Ermənistanın baş naziri Nikol Paşinyan ölkənin 44 günlük müharibə şəraitinin öyrənilməsi üzrə istintaq komissiyasının iclasındakı çıxışında özündən əvvəlki Ermənistan iqtidarını, xüsusən də ikinci prezident Robert Koçaryanı sərt tənqid edib. Əslində, Nikolun ittihamlarına diqqət yetirəndə, onun Qarabağın Azərbaycana məxsusluğunu bildirən bəyanatlarının səmimiyyətdən uzaqlığını görmək mümkündür. Tam aydın olur ki, Paşinyan yalnız Azərbaycanın gücü ilə hesablaşdığından belə deyir. Bu barədə yazının sonunda bildirəcəyik. Hələlik isə baş nazirin iclasda nə dediklərinə diqqət yetirək.
Bəli, Paşinyan bildirib ki, Ermənistanın ikinci prezidenti Robert Koçaryan hakimiyyətinin ilk günlərindən Azərbaycanla bağlı qapılar arxasında danışıqlar aparıb və bu danışıqlarda Qarabağın Azərbaycanın tərkibindəki statusunu məqbul hesab edib. N.Paşinyanın sözlərinə görə, Ermənistan hakimiyyətinin danışıqlar prosesindəki bu mövqeyi geniş əhali üçün əlçatmaz olan sənədlərdə əksini tapıb. İctimai bəyanatlar və dövlət təbliğatı səviyyəsində isə tamam fərqli məsələlər gündəmə gətirilib. Həmin dövrdə Ermənistan telekanalları Qarabağın və yeddi rayonun vahid xəritəsini göstərməyə başlayıb. Oxşar xəritələr ictimai yerlərdə, hətta dövlət qurumlarında da asılıb. “Bu, yeddi rayonun Azərbaycana qaytarılmaması variantının nəzərdə tutulmadığı şəraitdə baş verib”, – deyən baş nazir əlavə edib ki, ümumən danışıqların heç bir mərhələsində Qarabağa aidiyyatı olmayan rayonların Azərbaycana qaytarılmaması kimi məqam yer almayıb.
N.Paşinyan bildirib ki, Azərbaycanla Ermənistan arasında danışıqlar gedə-gedə yeddi rayonun erməni toponimləri dövriyyəyə buraxılıb. Füzuli Varanda, Ağdam Akna, Qubadlı Sanasar, Zəngilan Kövsəkan, Cəbrayıl Mehakavan, Kəlbəcər Karvaçar, Laçın Kaştağ adlandırılıb. “Beləliklə, birinci prezident Levon Ter-Petrosyanın ifadəsi ilə “ələ keçirilən” və keçmiş xarici işlər naziri Vardan Oskanyanın dili ilə “işğal edilmiş” ərazilər (bunlar onların açıq şəkildə ifadə edilmiş formalarıdır – Paşinyan) “azad edilmiş” ərazilər kimi vətən sayılmağa başlanıb”, – deyən baş nazir bir daha vurğulayıb ki, bütün bunlar yalnız televiziya ekranlarında baş verib. Danışıqlar isə Azərbaycan toponimlərindən istifadə olunmaqda davam edib, vətən elan edilən əraziləri alaq otları basıb, bəzi hallarda generallar hərbi qulluqçuların əməyindən istifadə edərək, oraya buğda əkiblər.
N.Paşinyan Ermənistanda hakimiyyət nümayəndələrinin bəyan etdikləri və Qarabağın Azərbaycanın ərazi bütövlüyü ilə guya, heç bir əlaqəsinin olmadığına, ərazinin 1991-ci ildə referendum yolu ilə Azərbaycan SSR-dən ayrıldığına və müstəqillik qazandığına dair fikirlərə də münasibət bildirib. Deyib ki, ölkəsinin o zamankı iqtidarı Qarabağın statusu ilə bağlı referendumun keçirilməsini nəzərdə tutan Madrid prinsipləri ilə razılaşdığı üçün 1991-ci il referendumunun nəticələrinin əhəmiyyəti və legitimliyi şübhə altına düşüb. Paşinyan əvvəllər olduğu kimi, yenə də təkrarlayıb ki, Ermənistan hakimiyyəti vaxtilə sözügedən prinsipləri qəbul etməklə, Qarabağın Azərbaycanın bir hissəsi olması ilə razılaşıb.
Baş nazir Paşinyan Ermənistanın ikinci prezidenti Koçaryanı Qarabağı danışıqlarda iştirak imkanından məhrum etməkdə də günahlandırıb. “Koçaryan Qarabağı istənilən müstəqillikdən məhrum etdi və Qarabağ xalqının iradəsini pozdu. Üstəlik, o, bölgəni beynəlxalq səviyyədə tanınma statusundan da məhrum etdi”, – deyən Nikol onu da bildirib ki, nəticədə Qarabağ Rusiya, ABŞ, Fransa, Azərbaycan və Ermənistanla eyni masada təmsilçilikdən uzaq düşüb: “Bu, Qarabağın beynəlxalq subyektiv olmasının sonu idi”.
Paşinyan Koçaryanı 1998-ci il prezident seçkilərində saxtakarlıqla hakimiyyətə yiyələnməkdə və qeyri-legitim olaraq dövlət başçısı postunu tutmaqda da ittiham edib. Çünki həmin vaxt qüvvədə olan qanunvericiliyə görə, onun prezidentliyə namizədliyini irəli sürmək hüququ yox idi. Ən əsası isə Nikolun sözlərinə görə, ikinci prezident Qarabağın beynəlxalq səviyyədə tanınma və legitimlik əldə etmək şanslarını dünya ictimaiyyətinin Ermənistanda hakimiyyətin qəsb edilməsinə göz yumması üçün qurban verib.
Əvvəlcə bildirdik ki, Paşinyanın 44 günlük müharibə şəraitinin öyrənilməsi üzrə istintaq komissiyasının iclasında səsləndirdikləri, onun Azərbaycanın gücü ilə hesablaşmasının nəticəsidir. Bu məqamı heç də əbəs yerə vurğulamadıq. Çünki Nikol hazırda 44 günlük müharibəyə görə sanki “günah keçisi” axtarışındadır. Və o keçi qismində ikinci prezident R.Koçaryanın timsalında özündən əvvəlki iqtidara yüklənmiş durumdadır. Əlbəttə, əli Azərbaycan xalqının qanına batmış Koçaryan da, ondan sonrakı prezident Serj Sarkisyan da cinayətkardır, bunlar öz yerində.
Nikolun dünənki çıxışındakı qeyri-səmimilik isə bundadır ki, o, Qarabağın yalnız əvvəlki hakimiyyətin səhvi səbəbindən, belə demək mümkünsə, əldən çıxdığı düşüncəsindədir. Yəni, Paşinyan üçün bölgənin əbədi və əzəli Azərbaycan torpağı olması məntiqi yaddır. Deməli, o, Azərbaycanın gücü qarşısında acizdir və dünənki çıxışı da, əslində, aciz liderin cılız manifestindən başqa bir şey deyil.
Axı, “Qarabağ Ermənistandır –nöqtə” bəyanatını verən, “yeni ərazilər uğrunda yeni müharibə” şüarını irəli sürən nə Koçaryan idi, nə də Sarkisyan. Bunu Paşinyan etmişdi. Baş nazirin hazırda söylədiklərindən belə nəticə doğur ki, o, hakimiyyətə yiyələnəndə də indi dilə gətirdiyi qənaətə gələrək, görüb ki, Qarabağın, o cümlədən, digər Azərbaycan torpaqlarının Ermənistana məxsusluğu ilə bağlı şans qalmayıb. Buna görə özünün inqilabi demokratiyanın qladiatoru kimi zənn edib, koçaryanların və sarkisyanların tülkülüklə dalana dirədikləri danışıqlar prosesinə kökündən zərbə vurub. Nəticədə Ermənistan üçün böyük rüsvayçılıqla bitmiş müharibə qaçılmaza çevrilib.
Söhbət “günah keçisi”ndən düşmüşkən, sonda onu da vurğulayaq ki, Paşinyan 44 günlük müharibə şəraitinin öyrənilməsi üzrə istintaq komissiyasının iclasının qapalı yox, açıq şəkildə keçirilməsini istəyib. Yəni, özü bütün suallara açıq cavab verməyi vacib sayıb. Bu da təsadüfi deyil. Nikol yaxşı başa düşür ki, Qarabağ da daxil olmaqla, Azərbaycanın 86,6 min kvadratkilometr ərazidə suverliyini tanıması ona qarşı ciddi təzyiqlər doğurub. Buna görə çalışır ki, müharibə və Qarabağ danışıqları ilə bağlı bütün detalları açıqlasın və həmin təzyiqləri özündən uzaqlaşdırsın. Beləliklə də hakimiyyətini saxlamaq üçün mənəvi immunitet qazansın. Bunu bacaracaqmı? Əlahəzrət zaman göstərəcək. Hələlik isə Nikol keçmişdə eşələnməyində olsun. Nəzərə alaq ki, eşələnmək üçün yaxşı şərait də var. Çünki 44 günlük müharibə şəraitinin öyrənilməsi üzrə istintaq komissiyası iclasını iyulun 27-də davam etdirəcək.
R.ƏVƏZ, “Xalq qəzeti”