Bunu Azərbaycanın Xarici işlər naziri Ceyhun Bayramov dünən Vilnüsdə litvalı həmkarı Qabrielius Landsberqis ilə görüşdən sonra keçirilən brifinqdə deyib.

Litvada işgüzar səfərdə olan Azər­baycanın Xarici işlər naziri Ceyhun Bayramov Ermənistan rəhbərliyini Ba­kı-İrəvan arasında münasibətlərin nor­mallaşdırılması ilə bağlı müzakirələr­də daha çox səy göstərməyə çağırıb. C.Bayramov litvalı həmkarı Qabrielius Landsberqislə görüşdən sonra keçi­rilən birgə brifinqdə qeyd edib: “Həm­karımı münaqişədən sonra regionda yaranmış vəziyyət barədə məlumat­landırdım, həmçinin Azərbaycanın sülh gündəliyinin təkmilləşdirilməsi is­tiqamətində göstərdiyi səylərdən, o cümlədən Ermənistanla sülh sazişi layihəsi üzrə danışıqların son raundun­dan danışdım. İşğaldan azad edilmiş ərazilərdə aparılan yenidənqurma işlə­ri, kommunikasiyaların açılması – bü­tün bu məsələlər də gündəmdədir”.

Həmçinin Azərbaycanın XİN başçı­sı sözlərinə onu da əlavə edib ki, mü­naqişədən sonrakı dövrdə Ermənistan və Azərbaycan arasında münasibət­lərin normallaşdırılması üzrə səylərdə zəif dinamikanın müşahidə olunma­sına baxmayaraq, bütün sahələrdə, o cümlədən ikitərəfli münasibətlərin əsaslarını müəyyən edən sülh müqa­viləsi layihəsi, dövlət sərhədlərinin de­limitasiyası, nəqliyyat-kommunikasiya əlaqələrinin bərpası üzrə əldə olunmuş tərəqqi hələ ümidləri­mizi doğrultmayıb.

“Biz Ermənistan tərəfini xoşməramlılıq nümayiş etdirməyə və ölkələr arasında mü­nasibətlərin normal­laşdırılması ilə bağlı müzakirələrdə daha çox səy göstərməyə çağırırıq”, – deyən C.Bayramov ərazi bü­tövlüyü və suverenlik məsələlərinə də toxu­nub: “Hesab edirik ki, iki ölkə arasında münasibətlərin normallaşdırılmasının ən yaxşı yolu ərazi bütövlüyünün qarşı­lıqlı tanınmasına və bir-birinin suveren­liyinə hörmətə əsaslanır. Azərbaycanın bu məsələdə mövqeyi aydın, prinsipial və dəyişməzdir”.

“Xalq qəzeti”