Türk ellərinin gözəl adətlərindən biri də şad günlərdə xətri istənilən doğma adama bəxşiş, hədiyyə verməkdir. Bu adətin əsas özəlliyi yaşanan sevinc hisslərini həm də özünə ən yaxın bildiyin dostla paylaşmaq, onu da sevincə şərik etməkdır.
“Türkiyənin ilk yerli “Togg” elektromobilinin ikincisinin ölkəmizdə olması dostluq və qardaşlıq münasibətlərimizin təzahürüdür”. Bu sözləri Prezident İlham Əliyev Türkiyənin Sənaye və texnologiya naziri Mustafa Varankı qəbul edərkən deyib. Dövlət başçısı qardaş ölkədə son illərdə həm müdafiə sənayesi, həm də mülki sənaye sahələrində yüksək texnoloji məhsulların istehsal olunduğunu qeyd edib. Azərbaycan Prezidenti vurğulayıb ki, bu, Türkiyə Prezidenti Rəcəb Tayyib Ərdoğanın liderliyi ilə Türkiyə xalqının zəkası, istedadı və əməyi nəticəsində ərsəyə gəlib və “Togg”un istehsalına başlanması da bu baxımdan yaxşı nümunədir.
Prezident İlham Əliyev əldə olunan bütün bu uğurlar münasibətilə Türkiyə Prezidentinə, dost və qardaş türk xalqına təbriklərini çatdırıb.
* * *
Türkiyə Prezidenti Rəcəb Tayyib Ərdoğan ölkənin ilk yerli elektromobili “Togg”un Azərbaycan Prezidenti İlham Əliyevə təqdim olunması ilə bağlı paylaşım edib. R.T.Ərdoğan tviterdə bunları yazıb:
“Qardaşım İlham Əliyev də Türkiyənin qüruru “Togg”u təhvil alıb. Xeyirli olsun! Allah gözəl günlərdə istifadə etməyi qismət etsin, qardaşım!”.
* * *
Bir millətin iki dövlətinin və iki liderin - qardaşın yolu və hədəfi bir olduğuna görə, “Togg” elektromobilin Qarabağımızın dırnaqsalmaz köhlən atları kimi yalnız və yalnız irəli gedəcəyinə tam əminik. Dəyəri qiymətindən qat-qat çox, hilallı-ulduzlu əkiz bayraqlarımızdakı qırmızı rəngi özündə ehtiva edən Türkiyənin milli elektromobili həm də iki qardaşı yan-yana aparacaq o möhtəşəm ünvanın - Böyük Turanın müjdəçisidir. İndi gördüyümüz kimi, o tarixi məqamda da dünya brendinə çevriləcək türk elektromobilinin sükanı arxasında yüksək idarəetmə bacarığına malik diplomat-sürücülər, iki qardaş Prezident, iki Ali Baş Komandan əyləşəcək.
XXI əsrin danılmaz gerçəklərindən biri də Azərbaycanla Türkiyənin əbədi qardaşlığı, Türkiyənin Cümhurbaşqanı Rəcəb Tayyib Ərdoğanla Azərbaycan Prezidenti İlham Əliyev arasındakı sarsılmaz dostluğudur. Son illər bu qardaşlıq telləri, dostluq münasibətləri bütün dünyanın diqqət mərkəzindədir, - desək, yanılmarıq. Artıq qibtə ediləcək səviyyəyə çatmış bu dostluq bizə dost olmayan ölkələrdə belə danışıq mövzusuna çevrilib.
Bəli, Türk dünyasının iki böyük lideri – Rəcəb Tayyib Ərdoğan və İlham Əliyevin bu dostluğa sadiqliyinə, onu göz bəbəyi kimi qoruduğuna hamı şahidlik edir. Biz isə bununla həm də qürur duyuruq. Necə ki güvənc yeri saydığımız Türkiyənin Azərbaycana verdiyi siyasi və mənəvi dəstək hər birimizi qürurlandırır.
* * *
Prezidentlərin 2020-ci il dekabrın 10-da Bakıda bərabər iştirak etdikləri Zəfər paradındakı çıxışlarından seçmələr.
Prezident İlham Əliyev:
“Bu gün bizim birliyimiz dünya çapında bir amildir. Türkiyə nə qədər güclü olsa, biz özümüzü o qədər güclü hiss edəcəyik. Türkiyənin uğurları bizi çox sevindirir. Əminəm ki, bundan sonra da bizim qardaşlıq əlaqələrimiz yüksələn xətlə inkişaf edəcək!”
Cümhurbaşqanı Rəcəb Tayyib Ərdoğan:
“Türkiyə olaraq Azərbaycan ilə münasibətlərimizdə özümüzə hər zaman böyük lider Heydər Əliyevin “Bir millət, iki dövlət” şüarını rəhbər tutduq. Qazi Mustafa Kamal Atatürkün dəqiq ifadəsi ilə Azərbaycanın kədərini kədərimiz, sevincini sevincimiz bildik...”.
* * *
Dostlarımızı sevindirən, düşmənlərimizə göz dağı verən bu səhnələrə bizim kimi, dünya da artıq vərdiş edib. Azərbaycan və Türkiyənin bərabər yüksəlişini gözləri götürməyənlər, bölgəmizdə fitnə-fəsad yaratmağa cəhd edənlərin özləri də yaxşı bilir ki, bu iki qardaş ölkə yüz il bundan əvvəl bir yerdə olub, bu gün bir yerdədir və sabah yenə də bir yerdə olacaq.
İmran BƏDİRXANLI, “Xalq qəzeti”