Azərbaycan dəfələrlə bəyan edib ki, Laçın–Xankəndi yolundan istifadə qanuni və şəffaf olmalıdır. Burada sui-istifadə hallarına yol verilməməlidir. Bu məqsədlə Azərbaycan hökuməti Laçın yolunun başlanğıcında sərhəd-buraxılış keçid məntəqəsi yaradılması barədə təkliflərlə çıxış edib. Bu təkliflər Azərbaycanla Ermənistan arasında normallaşma prosesi çərçivəsində Laçın yolu üzrə şəffaf mexanizm və etimad quruculuğu tədbiri kimi beynəlxalq tərəfdaşlar tərəfindən də müsbət qarşılanıb. Lakin Ermənistanın pozucu hərəkətləri Laçın yolunda şəffaflıqda maraqlı olmadığının və sui-istifadə hallarını davam etdirmək niyyətinin göstəricisidir.

Məsələnin həlli yollarından biri kimi Prezident İlham Əliyevin Ermənistan–Azərbaycan şərti sərhədində sərhəd-bu­raxılış keçid məntəqələrinin qurulması təklifi bu yolda şəffaflığı təmin edə bilər. Hazırkı vəziyyətdə şəffaflığın olmaması ciddi problem və suallar doğurur. Ermə­nistan manipulyasiyalarla məşğul olmaq, beynəlxalq aləmdə çaşdırıcı məlumatla­rın verilməsi ilə yanlış təsəvvür və lazım­sız gərginlik yaratmaqda maraqlıdır.

Azərbaycanın Laçın yolunda sər­həd-buraxılış keçid məntəqəsi yaratması tam zərurətdən doğur, vacib işdir. Bu­nunla həmin yoldan Qarabağ ərazisinə silah-sursatın çatdırılmasının qarşısı alına bilər. Çünki bu gün də ərazidə qey­ri-qanuni erməni silahlı birləşmələri var. Nəzarət olmadığı təqdirdə vəziyyətin getdikcə kritik hal alacağı gözləniləndir. Azərbaycanın təklifləri masa üzərindədir, ölkəmiz öz öhdəliklərinə sadiqdir. 

Ermənistan bütün vasitələrə əl ata­raq regionda vəziyyətin sabitləşməsinə yönəlmiş təşəbbüslərə mane olmağa ça­lışır. Düşmənin atdığı addımlar, bu ölkə­nin rəsmi şəxslərinin verdiyi bəyanatlar göstərir ki, ermənilər sülh sazişinin im­zalanmasını mümkün qədər ləngitməkdə maraqlıdırlar. Azərbaycanın Laçın yolun­da şəffaflığın təmin olunması ilə bağlı irəli sürdüyü təkliflərin İrəvan tərəfindən qəbul edilməməsi də məhz bu mövqeyin nəticəsidir. 

Erməni tərəfi həyasızcasına aksi­yaların Azərbaycanın siyasi hakimiyyəti tərəfindən dəstəkləndiyi, yolun blokada­ya alındığı və bölgədə yaşayan erməni əhalisinin humanitar böhran yaşadığını iddia edir. Reallıq budur ki, qarşı tərə­fin səsləndirdiyi iddiaların heç bir əsası yoxdur. Bu aksiya ermənilərin Rusiya sülhməramlı kontingentinin müvəqqəti xidmət apardığı Azərbaycan ərazilərin­də yerləşən faydalı qazıntı yataqlarının qeyri-qanuni istismarı, sərvətlərimizin talanması, ekologiyaya ziyan vurulması ilə əlaqədar keçirilir. Aksiya iştirakçıları vətəndaş mövqeyi ortaya qoyaraq qey­ri-qanuni fəaliyyətlərin dayandırılmasını tələb edirlər. Onların tələbi budur ki, Azər­baycanın müvafiq qurumlarına ermənilə­rin qeyri-qanuni şəkildə istismar etdikləri faydalı qazıntı yataqlarında monitorinqlər aparmalarına şərait yaradılmalıdır. Hələ­lik belə bir imkan yaradılmayıb və buna görə də ekofəallar gecə-gündüz fasilə vermədən aksiyalarını davam etdirirlər. 

Digər tərəfdən, üçtərəfli Bəyanatın prinsiplərinə zidd mövqe nümayiş etdirən Ermənistan digər havadarlarını məsələyə qatmaqla danışıqlar prosesindən yayınır. Nikol Paşinyan hökuməti prosesin əvvə­lində Azərbaycan-Rusiya gərginliyi yarat­maq üçün cizgilər ortaya qoysa da, Azər­baycan tərəfinin siyasi iradəsi göstərdi ki, əslində, Ermənistan Rusiyadan üz döndərib. KTMT məsələsi, Rusiyanın Er­mənistanda yerləşən 102-ci hərbi bazası qarşısındakı mitinqlər, Kremlin əleyhinə çıxışlar açıq göstərir ki, Ermənistan Ru­siya ilə əlaqələrini pozmaq niyyətindədir. Bu proses başlayıb. Çünki Rusiya hazır­da tarixdə görünməmiş səviyyədə repu­tasiyasını itirib. Bu isə fürsətcil Ermənis­tanın başqa müttəfiqlər axtarışına gətirib çıxarıb. 

Şuşaya gəlincə… Şəhərdə gün ər­zində hava dəyişkən keçib, fasilələrlə yağış yağıb. Bütün bunlara baxmayaraq, ekofəallar tələblərində qəti olduqları­nı nümayiş etdiriblər. Aksiya ərazisində hüquq-mühafizə orqanlarının əməkdaş­ları tərəfindən bütün təhlükəsizlik tədbir­ləri yüksək səviyyədə təşkil olunub, ora­dan 80-dək nəqliyyat vasitəsi keçib.

Rizvan FİKRƏTOĞLU, “Xalq qəzeti”