Türkiyə və Azərbaycanı rəsmi olaraq müttəfiq edən Şuşa Bəyannaməsi burada, Şuşada, bu binadan bir neçə metr aralıda imzalanmışdır. Bu, tarixi hadisə idi. Buna baxmayaraq, Azərbaycanla Türkiyə arasında münasibətlər de-fakto müttəfiq münasibətləri idi və biz bunu xüsusi olaraq son iyirmi ildə nümayiş etdirmişdik.
İlham ƏLİYEV
Azərbaycan Respublikasının Prezidenti
Şuşa, 3 may 2023-cü il
Azrbaycan Prezidentinin arsenalını təkcə müasir silah-sursat və modern texniki vasitələr təşkil etmir. Onun silahları arasında xalq-iqtidar birliyi, hücum diplomatiyası və informasiya müharibəsi kimi sınaqdan çıxmış vasitələr də var. Dövlət başçımız 2020-ci il martın 10-da altıncı çağırış Milli Məclisin ilk iclasındakı çıxışında demişdi ki, biz bu gün beynəlxalq aləmdə hücum diplomatiyası aparmalıyıq: “Çünki biz Azərbaycan həqiqətlərini çatdırmalıyıq...Tarixi ədalət bizim tərəfimizdədir, beynəlxalq hüquq da bizim mövqeyimizi dəstəkləyir. Ona görə bizim arqumentlərə qarşı Ermənistan tərəfi heç bir ciddi arqument qoya bilmir, ancaq yalan, böhtan, tarixi saxtakarlıq və mifologiya”.
Bu fikirlər İkinci Qarabağ müharibəsindən təxminən altı ay əvvəl səsləndirilmişdi. Həmin çağırışların nəticəsini isə təxminən yeddi ay yarımdan sonra –işğalçı ölkənin rəhbəri təslimolma sənədini imzalayanda gördük. Ancaq həmin günlərdə müharibə bitmişdi, mübarizə isə hələ də davam edir. Ona görə də dövlət başçımız həm informasiya müharibəsini, həm də hücum diplomatiyasını əvvəlki templə davam etdirir. Mayın 3-də ADA Universitetinin təşkilatçılığı ilə Şuşada keçirilən dördüncü beynəlxalq konfrans da həmin prosesin mühüm tərkib hissələrindən biri idi.
Dövlət başçımız tədbirdə iştirak edən əcnəbi mütəxəssislərin suallarını cavablandırarkən təxminən iyirmidən çox məsələ haqında danışdı və ən sadə vətəndaş da görürdü ki, həmin cavabların hamısı zaldakılardan çox beynəlxalq aləmdəki bədxahlarımıza ünvanlanmışdı. Xatırladaq ki, bu gün dünyadakı anti-Azərbaycan qüvvələri ən çox narahat edən məsələ Azərbaycan – Türkiyə müttəfiqliyi və Türk Dövlətləri Təşkilatının beynəlxalq güc mərkəzlərindən birinə çevrilməsidir.
Adı çəkilən konfransda ABŞ-ın Ceymstaun Fondunun baş elmi işçisi Vladimir Sokor Azərbaycanın NATO-ya üzv ölkə və regional güc olan Türkiyə ilə NATO çərçivəsindən kənar ikitərəfli müttəfiqlik qurduğunu yada saldı və əlavə etdi ki, bu, bütün postsovet kontekstində Azərbaycanın təkrarolunmaz nailiyyətidir. Çünki bu münasibətlərdə hərbi və təhlükəsizlik sahəsində müttəfiqlik var. Bu müttəfiqlik strateji tərəfdaşlıqlardan da yaxındır.
Dövlət başçımız okeanın o tayından gəlmiş alimin həmin qənaətini yüksək qiymətləndirərək əlavə etdi ki, Ərdoğanın Türkiyəyə rəhbərlik etdiyi son iyirmi ildə bizim münasibətlərimiz mənim onunla birgə səylərimiz nəticəsində təkcə qardaş xalqlar arasında deyil, eyni zamanda, müttəfiqlər arasında olan münasibətlərə çevrilmişdir: “Biz bunu dəfələrlə nümayiş etdirmişik. Buna görə, əlbəttə ki, bu, regional inkişafın önəmli amilidir və siz Azərbaycanın Türkiyənin hərbi müttəfiqi olmasından dolayı olaraq NATO-nun hərbi müttəfiqinə çevrilməsini söyləməkdə tamamilə haqlısınız”.
Prezidentimizin fikrincə, Azərbaycanla Türkiyə nəinki bu müttəfiqliyin formatını qoruyub saxlayacaq, hətta onu gücləndirəcəkdir. Çünki yeni geosiyasi reallıqda bu, artıq regional sabitliyin və təhlükəsizliyin mühüm amilinə çevrilib. İstər bu hərbi komponent, enerji, kommunikasiyalar, istərsə də ticarət və s. sahələr olsun: “Mən çox nikbinəm və düşünürəm ki, Türkiyə və Azərbaycan arasında münasibətlərin qardaşlıq xarakterini heç nə dəyişməyəcək.
Başqa bir məqamı da yada salmaq istərdik. Macarıstanın Beynəlxalq Əlaqələr İnstitutunun tədqiqatçı professoru Vasa Laslo Azərbaycanın nə zamansa qurulacaq Mərkəzi Asiya ölkələrinin iqtisadi birliyinə qoşulub-qoşulmayacağı barədə sualı da tədbir iştirakçıları üçün maraqlı idi. Ancaq Prezident öz cavabında söyləyəcəklərinin Mərkəzi Asiyada da maraqla izlənəcəyini nəzərə alaraq dedi ki, əgər bu, baş versə biz nə edəcəyimizə baxarıq: “Azərbaycan Mərkəzi Asiya ölkəsi deyil. Amma tarixi və mədəni əlaqələrlə, indi isə daha çox siyasi əlaqələrlə Mərkəzi Asiya ilə sıx bağlıdır... Ötən ay mən Tacikistan və Qazaxıstanda rəsmi səfərdə oldum. Martda Özbəkistan və Türkmənistan prezidentləri Azərbaycanda səfərdə oldular. Mən, həmçinin ötən ilin sonunda Qırğızıstanda rəsmi səfərdə oldum. Ötən il mən Özbəkistana 3 dəfə səfər etdim. Beləliklə, Azərbaycanla Mərkəzi Asiya ölkələri arasında dialoqun necə fəal olduğunu görə bilərsiniz. Bu, çox müsbət dinamikadır. Düşünürəm ki, ümumilikdə, nəsə olacağı təqdirdə nə ola biləcəyindən asılı olmayaraq, Mərkəzi Asiya və Azərbaycan gələcəkdə, ilk növbədə, sözsüz ki, nəqliyyat, təhlükəsizlik məsələləri baxımından daha çox inteqrasiyalaşmış ola bilər”.
Xatırladaq ki, Mərkəzi Asiya ölkələri üçün nəqliyyat, təhlükəsizlik məsələləri və ixrac bazarlarına çıxış bu gün əvvəlkindən daha çox əhəmiyyət kəsb edir. Dövlət başçımız əlavə etdi ki, biz Özbəkistan, Qazaxıstan, Qırğızıstan və Türkmənistan kimi Mərkəzi Asiya ölkələri ilə, Türkiyə ilə birlikdə Türk Dövlətləri Təşkilatındayıq: “Qeyd etdiyim kimi, Tacikistanla çox fəal siyasi və iqtisadi dialoqumuz var. Bu, bir növ bu günün reallığıdır. Əlbəttə, bunu daha da fəallaşdırmaq vacibdir… Sizə deyə bilərəm, son iki ildə mənim Mərkəzi Asiyadan olan tərəfdaşlarla qarşılıqlı əlaqələrim və qarşılıqlı səfərlər misli görünməmiş dərəcədə yüksəkdir. Düşünürəm ki, bu, sizin “nə isə baş versə, nə baş verər” sualınızın qismən cavabıdır”.
Nəhayət, Böyük Britaniyanın Xarici İnkişaf İnstitutunun qlobal risk üzrə eksperti İlayda Nichar dövlət başçımızdan soruşdu ki, Azərbaycan Türk Dövlətləri Təşkilatının inkişafında hansı rolu oynaya bilər? Sanki, bu, ingilis mütəxəssisin də İrəvanın yuxusunu ərşə çəkmək məqsədi var idi. Onun elə bir məqsədi olmasa da, dövlət başçımızın cavabından sonra nəinki İrəvanın, hətta Ermənistanın yuxusunun qaçması tamamilə gözləniləndir: “Azərbaycan Türk Dövlətləri Təşkilatının bütün fəaliyyəti dövründə fəal olub... Bizim geniş coğrafiyamız, bəzi ölkələrdə böyük təbii sərvətlər, o cümlədən enerji ehtiyatları, bəzi ölkələrin güclü hərbi imkanları var. Beləliklə, biz bütün bu səyləri birləşdirsək, əlbəttə ki, qlobal səviyyədə ciddi oyunçu görə bilərik. Hesab edirəm ki, təşkilat qlobal güc mərkəzlərindən biri ola bilər və olmalıdır. Bir daha deyirəm, əhali, coğrafiya, nəqliyyat marşrutları, Avrasiya komponenti, enerji ehtiyatları var. Türkiyə NATO-nun ikinci böyük ordusuna malikdir. Azərbaycan öz hərbi imkanlarının olduqca yüksək olduğunu nümayiş etdirib. Bütün bu imkanları birləşdirsək, hər kəs bundan yalnız faydalana bilər”.
Bəli, bu gün Türk dünyası ölkələri prezidentlər Rəcəb Tayyib Ərdoğan və İlham Əliyevin bütün sahələrdəki təşəbbüskarlığını dəstəkləyir, alqışlayır və qarşıda duran vəzifələrin icrasına özünəməxsus töhfələr verirlər. Bu dövlət başçımızın dediyi kimi, imkanların birləşdirilməsidir. Bunu isə xalqlarımızın taleyi və zaman tələb edir.
İttifaq MİRZƏBƏYLİ, “Xalq qəzeti”