“Qardian” qəzeti yenə öz ampluasındadır. Azərbaycana qarşı hər zaman qarayaxma kampaniyası aparan bu mətbuat orqanı növbəti dəfə ermənilərin yalan dəyirmanına su tökməklə fərqlənib. Nəşrin Lyuk Hardinq adlı müxbiri “Bizim küçələrdə ölməyimizi istəyirlər”: Dağlıq Qarabağ blokadası daxilində” başlıqlı yazısında erməni yalanlarına yer verib, oxucularına obyektiv məlumat çatdırmayıb. Materialı oxuyarkən belə qənaətə gəlmək olur ki, müxbir həqiqəti yox, ermənilərə dəstək vermək üçün belə bir yazını qələmə alıb.
Müəllif ermənilərin iddia etdikləri “blokadanın reallıqlarını” hiss etdirmək üçün ucuz ədəbi fəndlərə əl atıb. Məsələn, yazının əvvəlində Hoviq Asmaryan adlı erməninin sözlərinə yer verib: “Biz kartofu qovururuq. Sonra da onları bişiririk. Bu, mənim və ailəm üçün sağlam həyat tərzidir. Tərəvəz yeyirik, gəzirik və velosiped sürürük. Amma bu zorladır”. Kartof yeyən “zavallı erməni”... Yemək olmayanda ucuz və doyumlu kartof yeyərlər, qıtlıq şəraitində onu əl-əl gəzərlər. Kartof həm də daha çox müharibələrdə insanları aclıqdan xilas edən qidadır. Qida rasionuna təkcə kartof daxildirsə, deməli vəziyyət kritikdir. İngilis müxbir də ermənilərin “ağır sosial-iqtisadi vəziyyətlərini” dramatikləşdirmək üçün beləcə rəngləri qaraltmağa çalışıb.
L.Hardinq oxucularda təəssüf hissi yatarmaq məqsədilə Xankəndidə natural təsərrüfat sisteminin “yarandığına” eyham vurur. Yazır ki, reportajın qəhrəmanının bağında meyvə ağacları var və H.Asmaryan meyvələrini qonşuya verib, onun əvəzində yerkökü alır. “Asmaryan Cənubi Qafqazda, Azərbaycanın anklavı olan Dağlıq Qarabağda yaşayır. Orada 120 minə yaxın etnik erməni yaşayır. Əsas ərzaq məhsulları, dərmanlar və yanacağın çatdırılması Ermənistanın paytaxtı İrəvandan dağlıq və mənzərəli Laçın dəhlizi ilə gətirilən yük maşınları ilə həyata keçirilirdi”. “Qardian” əziyyət çəkib araşdırmır ki, Qarabağda o qədər erməni yaşamır və separatçıların, eləcə də onlara züy tutanların tutuquşu kimi təkrarladıqları 120 min rəqəmindən yapışıb cümləsinə pərçimləyib. Axı qərəzə yol verməmək üçün qəzet Azərbaycanın da mövqeyini dərc etməliydi. Amma yox, qərəzdən rəngi saralan qəzet “blokada şəraitində acından günorta oyanan yazıq ermənilərin iztirablarına" yer verməyi daha məqsədəuyğun hesab edir.
Yalan və miflərin, eləcə də Azərbaycana nifrət ideyaların qoynunda böyüyən bir-iki erməninin fikrilərinə yer ayıran müəllif belə nəticəyə gəlib ki, “Dağlıq Qarabağ hazırda kəskin qıtlıq yaşayır. Yemək azdır. Beynəlxalq Qızıl Xaç Komitəsinin məlumatına görə, zəruri dərmanlar, gigiyena məhsulları və körpə yeməkləri də çatışmır. Supermarketlər boşdur. Yanacaq çatışmazlığı səbəbindən ictimai avtobusların fəaliyyəti dayanıb. Şəhərin pik saatı artıq mövcud deyil. Bir çox rayonlar su və işıqsız qalıb”. Burada yazmaya bilmirsən ki, “Qardian” sırtıqcasına yalan yazır. Sosial şəbəkələr “blokadadakı” ermənilərin aclıqdan əziyyət çəkmədiklərini təsdiqləyən foto-video- materiallarla doludur. Jurnalist qışqıran faktların yox, informasiyaya məkanında ayaq açıb gəzən erməni yalanlarının ətəyindən yapışır.
“Sakinlər deyirlər ki, Bakının planı bəllidir: onları acından təslim etmək, yol açılsa, oranı tərk etmək. Deyirlər ki, aclıq klassik silah kimi istifadə edilən asta hərəkətli soyqırımıdır. Azərbaycan hər hansı blokadanın olduğunu inkar edir və ekoloji pozuntulardan sonra hərəkətə keçməyə məcbur olduğunu deyir. Onun vəkilləri Ermənistanın iddialarını əsassız və qeyri-dəqiq hesab edirlər”. Bu sətirləri oxuyanda bir daha inanırsan ki, burada təkcə adi erməni təbliğatının təsiri yoxdur. Materialda həm də Azərbaycanı ləkəmək istəyi də hiss olunur. Səhifələrində belə yalanlara yer ayıran “Qardian” da digər Qərb KİV-i kimi, ermənilərin yalan ruporuna çevrilməklə yanaşı, doğrunun yox, yalanın tərəfində dayandığını təsdiqləyir.
Müəllif reportajında separatçıları geosiyasətin “qurbanları” kimi qələmə verməyə çalışıb. Erməni Hoviq Asmaryandan belə sitat gətirir: “Bizim qızılımız yoxdur. Neftimiz və qazımız da. Bizdə nə Qərbi, nə də Şərqi maraqlandıran nəsə var”. Yəni, bu “yazıq” insanları rahat buraxın, onlar, sadəcə, evlərində rahat yaşamaq istəyirlər. Doğrudur, Rusiya sülhməramlılarının müvəqqəti nəzarətində olan ərazilərdə neft-qaz yoxdur, amma uzun illərdir regionu zəhərləyən və ancaq 2020-ci il 8 noyabrda qəfəsə salınan erməni separatçılığı var. “Qardian” kimi qəzetlər də belə uydurma “aclıq və humanitar faciələri” qələmə almaqla boğulan erməni separatçılığına nəfəs verməyə çalışır. Amma əbəs yerə çalışırlar. Azərbaycanın səsi haqq səsidir, qalanları təfərrüatdır. Ermənilərə və havadarlarına postmüharibə dövrünün reallıqlarını qəbul etməkdən başqa yolları yoxdur.
S.ELAY, “Xalq qəzeti”