27 il BMT TŞ-nin qətnamələrini saya salmayan İrəvan indi hansı mənəvi haqla ona müraciət edir?
Ermənistan Azərbaycanın Qarabağ iqtisadi rayonunda yaşayan ermənilərin, guya, humanitar böhranla üzləşməsinə dair başlatdığı iftira və böhtan kampaniyasını getdikcə daha da genişləndirir. Belə ki, rəsmi İrəvan avqustun 11-də Qarabağın mülki əhalisinin “məcburi blokadaya alınması nəticəsində humanitar vəziyyətin pisləşməsi ilə bağlı” BMT Təhlükəsizlik Şurasına fövqəladə sessiyanın çağırılması xahişi ilə müraciət edib.
Ölkənin BMT-dəki daimi nümayəndəsi Mher Marqaryanın BMT Təhlükəsizlik Şurasının prezidentinə ünvanladığı məktub əvvəldən axıradək yalan-palanla doludur. O qeyd edib ki, bütün humanitar yardımların dayandırılması, məhdud daxili təminatın tədricən istifadəsi kəskin ərzaq qıtlığına və mağazaların bağlanmasına səbəb olub. Daimi nümayəndə saxta rəqəmlər uyduraraq, guya, 2 minə yaxın hamilə qadının, 30 minə yaxın uşağın, 20 min yaşlı və 9 min əlilin əsas qida və vitamin çatışmazlığı səbəbindən yaşamaq üçün mübarizə apardığını bildirib. Başqa bir sıra yalan rəqəmlər uyduran Marqaryan qeyd edib ki, bunun nəticəsində bu gün “Qarabağ xalqı humanitar fəlakətin astanasındadır”.
Bildirib ki, hazırkı şəraitdə Ermənistan hökuməti qlobal təhlükəsizliyin təmin edilməsi və kütləvi cinayətlərin, o cümlədən müharibə cinayətləri, etnik təmizləmə, insanlıq əleyhinə cinayətlər və soyqırımların qarşısının alınması üzrə əsas orqan kimi BMT Təhlükəsizlik Şurasının müdaxiləsini və fövqəladə sessiyasının çağırılmasını xahiş edir.
Qeyd edək ki, BMT Təhlükəsizlik Şurası BMT-nin daimi fəaliyyət göstərən ali orqanıdır. BMT-nin Nizamnaməsinə görə, təşkilat beynəlxalq sülhün və təhlükəsizliyin qorunmasında əsas məsuliyyət daşıyır. Şuranın 15 üzvü var. Onlardan 5-i (Çin, Fransa, Rusiya, Böyük Britaniya və ABŞ) daimi, 10-u isə 2 il müddətinə seçilən qeyri-daimi üzvlərdir. Şuranın hər üzvü bir səsə malikdir. Prosedur məsələlərinə dair qərarlar şuranın 9 üzvü səs verdikdə qəbul olunmuş sayılır. Yeri gəlmişkən, qeyd edək ki, 2011-ci il oktyabrın 24-də Azərbaycan Respublikası ilk dəfə BMT Təhlükəsizlik Şurasının qeyri-daimi üzvü seçilib.
Ermənistanın BMT Təhlükəsizlik Şurasına müraciət etdiyini eşidəndə insanın ağlına ilk olaraq qurumun Azərbaycan torpaqlarının işğalı ilə bağlı 1993-cü ildə qəbul etdiyi 822, 853, 874 və 884 saylı 4 qətnamə gəlir.
822 saylı qətnamə Kəlbəcərin işğalından sonra – aprelin 30-da qəbul edilib. Qətnamə bölgədə hərbi əməliyyatlara son qoymağı, erməni qoşunlarının Kəlbəcərdən və son dövrlərdə işğal etdiyi Azərbaycan torpaqlarından geri çəkilməsini tələb edirdi. 853 saylı qətnamə Ağdamın işğalından sonra – iyulun 29-da qəbul olunub. Bu qətnamə də bölgədəki hərbi əməliyyatları dayandırmağı, erməni qoşunlarının Ağdamdan və son dövrlərdə işğal etdiyi Azərbaycan torpaqlarından geri çəkilməsini, həmçinin 822 saylı qətnaməyə əməl edilməsini tələb edirdi.
Oktyabrın 14-də qəbul olunan 874 saylı qətnamə erməni qoşunlarının Füzuli, Cəbrayıl, Qubadlı və digər ərazlərdən geri çəkilməsini özündə ehtiva edirdi. Nəhayət, noyabrın 12-də qəbul olunan 884 saylı qətnamədə tərəflər arasında yenidən hərbi əməliyyatların bərpası ilə nəticələnən atəşkəs pozuntuları qınanılır, Ermənistan Respublikasından ermənilərin Qarabağdakı qondarma respublikası üzərindəki bütün təsir vasitələrindən istifadə etməsi istənilirdi. Qətnamədə hərbi əməliyyatların dərhal dayandırılması, son dövrdə işğal edilmiş Zəngilan rayonu da daxil olmaqla, digər rayonlardan erməni silahlı dəstələrinin çıxması tələb edilirdi.
Ermənilərin yalançı iddialarından fərqli olaraq bu qətnamələr yaxın tarixin bir hissəsi, BMT-nin ali orqanının məcburi hüququ öhdəlik daşıyan sənədləridir. Rəsmi İrəvan 27 il ərzində onların birini də icra etmədi. Nəhayət, Azərbaycan özü məcbur qalaraq onların icrası üçün hərəkətə keçdi. 2020-ci il sentyabrın 27-də başlayan Vətən müharibəsi 44 gündən sonra Ermənistanın təslimolma sənədini imzalaması ilə yekunlaşdı. Bununla da Azərbaycan BMT Təhlükəsizlik Şurasının qətnamələrini təkbaşına icra edən ilk ölkə kimi adını dünya tarixinə yazdırdı.
İndi beynəlxalq sülhün və təhlükəsizliyin qorunmasında əsas məsuliyyət daşıyan orqanın qətnamələri heçə sayan, onları kağız parçası hesab edən Ermənistan hansı mənəvi haqla bu ali quruma müraciət edir? Onlar BMT-nin “qapısını döyməyə” belə utanıb xəcalət çəkməlidirlər. Amma biz hayların xislətinə yaxşı bələdik. Bilirik ki, onlar belə insanı keyfiyyətlərdən çox-çox uzaqdırlar. Müdrik atalarımızın dediyi “utanmasan oynamağa nə var ki…” sözləri sanki bu toplumun boynuna biçilib.
Yeri gəlmişkən, Ermənistanın BMT Təhlükəsizlik Şurasının sədrinə 2022-ci il 13 sentyabr tarixli məktubu və Təhlükəsizlik Şurasının həmin ilin dekabrın 20-də çağırılan iclası qarşı tərəfin tam iflası ilə nəticələnib. Görünür, haylar yeni iflas üçün darıxıblar.
Aydın QULİYEV,
politoloq
– Ermənistanın Qarabağ ətrafında və Laçın yolunda yaranmış vəziyyətlə bağlı BMT Təhlükəsizlik Şurasının fövqəladə sessiyasının çağırılması xahişi ilə müraciəti növbəti həyasızlığın, bölgədə sülh və sabitliyin əldə olunması istiqamətində aparılan işə sayğısız münasibətin təzahürüdür. İrəvanın müraciəti BMT Təhlükəsizlik Şurasının düz 30 il bundan öncə – 1993-cü ildə qəbul etdiyi 4 qətnaməyə, heç olmasa, zərrə qədər sayğı göstərdiyi təqdirdə əsaslı, haqlı görünə bilərdi. BMT-nin rəhbərliyində olanlar, onun tarixini bilənlər çox yaxşı anlayırlar ki, Ermənistanın müstəqil dövlətçilik tarixinin bir istiqaməti BMT TŞ-nin qətnamələrinə və bütün beynəlxalq hüquq normalarına hörmətsizlikdən başqa bir şey olmayıb. Əgər belə olmasaydı, onlar BMT Təhlükəsizlik Şurasının məcburi gücə malik qətnamələrinin yerinə yetirilməsinə çalışar və bölgəmizi 2020-ci ildə müharibə ilə üz-üzə qoymazdılar. Buna görə də BMT Təhlükəsizlik Şurasının rəhbərliyi ilk növbədə Ermənistan rəhbərliyinin bu müraciətinin arxasında dayanan ikiüzlü siyasətə diqqət yetirməlidir.
Digər tərəfdən, biz burada qurulmuş oyunun tərkib hissələrini görürük. Çünki Qarabağda yaranmış vəziyyətin, guya, “humanitar böhran” olduğu, “soyqırımı” ərəfəsində olması ilə bağlı ermənilər çoxdandır nağıllar uydurur, bütün dünyanın diqqətini olmayan bir şeyə cəlb etməyə çalışırlar. Vətən müharibəsində sarsıdıcı məğlubiyyətə düçar olan haylar Qarabağ iqtisadi rayonunda Azərbaycanın tam suverenliyinin bərqərar olması ərəfəsində prosesi dayandırmaq üçün belə çirkin üsullara əl atırlar.
Bir neçə gün öncə separatçı rejimin “qlavarı” Arayik Arutyunyan beynəlxalq ictimaiyyətə müraciət ünvanlamışdı. Həmin müraciətdə məsələni BMT Təhlükəsizlik Şurasında qaldırmaqla bağlı İrəvana çağırış edilmişdi. Görünür ki, separatçı rejimlə Ermənistan rəhbərləri əlbir olaraq, bu işi öncədən düzüb-qoşublar. Əvvəlcə Arutyunyana belə bir müraciətin edilməsi üçün işarə verilib. Arutyunyan həmin müraciəti edəndən sonra, Ermənistan rəhbərliyi də, guya, bu müraciətə uyğun olaraq BMT Təhlükəsizlik Şurasının fövqəladə sessiyasının çağırılması təşəbbüsü ilə çıxış edib.
Bütün hallarda “blokada”, “soyqırımı” söhbətlərinin bir oyun olduğu dünyaya məlumdur. Təkcə bunu demək kifayətdir ki, aprelin 23-də Laçın sərhəd nəzarət-buraxılış məntəqəsi yaradılandan indiyədək Xankəndidən Ermənistana və əks istiqamətdə gedib-gələnlərin sayı 2 min nəfəri keçməyib. Əgər Qarabağda vəziyyət iddia etdikləri kimi ağır olsaydı, özlərinin dediyi 120 min nəfər arasından 2 min nəfər İrəvana getmək və qayıtmaq zərurəti görməzdi. Deməli, orada insanların yaşayışı normaldır. Sadəcə olaraq, Ermənistan real vəziyyət ətrafında çox acınacaqlı durum var imiş görüntüsü yaratmaq və dünyanın diqqətini buna cəlb etmək istəyir. Ancaq dünya artıq hər şeyi başa düşüb. Azərbaycanın Laçın yolu və Qarabağ üzərində suverenliyini tam bərpa etmək kimi legitim hüquqa malik olduğunu dünya birliyi də yaxşı başa düşür.
Səxavət HƏMİD, “Xalq qəzeti”