Azərbaycan Xarici İşlər Nazirliyi avqustun 14-də bəyanat yayıb. Bölgəmizdəki cari vəziyyətin aydın əks olunduğu bəyanatda bir məqam xüsusilə diqqəti cəlb edib. 

Bildirilib ki, son həftələrdə Azərbay­can ərazisində qanunsuz yerləşdirilən Ermənistan silahlı qüvvələri hərbi-mü­həndislik işlərini və digər hərbi qurucu­luq fəaliyyətini intensivləşdirib. XİN qeyd edib ki, bu fəaliyyət beynəlxalq hüququn, habelə rəsmi İrəvanın Azərbaycan, Ru­siya və Ermənistan liderlərinin 2020-ci il 10 noyabr tarixli üçtərəfli Bəyanatının 4-cü bəndində təsbit olunmuş öhdəliklə­rinin ciddi pozuntusudur.

Qeyd olunub ki, Azərbaycanın suve­ren ərazilərində qanunsuz yerləşdirilmiş radioelektron mübarizə vasitələrinin is­tifadəsi xüsusi narahatlıq doğurur. Son həftələrdə “Azərbaycan Hava Yolları”nın mülki təyyarələri ilə yanaşı, xarici ölkələ­rin təyyarələri də onların təhlükəsizliyi üçün ciddi təhlükə yaradan radioelektron müdaxilələrə məruz qalıb. XİN bildirib ki, Rusiya sülhməramlı kontingentinin mü­vəqqəti yerləşdiyi Azərbaycanın suve­ren ərazilərində hərbi quruculuq işləri və fəaliyyətin qeyri-qanuni şəkildə artı­rılması ilə paralel olaraq, son günlərdə Ermənistan tərəfindən delimitasiya olun­mamış dövlət sərhədi boyunca növbəti hərbi avantüra məqsədli irimiqyaslı si­lah, digər hərbi texnika və şəxsi heyətin toplanması da müşahidə olunub.

Nazirlik vurğulayıb ki, qeyd olunan bu məqamlar 30 ilə yaxın müddət ərzində – 2020-ci ilin sentyabrınadək Ermənis­tana xas olan danışıqların imitasiyasını, son dəqiqələrdə əvvəlki öhdəliklərdən yayınmaq və konkret qərarlar qəbul et­məkdən boyun qaçırmaq üçün prosesin hər mərhələsində siyasi, hərbi və digər təxribatlar törətməyi ehtiva edən təcrübə­ni xatırladır.

***

Azərbaycan XİN-in bəyanatının, necə deyərlər, mürəkkəbi qurumamış Ermə­nistanda yerləşən Avropa İttifaqının mis­siyasından cavab gəlib. Sözdə Avropa İttifaqının (Aİ) mülki müşahidə missiyası adlansa da, tərkibində çox sayda ehti­yatda olan alman və fransız zabitlərin cəmləşdiyi hərbiləşdirilmiş missiya “X” sosial şəbəkəsində bununla bağlı pay­laşım edib. Aİ missiyası gündəlik patrul xidməti nəticəsində, xüsusilə, Laçın yo­lunun girişində qoşunların yerdəyişməsi və cəmləşməsinin qeydə alınmadığını bəyan edərək, faktiki olaraq Azərbaycan­la sərhəddə qoşunların toplanması ilə bağlı Xarici İşlər Nazirliyinin bəyanatını təkzib edib. “Avropa İttifaqının missiyası Ermənistan–Azərbaycan sərhəd zonası boyunca patrul xidməti həyata keçirən 4 operativ baza vasitəsilə hərbi və təh­lükəsizlik vəziyyətini gündəlik izləyir. Yerlərdəki məlumatlara əsasən, biz, xü­susilə, Laçın yolunun yaxınlığında qey­ri-adi hərəkət və ya qoşun cəmləşməsi müşahidə etmirik. Biz patrul xidmətimizi davam etdiririk”, – deyə monitorinq mis­siyasının bəyanatında bildirilir.

Azərbaycan XİN-in Ermənistanın şərti sərhədə, xüsusilə də Laçın yolu istiqamə­tinə qoşun toplaması ilə bağlı bəyanatına Aİ missiyasının cavab verməsi ortaya bir sıra suallar çıxarır. Soruşan gərək, siz Ermənistanın xarici işlər, yoxsa müdafiə nazirliyisiniz? Sizə Azərbaycan XİN-in bəyanatını təkzib etmək səlahiyyətini kim verib? Məgər onlar bununla obyek­tivliklərinə xələl gətirdiklərinin fərqində deyillərmi? Onlar bununla faktiki surətdə Ermənistanın müvafiq qurumlarının funk­siyasını icra etmiş olurlar.

Ortaya digər qənaətlər də çıxır. Deyəsən, Aİ-nin missiyası bölgədə jan­darmeriya rolunu oynamaqda iddialıdır. Nədənsə, onlar missiyanın adında “mül­ki” sözünün olduğunu da unudurlar.

Məsələ ilə bağlı dünən Qərbi Azər­baycan İcması da bəyanat yayıb. Bəya­natda Aİ missiyasının Azərbaycan XİN-in bəyanatına reaksiya olaraq, tələm-tələ­sik, hətta, az qala, Ermənistan XİN-i qa­baqlayan açıqlama yaydığı vurğulanır. İcmadan bildirilib ki, 30 il ərzində Azər­baycan ərazilərinin işğalını, yüz minlərlə azərbaycanlının öz doğma yurdların­dan qovulmasını “görməyənlər” indi re­vanşist hisslərlə yaşayan Ermənistana kömək etmək üçün növbəyə düzülüblər və konkret olaraq, Aİ missiyası İrəvanın ruporuna çevrilib. Bəyanatda bildirilib: “Aİ missiyasının patrul apardığı, tez-tez binoklla Azərbaycan tərəfə baxdığı əra­zilərin əksəriyyəti deportasiyaya məruz qalmış Qərbi azərbaycanlıların vaxtilə yaşadıqları və zorla qovulduqları torpaq­lardır. Aİ-nin Qərbi Azərbaycan İcmasının müraciətlərinə əməli reaksiya verməməsi onun beynəlxalq hüquqa, bəşəri dəyər­lərə və prinsiplərə fərqli yanaşma nüma­yiş etdirdiyini göstərir”.

“Joxovurd” qəzeti isə Azərbaycanın, guya, yaxın günlərdə Qarabağda hərbi əməliyyata başlayacağını yazıb. Qeyd olunub ki, son günlər separatçı rejimə bağlı qanunsuz silahlı dəstələrin fəaliy­yəti ilə bağlı xəbərlərin gündəmə gəti­rilməsində məqsəd hərbi əməliyyatlara zəmin hazırlamaqdır. Qəzet bildirir ki, ümumiyyətlə, hazırda həm Ermənistanla sərhəddə, həm də Qarabağda gərginlik müşahidə edilir.

***

Aİ missiyası ilə bağlı dünən daha bir hadisə baş verib. Belə ki, Ermənistan müdafiə nazirliyi avqustun 15-də saat 12:20 radələrində Azərbaycan Silahlı Qüvvələrinin bölmələrinin Basarkeçər rayonunun Yuxarı Şorca kəndi (haylar bu qədim yurd yerimizi Vardenis rayonu­nun Verin Şorja sözü ilə özününküləşdi­rib-S.H.) istiqamətində patrul aparan Aİ müşahidəçilərini və onların avtomobilini, guya, odlu silahlardan atəşə tutduğunu bəyan edib. Qeyd olunub ki, ölən və ya­ralanan yoxdur.

Ancaq hayların müdafiə qurumunun bu yalanı elə Aİ-nin müşahidə missiyası tərəfindən təkzib edilib. “Aİ-nin müşahidə missiyasının heç bir patrulu atışma hədə­fi olmayıb. Biz Ermənistan-Azərbaycan sərhəd rayonlarında patrul xidməti həya­ta keçiririk və Brüsselə hərbi inkişaflar, o cümlədən məsuliyyət daşıdığımız ərazi­də atışma insidentləri barədə məlumat veririk”, – deyə Aİ-nin Ermənistandakı müşahidə missiyası “X” sosial şəbəkə­sində bildirib.

Müdrik atalarımız “yalan ayaq tutar, amma yeriməz” deyiblər. Ancaq bu dəfə hayların yalanı nəinki yerimədi, heç ayaq da tutmadı. Onların daha bir yalanı anın­daca faş oldu. Özü də elə onlara qucaq açan, hər mənada onları dəstəkləyən Aİ missiyası tərəfindən...

Səxavət HƏMİD, “Xalq qəzeti”