Dünən səhər tezdən Şuşadan keçən Laçın–Xankəndi yolunda Beynəlxalq Qızıl Xaç Komitəsinə (BQXK) məxsus avtomobillərin, eləcə də humanitar yüklü maşınların hərəkət etməsinə növbəti dəfə şərait yaradılıb. 

Qeyd edək ki, Qarabağda faydalı qazıntı yataqlarının qanunsuz istismarı əleyhinə Laçın–Xankəndi yolundakı etiraz aksiyası 129 gündür davam edir. 2020-ci ilin pa­yızında Azərbaycan xalqının igid əsgər və zabitləri əzəli və əbədi torpaqlarımız olan Qara­bağı düşməndən azad ediblər. Lakin Xankəndi və onun ətra­fındakı ərazilərdə Azərbaycan Respublikasına məxsus fay­dalı qazıntı yataqlarının hələ də qanunsuz istismarı davam etdirilir. 

Şuşa ərazisində Rusiya sülhməramlılarının nəzarətin­də olan yolun bir hissəsində etiraz aksiyası azərbaycan­lı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qa­rabağ iqtisadi rayonunda eko­loji terrora son qoyulması tələ­bi ilə keçirilir. 

Bu günlərdə könüllü ola­raq etiraz aksiyasına qoşulan “Optimist” Sosial Problem­lərin Həllinə Yardım” ictimai birliyinin sədri Habil Niftalı bizimlə telefon söhbəti zamanı bildirdi ki, tədbir iştirakçıla­rı öz haqlı tələblərinin yerinə yetirilməsini sonadək tələb et­mək əzmindədirlər. QHT fəalı sonra bunları dedi: 

– Müstəqil Azərbaycan sivil, demokratik dövlətdir. Biz qanuni haqqımızı tələb edirik. Ölkəmizin ərazisində yerləşən faydalı qazıntı yataq­larının qeyri-qanuni istismarı təcili surətdə dayandırılma­lıdır. Azərbaycan dövləti və xalqı haqlı olaraq beynəlxalq hüququn tələblərinin yerinə yetirilməsini qətiyyətlə tələb edir. 

H.Niftalı həmçinin vur­ğuladı ki, Qərbdəki bəzi er­mənipərəst qüvvələr Şuşadan keçən Laçın-Xankəndi yolun­da keçirilən etiraz aksiyala­rının mahiyyətini təhrif edir, ölkəmizə qarşı böhtan və iftira kampaniyası aparırlar. Bu, yol­verilməzdir. Azərbaycana qarşı təzyiq göstərmək mənasızdır. 

Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Eko­logiya və Təbii Sərvətlər Na­zirliyi, İqtisadiyyat Nazirliyi yanında Əmlak Məsələləri Dövlət Xidməti və “Azer­Gold” Qapalı Səhmdar Cə­miyyətinin mütəxəssislə­rindən ibarət heyət Rusiya sülhməramlı kontingentinin müvəqqəti yerləşdiyi Azərbay­can ərazilərində faydalı qazıntı yataqlarının qanunsuz istisma­rı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizli­yi ucbatından monitorinq baş tutmayıb.

P.S. Dünən saat 15:00 ra­dələrinə qədər Laçın–Xankən­di yolundan humanitar yüklü 66 avtomobil sərbəst hərəkət etmişdir.

M.HACIXANLI, “Xalq qəzeti”