik mad­dələrin becərilməsi və daşınması ilə məşğul olub. Ölkə mafioz qruplaşmalarla əlbir fəaliyyət göstərib. Azərbaycana qarşı ərazi iddiasında olduğu və Qarabağı 30 il ərzində işğal altında saxlayan separatçı-daşnak “çete”si soydaşlarımıza qarşı misli görünməmiş cinayətlər törətməklə yanaşı, eyni zamanda, ekoloji terrora əl atmaqdan çəkinməyib.

Qarabağımızın bütün yeraltı, yerüs­tü təbii sərvətlərini talan edən, içməli su hövzələrini zəhərli kimyəvi maddələr­lə çirkləndirən haylar, bu, azmış kimi, əkinə yararlı torpaqlarımızda narkotik plantasiyaları da salıblar. Otuz il davam edən işğal dövründə Qarabağda və Şərqi Zəngəzurda nəzarətdən kənarda qalmış torpaqlar sadəcə narkotikanın becərildiyi ərazi deyil, həm də narko-tranzit rolunu oynayıb. Qarabağdan keçən narkotik vasitələr ilk növbədə Avropaya, Uzaq Şərqə, Yaponiyaya qədər daşınıb. Separatçı-daşnak rejimi Qarabağda narkotik maddələrin satı­şından əldə etdiyi vəsaitdən silahlan­maq, mövqelərini möhkəmləndirmək və torpaqlarımızın işğal altında saxla­nılmasını uzatmaq siyasətini aparmaq, ələlxüsus da, terror aktlarını həyata ke­çirmək üçün istifadə edib. Elə bu amili nəzərə alaraq əminliklə deyə bilərik ki, Ermənistanın Azərbaycan torpaqlarını işğal altında saxlaması təkcə ölkəmiz üçün deyil, eyni zamanda, region üçün böyük təhlükə mənbəyi olub. 

Dünən yerli çap və elektron media­mız Daxili İşlər Nazirliyinə istinadla er­məni işğalından azad edilmiş Ağdamın Sırxavənd kəndində çətənə plantasi­yasının aşkarlandığı barədə məlumat yaydı. Məlumatda Sırxavənd kəndinin ərazisində 10 hektara yaxın kultivasiya üsulu ilə yetişdirilən çətənə plantasiya­sından söhbət gedirdi. Həmin ərazi son vaxtlara qədər Xankəndidəki separatçı xunta rejimi tərəfindən mühafizə olu­nurmuş. Narkomafiya burada gözətçi qülləsi də quraşdırıbmış. Hüquq-mü­hafizə orqanlarının əməkdaşları axta­rış zamanı ərazidən 4 ədəd avtomat silahı tapıblar. Qeyd edək ki, Sırxavənd kəndi Azərbaycan Ordusunun keçirdiyi lokal xarakterli antiterror tədbirləri nə­ticəsində erməni silahlı quldurlardan təmizlənib. 

“Qarabağda narkotikin becərilməsi ilə bağlı cinayət işləri açılıb”. Bu barədə jurnalistlərə açıqlamasında Daxili İşlər Nazirliyinin (DİN) sözçüsü Elşad Ha­cıyev bildirib. DİN rəsmisinin sözlərinə görə, Azərbaycan Ordusunun sentyab­rın 19-da keçirdiyi lokal antiterror təd­birlərindən sonra Qarabağın bütün əra­zisində müvafiq yoxlama-axtarış işləri həyata keçirilir: “Hələlik, ümumilikdə, 30 hektar sahədə narkotik plantasiyası aş­karlanıb. Plantasiyalardan biri Ağdam­da, ikisi isə Xocalıdadır. Bu istiqamətdə işlərimiz davam edir”. 

E.Hacıyev, həmçinin onu da söylə­yib ki, terrorçular Qarabağın işğalı döv­ründə narkotik vasitələrin əkin-biçini ilə fəal məşğul olublar: “Biz həmin dövrdə beynəlxalq ictimaiyyəti daim məlumat­landırırdıq. Ermənilər isə əməllərini danırdılar. Artıq onların bu əməlləri sü­but olunub. Separatçılar narkotik mad­dələri daha çox yaşayış yerlərinə yaxın ərazilərdə əkib-becərirdilər. Çünki bu əməllərindən həm də gəlir mənbəyi kimi istifadə edirdilər. İstisna deyil ki, yerli əhali də bu işlərə cəlb olunub”. 

DİN rəsmisinin sözlərinə görə, sö­zügedən əməllərlə bağlı artıq cinayət işləri açılıb: “Hazırda əraziyə mütəxəs­sislər cəlb olunub. İlkin hesablamalara görə, narkotik maddələrin istehsalına on milyonlarla dollar sərf olunub”. E.Hacıyevin sözlərinə görə, ərazi hələ də təhlükəlidir: “Ermənilər ərazini ciddi şəkildə minalayıblar. Xüsusi sürpriz mi­nalara da rast gəlinir”. 

* * * 

Bəli, Azərbaycanın işğal edilmiş ərazilərindən narkotikin həm daşın­ması, həm də əkib-becərilməsi üçün yararlanan, dünyaya “ağ ölümü” ixrac edən ermənilər utanmadan aşkar fakt­ları təkzib edir, ağ yalan danışırlar. Əs­lində, Ermənistanda dövlət məmurları­nın narkotika alveri ilə məşğul olması, yaxud həmin mafiyanı himayə etməsi heç kəsə sirr deyildi. Onların Azərbay­canın işğal altındakı torpaqlarında ge­niş narkotika plantasiyaları salmaları, bu yolla külli miqdarda qazanmaları da məlum idi. Hətta əldə edilmiş tək­zibolunmaz fakt və sübutlarla əlaqədar rəsmi Bakı BMT qarşısında məsələ də qaldırmışdı ki, qurumun ekspertləri Qa­rabağda araşdırma aparsınlar. Amma o zaman Ermənistan rəsmiləri buna imkan vermədilər. 

Hələ iki il bundan əvvəl Azərbaycan DİN-in operativ qrupu Kəlbəcər rayonu ərazisində ermənilər tərəfindən xüsusi qulluq göstərilməklə yetişdirilən nar­kotik tərkibli çətənə plantasiyası aşkar etmişdi. Ondan bir qədər əvvəl Füzuli rayonunun işğaldan azad edilən əra­zilərində narkotik bitkilərin əkildiyi plan­tasiya da aşkarlanmışdı. Beş gün əvvəl isə Daxili İşlər Nazirliyinin əməkdaşları tərəfindən Xocalıda 100 hektarlıq əra­zidə kultivasiya üsulu ilə əkilmiş çətənə plantasiyası üzə çıxarılıb.

“Wikileaks” saytı: “Nəzarətsiz qa­lan keçmiş Dağlıq Qarabağ ərazisində aparılan narkoticarətdə Ermənistan siyasi liderlərinin, keçmiş prezident Robert Köçəryanın da payı vardı. Hər il oradan daşınan narkotikdən əldə edilən gəlirin bir hissəsi məhz Robert Köçəryana çatırdı”

Oxuculara bir faktı xatırladaq ki, üç il bundan əvvəl erməni mətbuatı ilə yanaşı, bəzi Qərb nəşrləri maraqlı məlumat yaymışdılar. Həmin məlu­matda qeyd olunurdu ki, Ermənistanın keçmiş prezidenti Robert Köçəryanın narkotik alverində əli var. Hətta o da iddia olunurdu ki, Köçəryanın vaxtaşırı İrana səfər etməsinin başlıca məqsəd­lərindən biri də oradakı narkomafiya başçıları ilə görüşüb, ortaq işlərini ni­zama salmaq olub. Həmin dövrdə xa­rici media resurslarında işıq üzü görən məqalələrdə yazılırdı ki, həm siyasi, həm də iqtisadi baxımdan iflasa uğra­yan Hayastan hakimiyyəti ölkənin düş­düyü ağır vəziyyətdən çıxarmaq üçün narkoticarəti genişləndirərək, terror­çulara verdiyi dəstəkdən əldə edəcəyi pullara bel bağlayırdı. Bununla birbaşa Ermənistan rəhbərliyinin məşğul oldu­ğu, rəsmi İrəvanın narkoticarəti himayə etdiyi qeyd olunurdu. 

* * * 

Beş il bundan əvvəl britaniyalı araşdırmaçı-yazıçı Harold Keyn nəşr etdirdiyi “Narko Qarabağ” (“Narco Ka­rabakh”) kitabında Azərbaycanın Er­mənistan tərəfindən işğal olunmuş əra­zilərindəki qanunsuz fəaliyyəti təfərrütı ilə qələmə alıb. Olduqca maraqlı fakt­ların yer aldığı kitabda müəllif 18 aylıq çalışması zamanı “fəsadları Qafqaz regionundan çox-çox uzaqlara çıxaraq beynəlxalq birliyə dərin təsir göstərən cinayətlərin tam bir kataloqu”nu aşkar etdiyini yazır. Turist qismində Ermənis­tana və Qarabağa gələn H.Keyn səfə­ri zamanı insan alveri, narkotiklərin qanunsuz dövriyyəsi, qanunsuz silah alveri, təbii ehtiyatların sənaye miqyas­larında talanması halları ilə qarşılaşdı­ğını bildirir.

Harold Keynin “Narko Qarabağ” kitabından: “Hazırkı statusu üzündən Dağlıq Qarabağ sanki vakuumdadır. Bu hal isə amansız şəkildə istismar olunaraq həmin ərazini beynəlxalq mütəşəkkil kriminalın bir növ hesabla­ma palatasına çevrilməsinə şərait ya­radıb”.

İngilis müəllif kitabında erməni mafiyası, əfqan narkobaronları, bütün dünyada tanınan gizli silah qaçaqmal­çıları barədə məlumatlar göstərdiyi üçün şəxsi təhlükəsizliyi naminə adını dəyişdirməyə məcbur olub. Araşdır­maları zamanı İrəvanda qaldığı meh­manxanaya gecəyarısı polisin gəldiyini göstərən Keyn Xankəndidə hətta dö­yüldüyünü söyləyir: “Dağlıq Qarabağın kriminal mərkəzi olduğunu aşkar etdik. Özü də cinayətkar fəaliyyətin çoxu Er­mənistanın sabiq prezidentləri Robert Köçəryan və Serj Sarqsyanla bağlıdır. Onlar insanların əzab-əziyyəti üzərin­də özlərinə milyardlarla varidat topla­yıblar”.

Bunlar rəsmi İrəvanın narkotik qa­çaqmalçılığı ilə məşğul olmasını sübu­ta yetirən çoxsaylı faktların bir qismidir. Az öncə Almaniyada nəşr olunan “Bild” jurnalında getmiş maraqlı məlumatı da xatırlatmaq yerinə düşər. “Bild” Əfqa­nıstandan İrana, oradan da Avropa­ya uzanan böyük bir narkotik tranziti barədə dərc etdiyi məqaləsində işğal altında olan Azərbaycan torpaqlarını mərkəz olaraq göstərir. Həmin məlu­matda deyilir ki, Qarabağın işğal al­tında olması və nəzarətsiz ərazilərə çevrilməsi erməni narkobaronlara sərf edir. Məqalədə o da vurğulanır ki, Qa­rabağın nəzarətsiz qalmasında maraq­lı olan qüvvələr, əslində, bu münaqişə­nin həll edilməsini istəmirlər. Hətta bu məqsədlə böyük pullar xərcləməkdən də çəkinmədikləri istisna edilmir.

Beləliklə, İrəvanın dəstəklədiyi er­məni narkomafiyasının on illər boyu Rusiya və Avropanı “zəhərlədiyi” faktı göz qabağındadır. İndi bundan dünya birliyi də xəbər tutur. Deməli, Ermə­nistanı təkcə işğalçı kimi deyil, eyni zamanda, insanları “ağ ölüm”ə yolux­duran cinayətkar ölkə kimi də cəza­landırmaq lazımdır. Problemin birinci hissəsini Azərbaycan təkbaşına həll edib. Qalır İrəvanın ikinci cinayət əmə­linə görə beynəlxalq məsuliyyətə cəlb olunması. Hazırda Qarabağ ermənilə­rinin “haqlarının müdafiəsinə qalxan” həmin Beynəlxlaq Cinayət Məhkəməsi Ermənistanın bir dövlət olaraq bəşəriy­yətə qarşı törətdiyi cinayətini araşdırıb layiqli cəza tədbiri görməsi daha mən­tiqli olmazmı? 

İmran BƏDİRXANLI
XQ