Hadrutlu erməninin İrəvanda yeni açdığı “Meqamol” ticarət mərkəzindəki restoranın Wi-Fi şifrəsi sındırılaraq, “Qarabağ Azərbaycandır! – FenixBaku” kodu ilə əvəzlənib.
Ermənistanın yazılı və elektron mediası indi bu olayı gen-bol tirajlamaqdadır. Bununla bağlı yerli “media-ekspertləri” müxtəlif versiyalar üzərində baş sındırırlar. Onların bir qismi sual edir ki, həmin ərazidə başqa Wi-Fi şəbəkələri olsa da, niyə məhz hadrutlu erməninin restoranının şifrəsi sındırılıb, adı, parolu dəyişdirilib?
Bu hadisə sosial şəbəkələrdə əməlli-başlı ajiotaja səbəb olduğu kimi, İrəvanın həmin ərazisində yaşayan sakinlər arasında da ciddi təşviş yaradıb. Onların artıq müvafiq orqanlara müraciət etdikləri deyilir.
Ermənistan “media-ekspertlərinin” digər qismi Azərbaycanın təhlükəsizlik orqanlarının əməkdaşlarının artıq İrəvanda xidməti fəaliyyət göstərməsi versiyasını irəli sürüblər. Hayların bu sahədə daha irəli gedən, müasir texnoilogiyaların xüsusiyyətlərinə dərindən bələd olan media mütəxəssisləri isə Wi-Fi şifrəsinin, yaxud kodunun məsafədən dəyişməyin mümkün olub-olmadığı versiyası üzərində çalışırlar.
Yeri gəlmişkən, oxuculara 44 günlük Vətən savaşında Zəfərimizdən az sonra irəvanlı erməninin sosial şəbəkədə paylaşdığı iki cümləni xatırlatmaq istərdik. Həmin erməni yazırdı: “Biz müharibəni həm də ona görə uduzmuşuq ki, Azərbaycan kosmosa peyklərini göndərəndə biz Hayastanda mal-mülk davası edirdik. Onlar göydən nəinki bizim tanklarımızı, hətta kombaynlarımızı izləyə bilirlər”.
Bu, eyni zamanda növbəti versiya üzərində çalışmalarından ötrü İrəvandakı “media-ekspertlərinə” bizim ismarıcımız olsun!
Hazırladı: İ.HƏSƏNQALA, “Xalq qəzeti”
