Xankəndidə separatçı Ruben Vardanyanın rəhbərliyi ilə həyata keçirilən imzatoplama kampaniyası bu gün başa çatır. Kampaniyanın nəticələrini ictimaiyyətə açıqlayacağını bildirən Vardanyan bəzi qərarlar haqqında da cəmiyyəti məlumatlandıracağını qeyd edib. Hələlik qərarların konkret nələrdən ibarət olacağı məlum olmasa da, bütün hallarda ölkəmizə qarşı yeni təxribatlara start veriləcəyi məlumdur. Əslində, absurd imzatoplama prosesinin özü növbəti oyunbazlığın başlanğıcı hesab edilə bilər.

Vardanyan Şeyx Nəsrullah rolunda

Vardanyanın liderliyi ilə həyata ke­çirilən imzatoplama prosesi ilə bağlı gülünc və təxribat xarakterli məqam­lardan biri separatçıların vaxtilə Qara­bağda mövcud olan qondarma rejimi yenidən diriltmək, ona həyat vermək istəyi ilə bağlıdır. Kampaniyanın fəal­larından olan David Bağıryan iddia edir ki, hər kəs qondarma rejimi, onun müstəqilliyini tanımalı, erməni xalqının “iradəsinə” hörmət etməlidir. Hansı ki, 44 günlük Vətən müharibəsində Azər­baycan Silahlı Qüvvələrinin müzəffər Ali Baş Komandan İlham Əliyevin rəh­bərliyi altında bu qurama, separatçı rejimi dəfn etdiyi, onu tarixin zibilliyinə göndərdiyi məlumdur. 2020-ci ilin 10 noyabr tarixində imzalanan üçtərəf­li Bəyanatda da nəinki Qarabağda mövcud olmuş qanunsuz rejim, ümu­miyyətlə, buradakı ermənilərin statusu haqqında heç bir ifadə yer almayıb. Bu faktın özü ermənilərin vaxtilə işğalda saxladıqları ərazilərdə formalaşdırdıq­ları qondarma “respublika”nın dəfninin siyasi müstəvidə də təsdiqləndiyini göstərir. Belə olan halda Vardanyanın yenidən Qarabağda mövcud olmuş faşist rejimini diriltmək cəhdi separat­çıların ölkəmizə qarşı təxribatlara ara vermədiyini, sülh müqaviləsinin imza­lanmasına süni yolla mane olmağa ça­lışdıqlarını göstərir. 

Əslində, İrəvanın dəstəyi ilə Var­danyanın Xankəndidə yaratmağa çalış­dığı şou, yalançı “xalq etirazı” 2020-ci il 10 noyabr tarixli üçtərəfli Bəyanatın kobud şəkildə pozulması deməkdir. Bu isə onu göstərir ki, Ermənistan nəinki sülh müqaviləsinin imzalanmasında maraqlı deyil, ümumiyyətlə, Azərbay­canla Ermənistan arasında ilkin razılaş­ma sənədi sayılan üçtərəfli Bəyanatın şərtlərini belə yerinə yetirmək istəmir.

David Bağıryan “əsir erməniləri”
Azərbaycan əleyhinə aksiyaya səsləyir

Xankəndidəki proseslər fonunda diqqətçəkən məqamlardan biri də Da­vid Bağıryanın erməniləri Azərbaycan əleyhinə aksiyaya səsləməsidir. Bağır­yan bildirib ki, hər bir erməni onun sə­sinə səs verməli, Azərbaycan əleyhinə aksiyada iştirak etməklə, öz mövqeyini ortaya qoymalıdır. Bağıryanın bəyanat­larından məlum olur ki, o, anti-Azərbay­can mitinqinin mümkün qədər kütləvi olmasına çalışır. Məqsəd sosial sifariş daşımayan, bir ovuc separatçının şəxsi iradəsini əks etdirən aksiyaya “ümu­merməni hərəkatı” donu geyindirmək­dir. 

Təbii ki, aksiyanın təşəbbüskarı kimi Vardanyan qələmə verilsə də, əs­lində, bu təşəbbüsün İrəvan tərəfindən irəli sürüldüyü və dəstəkləndiyi ortada­dır. Bu isə o deməkdir ki, rəsmi İrəvan anti-Azərbaycan aksiyasının kütləvili­yini təmin etmək naminə bütün imkan­lardan, eyni zamanda, inzibati rıçaqlar­dan istifadə edəcək, mənəvi-psixoloji baxımdan əsirliyində saxladığı Xankən­di ermənilərinə ciddi təzyiq göstərəcək. Başqa sözlə desək, aksiyaya ermə­nilər inzibati məcburetmə fonunda cəlb ediləcək ki, bu da sözügedən aksiyanın heç də “xalqın iradəsi”, “ümumerməni hərəkatı” anlayışları ilə bir araya sığ­madığını göstərir.

“Dəmir yumruq” üçün darıxan başlar

David Bağıryan irəli sürdükləri tələblərin tanınması üçün 7 gün vaxt verəcəklərini, nəticə hasil olmadığı təqdirdə “bildikləri kimi” hərəkət edə­cəklərini vurğulayıb. Bağıryanın irəli sürdüyü tələbin qondarma Qarabağ re­jimini diriltmək olduğunu nəzərə alsaq, bu tələbin heç vaxt müzakirə predmeti olmayacağı birmənalıdır. 

Bağıryanın 7 gündən sonra nə edə­cəyinə gəlincə, əslində, bu da məlum­dur. Separatçıların və onların mənəvi atası Vardanyan 7 günün sonunda yenə anti-Azərbaycan bəyanatları səs­ləndirəcək, yağa bilmədikləri üçün sa­dəcə guruldamaqda davam edəcəklər. Bu mənada Vardanyan və Bağıryanın təhdidlərinin heç bir əhəmiyyət kəsb etmədiyi ortadadır. Ancaq baş verənlər fonunda müşahidə edilən bir həqiqət var ki, bu da separatçıların başlarının “Dəmir yumruq” üçün darıxmasıdır. Və ola bilsin ki, separatçıların bütün tələb­lərinə “yox” deyən rəsmi Bakı hansısa məqamda onların bu istəyini nəzərə alsın.

Seymur ƏLİYEV