Qlobal media korporasiyası öz nüfuzunu hərraca çıxarıb

Ermənistanın və dünya erməniliyinin təbliğat maşını var gücü ilə Azərbay­can əleyhinə işləyir. Təəssüf ki, özünü müstəqil, qərəzsiz, obyektiv adlandıran bir sıra transmilli media korporasiyaları da bu prosesə alət olublar. Xüsusilə mərkəzi ofisi Londonda yerləşən BBC korporasiyası və Praqadan yayımlanan “Azadlıq Radiosu” bu işdə xüsusi canfəşanlıq göstərir. Onların əksər hallarda qərəzli olduğunu bildiyimiz üçün yazdıqlarına, hazırladıqlarına, hardasa, reak­siya verməmək olardı. Ancaq məsələ ondadır ki, bu materiallar internetdə yayıl­dıqdan sonra arxivləşir. Sonra isə ermənipərəst dairələr üçün istinad mənbəyi rolunu oynayır.

BBC-yə istinad edərək, yalanlarını tirajlayan şəxslərdən biri də Ermənista­nın pul kisəsindən asılı olduğu heç kim­də şübhə doğurmayan NATO-nun sabiq baş katibi Anders Foq Rasmussendir. O, bugünlərdə “X” sosial şəbəkəsində “BBC Nyus” müxbirinin Ermənistanın Azər­baycanla sərhədyanı bölgəsində əyləşib Qarabağ iqtisadi rayonunda yaşayan ermənilərin vəziyyətinə dair hazırladığı yazıdan sitat paylaşıb. Halbuki, həmin yazı başdan-ayağa ermənilərin söylə­dikləri yalanlar əsasında hazırlanıb. Bu materiala baxanda adamda BBC-ni deyil, Ermənistan mediasını oxuduğu qənaəti yaranır. Yeri gəlmişkən, Azərbaycan tərə­finin fikirlərinə ötəri yer verən BBC daha çox ermənilərin vəziyyətindən bəhs edib. Reportajda ermənilərə təklif olunan Ağ­dam-Xankəndi yolundan söz açılmayıb. Bundan başqa, Laçın–Xankəndi yolun­dan Beynəlxalq Qırmızı Xaç Komitəsinin qaçaqmalçılıq etdiyi, Rusiya sülhməram­lılarının qanunsuz erməni silahlı dəstələ­rinə silah-sursat daşıdığı da qeyd edilmə­yib.

Məsələyə Azərbaycan Prezidentinin köməkçisi – Prezident Administrasiyası­nın Xarici siyasət məsələləri şöbəsinin müdiri Hikmət Hacıyev də münasibət bildirib. Hikmət Hacıyev NATO-nun keç­miş baş katibi Anders Foq Rasmussenin Ermənistan hökumətindən pul almasını ifşa edib, həmçinin BBC-ni qərəzli ol­maqda suçlayıb. “X” sosial şəbəkəsində etdiyi paylaşımda Hikmət Hacıyev yazıb: “Pullar danışır” seriyasından! Görün­düyü kimi, Avropanın ən dəhşətli, qanlı və cinayətkar separatçı qurumu olan qondarma “dqr”in “yubileyi” ərəfəsində Ermənistan hökumətinin və erməni lob­bi qruplarının göstərişi ilə yeni dramatik dezinformasiya və manipulyasiya kam­paniyasına start verilib. Biabırçılıq olsa da, NATO-nun sabiq baş katibi təbliğat kampaniyasına görə Ermənistan hö­kumətindən pul aldığını inkar etmir. Bəzi siyasətçilər riyakarlıqla dünyanı “yaxşı və pis separatçılar və cinayətkarlar”a bölür­lər. Köhnə vərdişlərdən imtina etmək çə­tin olur!

Amma narahatlıq doğuran odur ki, BBC öz Nizamnaməsində “bütün materi­allarında lazımi qərəzsizliyə nail olmağa sadiq olduğunu, bu öhdəliyin reputasiya­ları, dəyərləri və tamaşaçıların etimadı üçün əsas” olduğunu bildirsə də, birtərəf­li və qərəzli aqressiv manipulyasiya və yalan təbliği ilə məşğuldur. O cümlədən, “Kontekst” proqramında da yalanı təbliğ edir. BBC bütün səslər, xüsusən də həs­sas mövzular üçün platforma rolunu oy­namalıdır”.

Hikmət Hacıyev NATO-nun sabiq baş katibinin hansı mənbələrdən vəsait aldı­ğına dair bəyannaməni də paylaşımına əlavə edib.

***

Qeyd edək ki, bu, Anders Foq Ras­mussenin ermənilərin marağından çıxış edərək atdığı ilk adddım deyil. Rasmus­sen NATO-nun baş katibi vəzifəsindən getdiyi 2014-cü ildə “Rasmussen Global” adlı beynəlxalq siyasi konsaltinq şirkəti­ni təsis edib. Şirkətin mənzil-qərargahı Kopenhagendə yerləşir. Brüssel, Ber­lin, Vaşinqton və Londonda ofisləri var. Şirkət təhlükəsizlik siyasəti, Transatlantik əlaqələr, qlobal siyasət, Avropa İttifaqı, enerji, kritik xammal və kosmosla bağlı məsələlər üzrə strateji “məsləhətlər” ve­rir.

Hikmət Hacıyevin paylaşımına əlavə etdiyi bəyannamə ilə tanış olduqda da Rasmussenin qurucusu olduğu təşkila­tın dördüncü əsas müştərisinin Ermə­nistan Respublikası olduğunu görmək mümkündür. Bu ilin əvvəlində isə Avropa İttifaqının şəffaflıq reyestrinin saytında “Rasmussen Global” şirkətinə aid “Cari maliyyə ilində müştərilər” bölməsində isə Errmənistanın ikinci əsas müştəri olduğu qeyd olunmuşdur. Reyestrin əhatə etdi­yi fəaliyyətlərə görə illik gəlirin təxminən 425-799 min avro olduğu bildirilir. Ermə­nistan, artıq qeyd etdiyimiz kimi, təşkila­tın dördüncü əsas müştərisi olmaqla bu vəsaitin böyük hissəsinin formalaşması­na vəsilə olur. Bu mənada, İrəvanın əsas müştərilərindən biri olduğu təşkilatın qu­rucusunun Azərbaycanla bağlı belə həd­yan və böhtan yağdırması başadüşülən­dir.

Rasmussen bu ilin yazında Ermənis­tana səfər etmişdi. Oradan isə Azərbay­canla sərhədə gəlmiş, burada Ermənis­tan bayrağı fonunda fotolar çəkdirərək, sosial şəbəkədəki hesablarında yerləş­dirmişdi. Səfərlə bağlı təəssüratlardan ibarət yazıda isə növbəti dəfə Azərbay­canın ünvanına hədyanlar səsləndir­mişdi. Qeyd edək ki, həmin vaxt Laçın–Xankəndi yolunda ekofəalların aksiyası keçirilirdi. Rasmussenin yazısında həm aksiya, həm də Ermənistan–Azərbaycan münasibətləri ilə bağlı həqiqətə uyğun ol­mayan fikirlər yer almışdı. O, cızma-qa­rasında Qarabağ iqtisadi rayonunda “humanitar böhran” yaşandığını, bunun “humanitar fəlakət”ə çevrilə biləcəyini iddia etmişdi. Avropa və daha geniş bey­nəlxalq ictimaiyyəti “blokada”nın aradan qaldırılması üçün Azərbaycana təzyiq et­məyə çağırmışdı.

2022-ci ilin sentyabrda rəsmi İrəvanın törətdiyi hərbi təxribatı Azərbaycanın Er­mənistan ərazilərini ələ keçirməsi cəhdi adlandıran, öz qoşunlarını Ermənistan ərazisindən (?) çıxarmadığını bildirən sa­biq baş katib iki ölkə arasında yeni mü­haribəyə gətirib çıxara biləcək gərginliyin artdığını vurğulamışdı. Həmçinin Vətən müharibəsinin başa çatmasından sonra Xocavənd rayonu ərazisində kəşfiyyat-di­versiya əməllərinə görə saxlanılmış və barələrində məhkəmənin hökm çıxardığı erməni yaraqlılarını “hərbi əsirlər” kimi təqdim edərək, Azərbaycanı onları qay­tarmaqdan imtina etməkdə suçlamışdı.

Bunu xatırlatmaqda məqsədimiz Rasmussenin qərəzli və ermənilərdən maddi baxımdan asılı olduğunu göstər­məkdir. Bu mənada obyektivlik hissini itir­miş avropalı pensiyaçının Azərbaycanla bağlı böhtançı fikirləri təəssüf doğursa da təəccüblü deyil.

Yeganə HACIYEVA,
politoloq

– Ermənistan NATO-nun qarşıdur­ma şəraitində olduğu hərbi qurumun –Kollektiv Təhlükəsizlik Müqavilə­si Təşkilatının üzvüdür. Bu mənada NATO-nun sabiq baş katibinin, indi də təşkilatdan yüksək pensiya alan şəxsin alyansın rəqibi olan KTMT-yə üzv ölkənin hərbi imkanlarının geniş­ləndirilməsinə, beynəlxalq müstəvi­də mövqelərinin möhkəmlənməsinə çalışması, əslində, ilk növbədə onun NATO dəyərlərinə hörmətsizliyidir. Di­gər tərəfdən, Rasmussenin ermənilə­rin lobbiçiliyini apardığı “Rasmussen Global” şirkətinin əldə etdiyi bilgiləri, resursları bu gün NATO-nun ziddiyyət­də olduğu bir ölkə üçün xərcləyir. Bunu da maddi maraq müqabilində edir. Bu­rada da maraqların toqquşması qeydə alınır. Deməli, Rasmussen maddi ma­raq qarşılığında uzun illər xidmət etdiyi və bu gün də pensiya aldığı təsisata, yəni NATO-ya xəyanət edir. NATO-nun maraqlarını şəxsi korporativ maraqları­na qurban verir.

Digər tərəfdən nəzərə almaq la­zımdır ki, Azərbaycan Avropanın ener­ji təhlükəsizliyinin təmin olunmasına mühüm töhfə verir. Rusiya-Ukrayna müharibəsinin başlanmasından son­ra Avropanın Azərbaycanın enerji resurslarına tələbatı daha da artıb. NATO-nun sabiq baş katibinin mövqeyi həm də Avropanın maraqlarına ziddir.

BBC korporasiyası isə faktiki ola­raq, öz maraqları, erməni lobbisi ilə əməkdaşlıq naminə Qarabağdakı se­paratizmi dəstəkləyir. Onların bu ya­naşması son dərəcə təhlükəlidir və sadəcə, Azərbaycanla məhdudlaşmır. Bu yanaşma domino effekti verərək, ümumilikdə dünya nizamını sıradan çıxara bilər.

Səxavət HƏMİD, XQ