“Xalqlarımızın milli maraqlarına əsaslanan siyasət yürüdən ölkələrimizin nümunəsi ona dəlalət edir ki, hətta inkişafın ən aşağı nöqtəsində olduqda belə müdrik rəhbərlik sayəsində böyük nəticələr qazanmaq olar”.
Prezident İlham Əliyevin tacikistanlı həmkarı Emoməli Rəhmonla birgə keçirdiyi mətbuat konfransındakı çıxışından.
Ötən əsrin 90-cı illərindən başlayan, qarşılıqlı inam və etimada söykənən Azərbaycan-Tacikistan əlaqələri bu gün yüksələn xətlə inkişaf etməkdədir.
Son illər rəsmi Bakının Mərkəzi Asiya respublikaları ilə münasibətlərində hissolunacaq canlanma, dinamizm müşahidə edilir. Bu, heç də təsadüfi deyil. Çünki çağdaş dünyada cərəyan edən proseslər müxtəlif amillərə görə bir-birinə yaxın ölkələrdən birgə əməkdaşlıq, ortaq layihələr reallaşdırmaq və səyləri birləşdirmək zərurətini ortaya çıxarıb. Azərbaycanın xarici siyasətində bu amillərin prioritetə çevrildiyinin hamımız şahidiyik.
Prezident İlham Əliyevin son bir neçə ildə Mərkəzi Asiya respublikalarına ardıcıl səfərləri, eləcə də həmin dövlətlərin başçılarının Azərbaycana səfərləri bu əlaqələrin daha da genişlənməsi, dərinləşməsi və strateji xarakter alması baxımından böyük əhəmiyyət kəsb edir. Cənab Prezidentin Tacikistana dövlət səfərinə də məhz bu prizmadan yanaşmaq doğru olardı. Tacikistan Prezidenti Emoməli Rəhmonun dəvəti əsasında həyata keçirilən səfər iki dost və qardaş ölkə arasında diplomatik münasibətlərin qurulmasının 31-ci ildönümünə təsadüf edib.
İki ölkə arasında qarşılıqlı etimada, uzunmüddətli qardaşlıq münasibətlərinə söykənən əməkdaşlığın indiki səviyyəyə çatması ötən əsrin 90-cı illərinin əvvəlində respublikaların rəhbərlərinin apardığı gərgin işin, yürütdükləri müdrik və məqsədyönlü siyasətin sayəsində mümkün olub. Bu tarixi faktı Prezident İlham Əliyev Düşənbəyə səfərində tacik həmkarı Emoməli Rəhmonla keçirdiyi birgə mətbuat konfransında xüsusi olaraq vurğulayıb:
“O vaxt həm Tacikistan, həm də Azərbaycan böyük çətinliklərlə üzləşmişdi, ölkələrimizdə ictimai-siyasi sabitlik pozulmuşdu. Həm Prezident Rəhmon, həm də Prezident Heydər Əliyev, – hərəsi öz ölkəsində, - qanlı səhifəni çevirmək və ölkələrimizi inkişaf yoluna çıxarmaq üçün nə mümkündürsə etdilər və buna nail oldular. Bu gün Tacikistan və Azərbaycan iki sabit dövlətdir. Bu gün öz regionumuzda və bütövlükdə dünyada qeyri-sabitlik ocaqlarını görəndə, zənnimcə, hər kəs anlayır ki, sabitlik inkişafın, təhlükəsizliyin əsasıdır. Əgər sabitlik olmasa, nə investisiyalar olacaq, nə də tərəqqi və insanların rahatlığı”.
Heydər Əliyevin xatirəsinə səmimi münasibətə görə Tacikistan Prezidentinə təşəkkürümü bildirən İlham Əliyev atasının Emoməli Şərifoviç Rəhmonla birlikdə iki ölkə arasında münasibətlərin formalaşmasının təşəbbüskarı olduğunu, mahiyyət etibarilə bu münasibətlərin təməlini qoyduqunu bildirib.
Tacikistan Prezidenti Emoməli Rəhmonun öz çıxışında İlham Əliyevin yaxın keçmişlə bağlı xatırlatmasına münasibəti maraqlı və ibrətamiz olub:
“Dostluğumuzun və əməkdaşlığımızın əsası Azərbaycan xalqının görkəmli oğlu və mənim dostum, böyük yoldaşım Heydər Əliyev tərəfindən qoyulub və buna sıx, qarşılıqlı etimada əsaslanan əlaqələr şərait yaradır. Gələn ay Heydər Əliyevin 100 illiyini Tacikistanda da qeyd edəcəyik”.
Cənab Prezident qarşılıqlı səfərlərin gələcəkdə daha intensiv olacağına ümid etdiyini bildirərək, iki dövlətin və xalqın əl-ələ verərək işləyəcəyinə, dostluq edəcəyinə və gələcəyi bərabər quracağınə əminliyini ifadə edib.
Səfərin yukunu olaraq iki ölkənin Xarici İşlər Nazirliklərinin arasında 2023-2024-cü illər üzrə Əməkdaşlıq Proqramı, Daxili İşlər Nazirlikləri, Gömrük Xidmətlərinin arasında əməkdaşlıq haqqında Saziş, Hökumətlərarası iqtisadi əməkdaşlıq üzrə Tədbirlər Planı, kənd təsərrüfatı sahəsində əməkdaşlığın gücləndirilməsinə dair Yol Xəritəsi, eləcə də orta biznesin inkişafı, turizm, bankçılıq və digər sahələrə aid cəmi 14 müqavilə imzalanıb.
Əməkdaşlığın mübadilə aspektləri
* 2010-2022-ci illərdə Tacikistan Silahlı Qüvvələrinin 39 kursantı Heydər Əliyev adına Azərbaycan Ali Hərbi Məktəbini bitirib. Hazırda 22 tacik kursant Heydər Əliyev adına Hərbi İnstitutda təhsil alır.
* Dövlət Sərhəd Xidməti Akademiyasında 24 nəfər tacik kursant təhsil alır, onlardan 6-sının təhsili bu il başa çatacaq.
* 2022-ci ildə Azərbaycanın Tacikistan ilə ticarət dövriyyəsinin həcmi 5,95 milyon ABŞ dolları olub. 2023-cü ilin yanvar-fevral ayları üzrə ticarət dövriyyəsi isə 824,59 min ABŞ dolları təşkil edib.
* Ötən il Tacikistandan Azərbaycana 4,4 milyon dollar, Azərbaycandan Tacikistana isə 1,5 milyon dollar investisiya qoyulub.
* 2022-ci ildə SOCAR tərəfindən Tacikistana 0,3 min ton neft koksu və 0,1 min ton sürtkü yağları ixrac edilib.
* 2023-cü il mayın 1-dən “Azərbaycan Hava Yolları” QSC tərəfindən Bakı-Düşənbə-Bakı marşrutu üzrə həftədə 3 dəfə olmaqla beynəlxalq uçuşların həyata keçirilməsi planlaşdırılır.
* * *
Bütün bunlar onu deməyə əsas verir ki, iki dost və qardaş respublika arasında bütün sahələr üzrə əməkdaşlığın inkişafı uğurlu perspektiv vəd edir və bu hədəfə çatmaqdan ötrü həm Azərbaycan, həm də Tacikistan böyük potensiala malikdir.
İmran BƏDİRXANLI, “Xalq qəzeti”