Bakı münaqişəni “konservləşdirmək”, sülh danışıqlarını “dondurmaq” kimi ideyaları da tarixin arxivinə göndərməkdə israrlıdır
Hayastanın baş naziri yenə başlayıb nala-mıxa vurmağa. O, bir tərəfdən sülh gündəminə sadiqliyini bəyan edir, digər tərəfdən isə kənar aktorların verdiyi təlimatla, sülhə nailolma prosesini “dondurmaq” məqsədilə təxribatçı açıqlamalar verir. Bütün bunlarla yanaşı, İrəvan həm də Azərbaycanın daxili işlərinə qarışmağa cəhdlər göstərir.
Aydın görünən odur ki, hayların məqsədi sülh sazişini imzalamaqdan yayınmaq, bununla paralel olaraq savaş təhlükəsini minimuma endirməkdir. Amma bir-birinə tərs mütənasib gələn bu iki məqsədinə İrəvanın hansı üsulla nail ola biləcəyi dumanlı görünür. Bəli, Hayastan hazırda sülh prosesindən uzaqlaşma variantları üzərində baş sındırır, fəqət Paşinyan iqtidarı niyyətini açıq şəkildə bildirməyə cəsarət eləmir... Bu səbəbdən sülh danışıqlarını qeyri-müəyyən müddətədək “dondurmaq” şansını qazanmaqdan ötrü dolanbac yollarla hərəkət etməyə üstünlük verir.
“Ermənistan baş naziri Nikol Paşinyanın 11 avqust tarixində hökumətin iclasında çıxışı zamanı növbəti dəfə bölgədə “gərgin humanitar vəziyyət” barədə iddiaları təkrarlayarkən, Ermənistan tərəfindən “humanitar yük” adı altında Laçın istiqamətində göndərilən yüklərin qəbul edilməməsinin erməni sakinlərə qarşı “etnik təmizləmə” kimi qələmə verməsi heç bir məntiqə sığmır”.
Bu fikirlər Azərbaycan XİN-in hayların baş nazirinin yersiz, sübutsuz, yalana söykənən iddialarına cavabında öz əksini tapıb.
Göründüyü kimi, Ermənistan baş naziri “beynəlxalq mexanizmlər çərçivəsində Xankəndi–Bakı dialoqu” istəyi ilə Azərbaycanın daxili işlərinə qarışmaq istiqamətində uğursuz cəhdlər göstərir. Baxmayaraq ki, bu zaman biabırçı məğlubiyyətə uğradığı 44 günlük müharibədən əvvəlki vəziyyətə qayıtmağın heç vaxt mümkün olmayacağı ona gün kimi aydındır. Heyrət doğuran digər məqam odur ki, müstəqil siyasət yürütmək, qərarlar qəbul etmək imkanından məhrum Paşinyan iqtidarı bunu bilə-bilə sülh prosesinə badalaq vurmaq üçün məhz bu “tezis”dən maksimum yararlanmağa çalışır.
Azərbaycan XİN-in cavab bəyanatında qeyd olunur ki, Ermənistanın bu iddialarını davamlı olaraq təkrarlaması onu göstərir ki, Laçın sərhəd-buraxılış məntəqəsi təsis edilənədək bu yoldan istifadə etməklə həyata keçirdiyi qeyri-qanuni fəaliyyətin məntəqə təsis edildikdən sonra qarşısının alınması İrəvanı bərk narahat edir: “Erməni sakinlərin həqiqətən də iddia olunduğu kimi, gündəlik tələbat mallarına ehtiyacları varsa, bunun üçün Azərbaycanın təklif etdiyi və beynəlxalq tərəfdaşların dəstəklədiyi “Ağdam–Xankəndi” yolundan istifadə edilməsi mümkündür”.
* * *
İrəvanın “stəkanda tufan” effekti yaratmaq cəhdləri kimi xarakterizə edilməyə layiq son “diplomatik demarşları” ilə Bakıdan sülh danışıqlarında, Qarabağ ermənilərinə münasibətdə müəyyən güzəştlər qoparmağı hesabladığını görmək çətin deyil. Amma başına topladığı daxili və xarici dəstəkçiləri ilə bərabər “düzüb-qoşduğu” “blokada”, “humanitar böhran”, “etnik təmizləmə” kimi cəfəng iddiaların heç birinin Bakıya yapışmayacağını, bu yalanların ayaq tutub yeriməyəcəyini Paşinyanın özü də yaxşı bilir. Mövzunun davamı olaraq Qarabağ ermənisi, sosial şəbəkə fəalı Artur Osipyanın Laçın yolunda heç bir blokadanın olmadığını, Ağdərədə “arsaxlıların” acından ölmədiyini sübut edən açıqlamasını oxucularımızın diqqətinə çatdırırıq: “Mən də deyirəm ki, Qarabağda problemlər var, amma aclıqdan danışmaq, körpə uşaqları göstərmək bizə başucalığı gətirmir. Yəni, bütün dünyaya demək istəyirik ki, bizim ağır vəziyyətimizə baxın və qurban qismində uşaqlarımızı irəli veririk. Bu yalan keçmir! Bu yalan əks-effekt verir və bizə şərəf gətirmir”. Osipyanın dediyinə görə, Qarabağdakı “hakimiyyət” 30 il bölgəni çapıb-talayıb və indi gördükləri “çörək növbələri” hansısa “blokadanın” yox, rüşvətxor “idarəçilərin” əməllərinin nəticəsidir. Bunu hadisə yerindən yerli erməninin qaynar reportajı, eləcə də real vəziyyətin canlı sübutu qismində qəbul edə bilərik.
Paşinyan yəqin onu da anlayır ki, nə qədər gec deyil müharibədə uduzduqlarını həzm etməli, Azərbaycanın şərtləri ilə razılaşmalı və daha ciddi fəsadlarla üzləşmədən sənədlərə imzasını atmalıdır. Hansı tərəfdən baxmasından asılı olmayaraq, rəsmi İrəvan sülh sazişindən imtina ediləcəyi təqdirdə, onu növbəti savaşda daha ağır məğlubiyyətin gözlədiyini də nəzərə almağa məcburdur.
* * *
Hazırda Cənubi Qafqazda sülh və təhlükəsizlik ciddi təhlükə ilə üz-üzədir. Qarabağ münaqişəsinin son nizamlama mərhələsində Vaşinqton və Brüssel kimi moderatorların israrlı cəhdlərinə baxmayaraq, bölgədə kövrək sülh prosesinin dalana dirənmə ehtimalı inandırıcı görünməkdədir. Dünyanın bir çox nəhənglərinin geosiyasi, hərbi-iqtisadi maraqlarının toqquşması faktı regionda sülhün və sabitliyin bərpasına əsas əngəl rolunu oynayır. Məhz bu baxımdan, regionda hərbi-siyasi situasiyanın getdikcə daha da gərginləşməsi təəccüb doğurmur.
Burada, təbii ki, sülh prosesinin pozulmasına yönəlik cəhdlərə baş vuran məhz Ermənistandır. O Ermənistan ki, Cənubi Qafqaza iştahlı bəzi aktorların əlində “geosiyasi alət” rolunu oynamaqdadır. Elə həm də bu səbəbdən hazırda Paşinyan hakimiyyəti hansısa formada Ermənistanın maraqlarına cavab verə biləcək sülh sazişinə imza atmaq ixtiyarından uzaqda görünür. Rəsmi İrəvanın beynəlxalq himayədarlarının təlimatlarına uyğun davranışları da buna hesablanıb.
Amma İrəvan bunu həmişəlik qulağında sırğa etməlidir: “Laçın dəhlizi” yoxdur, Laçın yolu var. Həmin yolun başlanğıcında Azərbaycanın sərhəd nəzarət-buraxılış məntəqəsi fəaliyyət göstərir. Və bu postdan hər gün Qarabağın erməni sakinləri sərbəst şəkildə hərəkət edirlər.
* * *
Yenidən sülh danışıqları mövzusuna qayıdaraq qeyd etməyi zəruri sayırıq ki, ikitərəfli və üçtərəfli dialoqun əsas vasitəçisi, tərəflər arasında moderatorluq missiyasını boynuna götürmüş Rusiyanın son vaxtlar sərgilədiyi mövqe özünün “orijinallığı” ilə Cənubi Qafqaz sevdalı bütün oyunçuların diqqətini çəkir.
Onu da xatırladaq ki, Rusiya XİN-nin MDB ölkələri üzrə dördüncü departamentinin direktoru Denis Qonçar bu günlərdə maraqlı açıqlama ilə çıxış edib. Qonçarın qənaətinə görə, tələsik hazırlanmış sülh müqaviləsi bölgəyə davamlı sülhü gətirə bilməz: “Əksinə, gələcəkdə yeni münaqişələrin, faciələrin əsasını qoyacaq. Sürətə deyil, balanslaşdırılmış və qarşılıqlı məqbul həllərin keyfiyyətli hazırlanmasına üstünlük verilməlidir”.
Yerləşdiyi binanın üst fasadından hələ də SSRİ-nin oraq-çəkicli gerbi boylanan Rusiya XİN-in sülh prosesində mövqeyi bu açıqlamasız da bəlli idi. Kremlin Ukrayna cəbhəsində vəziyyətin kifayət qədər gərginləşdiyi indiki məqamda üçtərəfli dialoq, sülh danışıqlarının növbəti raundu kimi “ikinci dərəcəli məsələlərə” ayırmağa vaxtı yoxdur.
Bakı bunu dəfələrlə deyib və bəyan edib: beynəlxalq hüquq normalarına görə, Qarabağ Azərbaycanın ayrılmaz tərkib hissəsidir. Oradakı erməni azlığın hüquq və təhlükəsizliyinə Azərbaycan təminat verir. Dünyanın heç bir dövləti ərazisindəki etnik azlığa xüsusi imtiyazlar tanımaz. Bu mənada rəsmi Bakı da Qarabağdakı erməni azlığına Azərbaycan Konstitusiyasında bütün vətəndaşlara şamil edilən hüquqlardan daha artığını verməz. Yəni, Ermənistan üzləşdiyi bütün çətinliklərdə Azərbaycanı təqsirkar çıxarmağa, hətta Bakını dünyanın gözündə “təcavüzkar” göstərməyə nə qədər çalışsa da, bunun tam əksini təsdiqləyən dosyelər, həmçinin Osipyan kimi canlı şahidlərimiz var. Bunları görməzdən gəlmək isə nə Paşinyanın özündə, nə də onun komandasında alınacaq. Çünki, onların güman etdikləri kimi, müharibə və onun nəticələri hərdən qalibin müəyyənləşmədiyi şahmat oyununa bənzəmir. Taxta lövhə üzərindəki “döyüşdən” fərqli olaraq, real meydandakı qarşıdurmada “heç-heçə” variantı mümkün deyil. Bu müstəvidə məğlub tərəf qalibin şərtlərini qəbul etməyə məhkumdur.
İmran BƏDİRXANLI, “Xalq qəzeti”