Bu sözləri Avropa İttifaqının (Aİ) Ermənistandakı nümayəndəliyinin rəhbəri, səfir Andrea Viktorin İrəvanda Avropa Gününə həsr olunmuş mətbuat konfransında erməni jurnalistin sualına cavab verərkən deyib.

2022-ci ilin oktyabrında Aİ Xarici İşlər Nazirləri Şurasının qərarı ilə yaradılmış, 3 ay ər­zində Ermənistan ərazisində yerləşdirilən mülki missiyanın fəaliyyəti bu ilin yanvar ayın­da 2 ilə qədər uzadıldı. Yüz nəfərdən ibarət mülki missiya Ermənistanın Azərbaycanla şərti sərhədi boyu vəziyyətin monitorinqi ilə məşğul olur. 

Amma avropalı heyə­tin həmin monitorinqi necə və hansı formada həyata keçirdiyini nəinki şərti sər­hədin bu tayında, heç Ha­yastanın özündə də bilən yoxdur. Bununla bağlı İrə­van rəsmiləri arasında, hərbi rəhbərliyində, hətta media­sında ara-sıra narazılıqlar, mənfi təmayüllü açıqlamalar müşahidə olunmaqdadır. Səkkiz ay bundan əvvəl Fran­sanın birbaşa təşəbbüsü və dəstəyi ilə bölgəyə göndərilən Avropa “legionu”nun konkret hansı fəaliyyəti həyata keçir­diyi, adı mülki, faktiki yarım­hərbi bu missiyanın həqiqi vəzifəsinin nədən ibarət ol­duğu hayların özləri üçün də qaranlıq imiş. O zaman Aİ-nin Ermənistan üzrə missiyasının (EUMA) Azərbaycan–Ermə­nistan sərhədinin Ermənis­tan tərəfində yerləşməsinə Bakı etiraz etmədiyini, lakin onlarla əməkdaşlıqdan söh­bət getmədiyini bildirmişdi. Son aylar isə erməni mediası əsasən istefada olan alman və fransız hərbçilərindən, jan­darmlarından ibarət müşahi­dəçi kontingentin İrəvana he­sabat verməli olduğu barədə məlumatları tirajlamağa baş­layıb. Bu barədə səfir Andrea Viktorinə İrəvanda Avropa Gününə həsr olunmuş mət­buat konfransında ünvan­lanmış sual və ona verilən cavab maraq doğurur. Mət­buat konfransından məlumat yayımlayan “armenpress” informasiya agentliyi “Azər­baycanın sonuncu təcavüz yerində müşahidələri barədə İrəvana hesabat təqdim edib­lərmi?” – sualına Aİ nümayən­dəliyinin rəhbəri xanım Vik­torinin cavabı konkret olub: “Missiya fəaliyyəti barədə nə Ermənistana, nə də Azərbay­cana heç bir hesabat vermir”. Müşahidəçilərin eyni vaxtda hər yerdə ola bilmədiyini, sər­hədin kifayət qədər uzun və patrulun qrafik üzrə hərəkət etdiyini deyən missiya rəhbəri onların nəyi gördükləri barə­də məlumat verməyə borclu olmadığını erməni jurnalistin nəzərinə çatdırıb: “Buna görə biz yalnız müşahidə aparırıq və bu barədə Brüsselə mə­ruzə edirik”. 

Həmin erməni mediası bir qədər əvvəl Aİ missiyasinın tərkibindəki fransız və alman polis və eks-hərbçilərin əsas məqsədlərinin Ermənistanın Rusiya və İranla sərhədində kəşfiyyat xarakterli məlumat­lar toplamaqdan ibarət oldu­ğunu yazmışdı. Bu gün isə ümidlərini doğrultmamış, göz­lədiklərini ala bilməmiş missi­yadan hesabat tələb edirlər. Düzgün yola gəlməyincə, uğursuzluq zolağının onu müşayiət edəcəyini İrəvan nə qədər tez anlasa, bir o qədər yükü azalar. 

2020-ci il 10 noyabr tarixli Bəyanatı imzalamaqla böy­nuna götürdüyü öhdəlikləri yerinə yetirməkdən hər üsulla boyun qaçırmağa çalışan İrə­vanın “avropalı bacısı” Fran­saya bağladığı ümidləri də fiaskoya uğrayıb. Postmüha­ribə dövründə Avropa İttifaqı­nın dəstəyinə güvənərək Ba­kını “yola gətirmək” xəyalları ilə yaşayan Hayastan rəhbər­liyinin əli hər yerdən və hər tərəfdən üzülüb. İndi onun üz tutduğu bütün kənar missiya­ların ətəyindən əl çəkib, ən vacib missiyanı – sülhə gəl­mək missiyasını icra etməyin məqamıdır. 

İ.HƏSƏNQALA, “Xalq qəzeti”