Milli Məclisin Sədri Sahibə Qafarova Avstriya Respublikasına rəsmi səfəri çərçivəsində bu ölkənin Milli Şurasının Sədri Volfqanq Sobotka ilə görüşüb. Milli Məclisin Mətbuat və ictimaiyyətlə əlaqələr şöbəsindən redaksiyamıza verilən məlumata görə, əvvəlcə tərəflər arasında təkbətək görüş keçirilib, ölkələrimiz və parlamentlərimiz arasında münasibətlərin inkişafı ilə bağlı fikir mübadiləsi aparılıb. Sonra görüş nümayəndə heyətlərinin iştirakı ilə davam etdirilib.
V.Sobotka Milli Məclis Sədrinin bu səfərini parlamentlər arasında əlaqələrin inkişafı ilə bağlı qarşılıqlı niyyətin mühüm göstəricisi adlandırıb. O, parlamentlər səviyyəsində əlaqələrin əhəmiyyətini qeyd edərək , ölkələrimiz arasında münasibətlərin hazırkı səviyyəsindən məmnunluğunu bildirib. Deyib ki, Azərbaycan və Avstriya arasında əməkdaşlığın böyük potensialı var. Xüsusilə, iqtisadi əlaqələr daha da gücləndirilə bilər. V.Sobotka vurğulayıb ki, Azərbaycan Avropa üçün mühüm iqtisadi tərəfdaş, etibarlı enerji təchizatçısıdır. O, həmçinin Avstriyanın BMT Təhlükəsizlik Şurasının qeyri – daimi üzvlüyünə namizədliyinə göstərdiyi dəstəyə görə Azərbaycana təşəkkür edib.
Sahibə Qafarova Milli Məclisin Sədri səviyyəsində Avstriyaya ilk rəsmi səfəri olduğunu qeyd edərək, bunun ölkələrimiz və parlamentlərimiz arasında əməkdaşlığın daha da inkişafına və genişlənməsinə töhfə verəcəyinə ümidvar olduğunu bildirib. Azərbaycan və Avstriyanın dost və tərəfdaş ölkələr olduğunu deyən S.Qafarova qeyd edib ki, ötən il ölkələrimiz arasında diplomatik münasibətlərin qurulmasının 30 ili tamam olub. Azərbaycan və Avstriya arasında imzalanmış sənədlərin əhəmiyyətini qeyd edən S.Qafarova, bu çərçivədə, 2013-cü ilin mayında imzalanmış “Azərbaycan Respublikası və Avstriya Respublikası arasında dostluq münasibətləri və tərəfdaşlığa dair Birgə Bəyannamə”nin ölkələrimiz arasında əlaqələrin genişlənməsi üçün böyük əhəmiyyət kəsb etdiyini diqqətə çatdırıb.
Görüşdə qarşılıqlı maraq doğuran digər məsələlər ətrafında da müzakirələr aparılıb.
Ə.BƏDƏLOV,
“Xalq qəzeti”