Ermənistan baş naziri Nikol Paşinyan ölkə parlamentindəki çıxışında bildirib ki, Azərbaycan da eyni addımı atacağı təqdirdə Ermənistan öz qoşunlarını Ermənistan–Azərbaycan sərhədinin bütün xətti boyunca geri çəkməyə hazırdır. Paşinyan 1991-ci ilə qədərki sərhədləri nəzərdə tutub və xatırladıb ki, Avropa İttifaqı (Aİ) təhlükəsizliyin təminatı kimi belə ikitərəfli addımın atılmasını irəli sürüb. Qeyd edək ki, erməni baş nazir bunları aprelin 11-də tələfatla nəticələnmiş hərbi insidenti şərh edərkən deyib. Söhbət Azərbaycan və Ermənistan hərbçilərindən, ümumilkdə, 7 nəfərin həlak olduğu şərti sərhəd kimi qiymətləndirilən zonadakı qarşıdurmadan gedir.
Paşinyanın sözlərinə görə, Ermənistan tərəfinin səylərinə baxmayaraq, Tex (Dığ – red.) kəndi ərazisində sərhədçilərin yerləşdirilməsi prosesi gərginliksiz ötüşməyib. Deməli, o, ölkəsinin ərazidə hərbi birləşmələr yerləşdirmək məramının olduğunu təsdiqləyir. Bəs, bu addım nəyə lazımdır? Baş nazir konstruktiv davranmaq istəsəydi, Ermənistan nəyisə fürsət bilib sərhədçi yerləşdirməkdənsə, delimitasiya və demarkasiya işlərinə başlamağa qərar verərdi. Belə bir qərar yoxdur. Əvəzində, İrəvan tərəfindən vəziyyəti gərginləşdirmək niyyətləri var. Nəzərə alaq ki, belə niyyətlər əvvəllər də olub. 2020-ci ildən bu yana Ermənistan dəfələrlə spekulyasiyalara yol verib. Elə buna görə də Azərbaycan Ordusu şərti sərhəddəki yüksəkliklərə nəzarəti ələ alıb ki, mümkün eskalasiya perspektivini əvvəlcədən müəyyənləşdirə bilsin, qabaqlayıcı tədbirlər görsün.
Azərbaycanın hərəkətlərinin, guya, təxribat olduğunu deyən Ermənistan baş naziri bildirir ki, siyasi qiymətləndirmə nöqteyi-nəzərindən, Aİ-nin bəyanatı da 1991-ci il sərhədlərinə qayıdılmasını əsas götürür. Əvvəla, nə üçün bu qurum yeni nə isə deməlidir? Olmazdımı ki, 44 günlük müharibədən sonra Ermənistan konstruktiv mövqe tutub 10 noyabr 2020-ci il tarixli üçtərəfli Bəyanatın şərtlərinə yerinə yetirəydi? Bu gün də yerinə yetirmir və Aİ tərəfindən səslənmiş hansısa fikirə fokuslanır. Beləliklə, İrəvan müharibədən sonra formalaşmış reallıqlara alternativ irəli sürmək məqsədinə köklənir. Yəni, onun Aİ patronajlığına söykənərək “məqsəd” reallaşdırmaq istəyən Nikol Paşinyandır. O, 2020-ci ildə altına imza atdığı sənədin şərtlərinə əməl etsəydi, indi baş verənlər yaşanmayacaqdı...
Əslində, Nikolun səsləndirdiyi və müəllifinin Aİ olduğunu bildirdiyi təklifin özü də siyasi təxribat mahiyyəti daşımaqdadır. Belə çıxır ki, Azərbaycan Ermənistan ərazisini işğal edib. Halbuki, bu hal yoxdur. Digər tərəfdən, 1991-ci ildə sərhədlərin konkret müəyyənləşdirilməsinə dair sənəd olmayıb. Sərhədlərin özü də, həmçinin. Əgər Paşinyan Sovet İttifaqı dağıldıqdan sonrakı Alma-Ata Bəyannaməsinə istinad edirsə və edir də, o zaman həmin bəyannamənin məramını 30 ilə yaxın müddətdə heçə sayan tərəf Ermənistandır, Azərbaycan yox. Qarabağı bir kənara qoyaq, tutaq ki, mübahisəlidir (əslində, belə deyil) bəs Ağdam, Kəlbəcər, Zəngilan, Qubadlı, Füzuli, Laçın necə? Sözügedən rayonlar işğal edilməli idi? Azərbaycanın işğal müddətində çəkdiyi məhrumiyyətlər var. Bunu unutmaq olmaz. Üstəlik, müharibə apararaq əldə etdiyi Zəfərin qazandırdığı üstünlük də vurğulanmalıdır. Həmin üstünlüyə görədir ki, bu gün ölkəmiz öz haqlarını diktə edən tərəfdir və etməlidir də.
Paşinyan isə özünə sərfəli olanda keçmişə qayıdır, sərf etməyəndə keçmişi lənətləyir. Məsələn, o, parlamentdəki çıxışında onu da bildirib ki, Ermənistanın əvvəlki rəhbərliyi 2007-ci ilin Madrid prinsipləri ilə Qarabağı Azərbaycan ərazisi kimi tanıyıb. O zaman belə çıxır, Nikol indi canfəşanlıq etməklə, Sarkisyan-Koçaryan rejiminin yol verdiyi səhvi aradan qaldırmaq niyyətindədir və istəyir ki, özünü qəhrəman olaraq göstərsin. Hər halda, “Qarabağ Ermənistandır” deyib hərbə-zorba gələn məhz o idi. Necə deyərlər, həmin vaxt ağını çıxardı və müharibədə də cavabını artıqlaması ilə aldı.
Paşinyanın haqqında söz açdığı Madrid prinsipləri elə-belədən meydana çıxmamışdı. Beynəlxalq ictimaiyyət Ermənistan hakimiyyətinə təsir göstərmişdi. Təəssüf ki, bu təsir, ancaq, kağız üzərində qalmışdı. Sual yaranır: Paşinyan nəyə görə Madrid prinsiplərini müharibədən əvvəl xatırlamırdı? Bəs, yaxşı, indi hansı “həqiqətin” arxasına düşüb? Sualımız ritorikdir, çünki Nikolu düşündürən həqiqət deyil. İzah edək nədir.
Paşinyan, belə demək mümkünsə, 1991-ci ilə qayıtmaqla, manipulyativ mövqe tutmaqdadır. Çünki həmin ilin sərhədi Azərbaycan və Ermənistan SSR arasında keçmiş inzibati sərhəddir və qeyd etdiyimiz kimi, SSRİ-nin süqutundan sonra tərəflərin Alma-Atada Bəyannamə imzalaması nəticəsində dövlət sərhədinə çevrilmişdir. Burada maraqlı, daha doğrusu, məkrli niyyətə hesablanmış incə məqam var. Axı Qarabağın “müstəqilliyinin” tərəfdarları hesab edirlər ki, həmin bəyannamədə ərazinin müstəqil dövlət statusu formal olaraq müəyyənləşib və hazırda Bakı və Moskva mövcud istiqamətdə mübahisə edirlər. Deməli, Paşinyanın keçmişə boylanması, məhz, bu mübahisə zəminindədir. Görünür, dividend götürməyi düşünür.
Diqqət edək, Paşinyanın sözlərinə görə, qoşunların 1991-ci il sərhədindən ikitərəfli çıxarılması məntiqi olaraq, 2022-ci ildə Soçi və Praqada keçirilmiş sammitlərdə Azərbaycanla Ermənistanın imzaladığı sazişlərdən irəli gəlir: “Ermənistan Ermənistan-Azərbaycan sərhədinin bütün uzunluğu boyunca oxşar addımlar atmağa hazırdır. Biz 2021-ci ildən hazır olduğumuzu bildiririk... Azərbaycan beynəlxalq platformalarda əldə olunmuş razılaşmalara əməl etmədiyini sistemli şəkildə nümayiş etdirir”.
Bəli, vurğuladığımız kimi, Ermənistan baş naziri 44 günlük müharibəni və müharibənin yekunlarını təsdiqləyən 10 noyabr 2020-ci il tarixli üçtərəfli Bəyanatın şərtlərini “unudur”. Üstəlik, manipulyativ niyyətini Soçi və Praqa görüşləri üzərinə gətirir. Həmin görüşlərdəki razılaşma ilə Alma-Ata bəyannaməsi arasında paralellər aparmaq fikrinə düşür. Halbuki hər iki görüşdə başlıca müzakirə predmeti üçtərəfli bəyanatdan irəli gələn öhdəliklər olmuşdu.
Nikol 1991-ci ilin üzərinə gəlirsə, deməli, avtomatik olaraq, Qarabağda Ermənistana məxsus hərbi birləşmələrin mövcudluğunun mübahisə predmetinə çevrilə bilməyəcəyini vurğulamış olur. Ancaq bunun mübahisəsi getməlidir. Digər tərəfdən, üçtərəfli Bəyanata əsasən, Ermənistanın üzərinə götürdüyü konkret öhdəliklər var. Həmin öhdəliklərə Azərbaycanın digər ərazilərini Naxçıvanla birləşdirən yolun açılması da daxildir, Naxçıvandakı və Qazaxdakı anklav kəndlərin ölkəmizə qaytarılması da. Paşinyan, nədənsə, bunlardan söz açmır. Əslində, söz açmalıdır.
Belə çıxır ki, qoşunlar Paşinyanın nəzərində tutduğu nöqtələrə qayıdacaq, rəsmi İrəvan isə əvvəllər olduğu kimi, yenə də bildirəcək ki, Qarabağda erməni hərbi birləşmələri yoxdur, oradakı Xankəndi, Ağdərə polisidir və s. Beləcə, bölgədəki separatçılıq meyilləri saxlanılacaq. Erməni baş nazirin hiylə ilə dolu açıqlaması, heç şübhəsiz, diqqəti məhz, buna – Qarabağ mövzusundan yayındırmağa hesablanıb. Hər halda, niyyəti baş tutmayacaqdır. Çünki Azərbaycan–Ermənistan münasibətlərinin normallaşması mahiyyətinə kompleks yanaşılması vacib olan məsələdir. Burada hər hansı “ağıllı gedişlərə” nəinki yer yoxdur, hətta, belə gedişlər təhlükəlidir. Başda N.Paşinyan olmaqla, Ermənistanın siyasi hakimiyyəti anlaqsız və anlaşılmaz davranışları ilə təhlükəni böyüdür, özü üçün yeni iflas reallığı formalaşdırır. Ancaq bunun fərqində deyil.
Ə.CAHANGİROĞLU, “Xalq qəzeti”