İyirmi birinci əsrin İpək Yolunun üstündə inşa edilən Zəngəzur dəhlizinə Rusiyanın xüsusi maraq göstərməsi təəccüblü deyil. Dünən Moskvada Azərbaycan, Ermənistan və Rusiya baş nazirlərinin müavinləri – Şahin Mustafayev, Mher Qriqoryan və Aleksey Overçukun həmsədrliyi ilə üçtərəfli işçi qrupunun görüşü başlayıb.
Bu barədə verilən məlumatlarda bildirilib ki, görüşdə Azərbay-canla Ermənistan arasında sərhəd və gömrük proseduru müzakirəyəçıxarılacaq. Xatırladaq ki, Ermənistanın baş naziri Nikol Paşinyan bir müddət əvvəl İrəvanla Bakı arasında 1975-ci ilin sovet xəritələri əsasında delimitasiya ilə bağlı ilkin razılığın əldə edildiyini açıqlamışdı.
Ümumən, Azərbaycan, Rusiya və Ermənistan liderlərinin imzaladıqları sənədə əsasən yaradılan üçtərəfli işçi qrupunun hazırda gündəliyində duran əsas məsələlər iki ölkə arasında kommunikasiyaların açılması, sərhəd keçid rejimlərinin bərpası, eləcə də Zəngəzur dəhlizinin istifadəyə verilməsidir. Məlumdur ki, Moskva üçtərəfli Bəyanatın 9-cu bəndinə uyğun olaraq, Zəngəzur dəhlizinə nəzarəti öz əlində cəlməşdirmək istəyir.
Bəli, gələcəkdə transmilli layihəyə çevrilməyə iddialı bu marşrutla bağlı Rusiyanın mövqeyi və rolu olduqca önəmlidir. Amma Brüssel və Vaşinqton platformalarında kommunikasiya xətləri üzərində suverenlik prinsipi əsas götürülür. Bu prinsiplə Kremlin məlum iddiaları arasında fikir ayrılıqlarına son qoyulmalıdır. Həmçinin, bu məsələdə Bakı və İrəvan arasında bir çox istiqamətlərdə konsensus var. Görünən odur ki, Moskvanın müəyyən güzəştlərə gedəcəyi təqdirdə, tərəflər arasında razılıq əldə edilə bilər.
Yeri gəlmişkən, Azərbaycanın Türkiyədəki səfiri Rəşad Məmmədov yerli telekanala müsahibəsində Zəngəzur dəhlizi layihəsi ilə bağlı maraqlı açıqlama verib. “Zəngəzur dəhlizinin açılması Ermənistanın özünü təhlükəsiz hiss etməsi üçün də vacibdir”, – deyən səfir bildirib ki, bu dəhliz Türkiyənin Şərqlə Qərb arasındakı əlaqəsini təmin edəcək. Onun açılması ilə, eyni zamanda, Türkiyə ilə Azərbaycan arasındakı məsafə 38 kilometr olacaq”. Səfirin sözlərinə görə, Zəngəzur dəhlizi Ermənistanın inkişafı, gələcəyi üçün əhəmiyyətlidir: “Ermənistan son 30 ildə bir çox layihədən məhrum oldu. Həmin layihələr onun ərazisindən yox, Gürcüstandan keçərək, Türkiyəyə, Qara dənizə və Aralıq dənizinə çatdı. Ermənistan bu layihədən də kənarda qalsa, həyata keçirə biləcək başqa proyekti qalmayacaq”.
“Xalq qəzeti”