Ermənistanın “məxməri xəyalları” heç nəyə gətirib çıxarmadı, Qərb Azərbaycanın tərəfindədir. Bunu ABŞ-ın Stendford Universitetinin siyasi elmlər doktoru, politoloq Artur Xaçikyan deyib.

“Biz enişə gedirik, təşviq etdiyimiz “sülh gündəliyi” iflasa uğradı. Nə qədər güzəştə gediriksə, sülhdən danışırıq­sa, Bakının iştahı bir o qədər artır. Azər­baycanın BMT-dəki nümayəndəsi artıq bəyan edib ki, Ermənistan səkkiz kəndi təslim etməli və işğal illərinə görə təzmi­nat ödəməlidir”, – deyən Xaçikyan Azər­baycanın Laçın–Xankəndi yolundakı şərti sərhəddə – Həkəri çayı üzərindəki körpü­nün üstündə nəzarət-buraxılış məntəqəsi qurmasına da münasibət bildirib. O vurğu­layıb ki, Bakı İrəvanı 10 noyabr 2020-ci il tarixli üçtərəfli Bəyanatı pozmaqda ittiham edərək, Qarabağa, tamamilə, sahib çıx­maq yolu tutmaqdadır. Laçın dəhlizinin qapadılması da buna xidmət edir.

Göründüyü kimi, A.Xaçikyanın açıq­lamasında doğru vurğuladığı məqam­larla yanaşı, tipik erməni xislətindən irə­li gələn düşüncələrə də yer var. Onun Azərbaycanın Qarabağ probleminin həl­lindən sonra hansı addımları atacağına dair fikirləri diqqət çəkir. Politoloq bildirib ki, Bakı Qarabağın ardınca, Zəngəzur məsələsini də həll edəcəkdir və bunun­la əlaqədar konkret ssenariyə malikdir. Beynəlxalq ictimaiyyət isə Azərbaycanın iddialarını həzm edir, heç bir müqavimət göstərmir. 

Fikirlərinin davamını gətirən ermə­ni əsilli amerikalı siyasi ekspert üçtərəfli Bəyanatda əksini tapmış dəhliz məsələ­sindən, yəni, Azərbaycanın digər ərazilə­rini Naxçıvanla birləşdirən quru yolunun təmin edilməsindən də söz açıb. Məlum­dur ki, Ermənistan sözügedən sənədin başqa müddəalarına əməl etmədiyi, ötən iki il yarım ərzində bölgədə vəziyyəti gər­ginləşdirdiyi kimi, Naxçıvana quru yolla əlaqədar üzərinə götürdüyü öhdəliyi də yerinə yetirmir. Belə olan halda Xaçikya­nın söylədikləri tanış fikirlərdir. Elə Azər­baycan Prezidenti İlham Əliyev dəfələrlə bildirib ki, beynəlxalq siyasi leksikona özünün gətirdiyi Zəngəzur dəhlizi ideyası reallaşacaqdır. 

Stendford Universitetində elmi-siyasi fəaliyyətlə məşğul olan şəxs həmin dəh­lizin reallaşmasının təkcə ölkəmiz yox, dünya üçün də əhəmiyyətini bilməmiş deyil. Mövcud anlamda Bakının nəzərdə tutulan qlobal layihənin gerçəkləşməsi üçün hər hansı zəmin hazırlamasında təəccüblü heç nə yoxdur. Yəni, Xaçikyan məsələdən söz açmaqla “Amerika kəşf etmir”. Təəccüblü olan isə nəinki Xaçik­yanın, ümumən, erməni siyasi dairələrin və dünya erməniliyinin məsələ barədə, sanki, ilk dəfədir eşidirmiş kimi görüntü yaratmaları, mənasız isteriya qaldırma­larıdır. Digər tərəfdən, Azərbaycan hələ lap başlanğıcda Ermənistanın Zəngəzur dəhlizindən faydalanma imkanlarını da irəli sürüb. 

Əlbəttə, başlıca məqam avantürist məqsədlər güdən İrəvanın Bakının təklifi­ni, necə deyələr, qulaqardına vurmasıdır. Yeri gəlmişkən, Ermənistan, nəinki, bu məsələdə kompromisə gəlmir, ümumən, Azərbaycanla normallaşma prosesində konstruktiv mövqe tutmur, sülh ritorika­sından uzaq durur, danışıqlar prosesini dalana dirəyir. Belə olan halda, Azərbay­can, bir qədər kəskin desək, qanmazı qandırmaq hüququnu özündə saxlamaq­dadır. 

Erməni politoloq açıqlamasında dəh­liz məntiqinə Azərbaycanın Ermənis­tandan işğal illərinə görə təzminat tələ­bindən söz açarkən də söykənib. Onun sözlərindən əldə olunan qənaət budur ki, hazırkı məqamda dəhliz üçün “yaşıl işıq” yandırması Ermənistanı Bakının təzmi­nat tələbindən qurtara bilər. Əks halda, İrəvan tələbi yerinə yetirməli olacaqdır. Xaçikyanın məntiqinə görə, tələbin ye­rinə yetirilməməsi Sünikin, yəni Zəngə­zurun Azərbaycan tərəfindən tutulması perspektivini doğuracaqdır. 

Xaçikyan açıqlamasının sonunda da əvvəlində haqqında söz açdığı məqama qayıdıb. Söhbət onun beynəlxalq ictima­iyyətin Azərbaycan qarşısında acizliyinin dilə gətirilməsindən gedir. Əlbəttə, biz də otuz ilə yaxın müddətdə beynəlxalq normaların, beynəlxalq hüququn işləmə­diyini vurğulamışıq. Nəinki Ermənistanın siyasi rəhbərliyi, ümumən, dünyada heç kəs sözümüzə əhəmiyyət verməyib, tu­tarlı tədbir görməyib, İrəvanı işğaldan daşındırmayıb. İndi Xaçikyan və onun kimilər nə qədər danışırlarsa, danışsınlar və bildirsinlər ki, Qərb açıq-aydın Azər­baycanın tərəfində çıxış edir, ona həm hərbi, həm də iqtisadi yardım göstərir. Lap elə ölkəmizin Qarabağda etnik tə­mizləmə həyata keçirməyə hazırlaşdığını vurğulamaları da mümkündür. Çünki eyni əməlləri azərbaycanlıların başına gətirib­lər. İndi öz üzərlərinə götürdükləri öhdə­likləri yerinə yetirsinlər.

R.ƏVƏZ, “Xalq qəzeti”