Dünən buradan 122 avtomobil maneəsiz keçib
Ermənistan üzərinə götürdüyü öhdəliklərə zidd olaraq, kommunikasiya xətlərinin açılmasına mane olur. Laçın yolundakı aksiyaya qarşı çıxanlar bu öhdəliyin icrasını tələb edirlər. Əlbəttə, silahların daşınmasına dair məlumatlar dəqiqdirsə, deməli, burada Rusiya sülhməramlılarının da rolu var. Bu fikirləri Azərbaycan mediasına müsahibəsində ABŞ Dövlət Departamentinin sabiq əməkdaşı, məşhur politoloq Pol Qobl deyib.
Laçın–Xankəndi yolunda davam edən aksiya Azərbaycanın haqq səsinin dünyaya çatdırlması, erməni ekoloji cinayətlərinin beynəlxalq müstəvidə ifşası baxımından mühüm əhəmiyyətə malikdir. Bu aksiya göstərdi ki, Azərbaycan xalqı ona məxsus təbii sərvətlərin talan edilməsinə imkan verməyəcək! Xalqımız öz sərvətlərinə sahib çıxmaqda qərarlıdır və aksiyanın fasiləsiz şəkildə davam etdirilməsi, günü-gündən genişləndirilməsi buna nümunədir.
Analitik düşüncə korluğundan əziyyət çəkən Ermənistan qəsdən aksiyanı blokada kimi təqdim edir. Azərbaycan üçtərəfli bəyanatla üzərinə düşən öhdəliklərinə əməl edir. Belə ki, Laçın yolu humanitar məqsədlər üçün açıqdır. Hər gün həmin yoldan onlarca nəqliyyat vasitəsi keçir. Yoldan silah-sursatın, minaların və s. daşınması isə yolverilməzdir. Bu hərbi vasitələrlə dinc vətəndaşlarımızın ölməsini seyr etmək fikrimiz yoxdur.
Dünən Xankəndi-Laçın yolunda 60-dan çox nəqliyyat vasitəsi, o cümlədən Rusiya sülhməramlılarına məxsus dörd avtomobil maneəsiz keçib. Həmin avtomobillərin içərisində Qarabağda yaşayan erməni ailələri də olub.
Sülh gündəliyinin irəli aparılması üçün Azərbaycan hər zaman təşəbbüs göstərib. Sülh müqaviləsinin bütün prinsipləri də qarşı tərəfə təqdim edilib. Lakin yenə də son günlər Ermənistanın manipulyasiya xarakterli davranışları müşahidə olunur, bölgədə revanşist meyillər gözə çarpır.
“Qonşun pisdirsə köç qurtar…” deyiminin Azərbaycan–Ermənistan qonşuluğuna heç bir aidiyyəti yoxdur. Çünki biz bu ərazilərin əzəli və əbədi sakinləriyik. Dünyanın heç bir yerində yurd-yuva salmayan köçəri ermənilər havadarlarının köməyi ilə bizim ərazilərimizdə məskunlaşıblar. Yalvarışlarına acıyaraq, ocağımızın istisinə isinməyə şərait yaratdığımız ermənilər az sonra özlərini bu ərazilərin sahibləri hesab etməyə başlayıblar.
Ekoloqlarımızın, QHT-nin, vətəndaş cəmiyyətinin fəalları inad göstərir, məqsədə çatmaq üçün hər cür çətinliyə tab gətirməyə hazırdırlar. Aksiyaçılar tələb edirlər ki, öz torpaqlarımızda gedən proseslərdən xəbərdar olmalıyıq, sərvətlərimizə sahib çıxmalıyıq. Burada pis nə var? Torpaq sahibləri, öz haqlarını beynəlxalq hüquq səviyyəsində tələb edirlər. Bu, onların həm də konstitusiyon hüququdur. Bu haqqı heç kim onların əlindən ala bilməz, buna hüquqları da çatmır.
Azərbaycan gənci istəmir ki, cinayətkarlar ərazimizi talasın, ekologiyanı, təbii sərvətləri korlasınlar. Ermənilər nə qədər yalan danışsalar belə, dünya ictimaiyyətini çaşdırsalar da, artıq real vəziyyət göz önündədir. Gənc könüllülər dəyişməz şüarları ilə Azərbaycan cəmiyyətinin haqlı narazılığını dilə gətirir, ekoloji terrora son qoyulmasını, faydalı qazıntı yataqlarının qanunsuz istismarının dayandırılmasını tələb edirlər. Aksiya dinc etirazçıların nümayiş etdirdiyi yüksək əhvali-ruhiyyə ilə davam edir.
Rizvan FIKRƏTOĞLU, “Xalq qəzeti”