Vətən müharibəsindən sonra Ermənistandakı daxili gərginlik sürətlə artmaqda, dövlət və xalq arasındakı uçurum genişlənməkdədir. Terror dövlətindəki daxili böhranın, barışmaz ziddiyyətlərin nəticəsidir ki, erməni yetkililər arasında həbslər və istefalar yaşanmaqda, Ermənistanın hökumət üzvlərinə qarşı sui-qəsd cəhdləri həyata keçirilməkdədir. 

Son bir həftə ərzində Ermənistan Silahlı Qüvvələrinin üçüncü ordu korpu­sunun sabiq komandiri, general-mayor Qriqori Xaçaturovun həbs edilməsi, fev­ralın 20-də İrəvanda əsgər analarının etiraz aksiyası, fevralın 17-də Ermənis­tan ordusundakı bir sıra komandirlərin vəzifədən azad olunması terror dövləti daxilindəki gərginlik və qarşıdurmanın hansı səviyyədə olduğunu göstərir. 

Rusiyanın son bir ayda bir neçə dəfə anti-Ermənistan bəyanatı səsləndirməsi, terror dövlətinin xarici siyasət platfor­masında da yeni və kifayət qədər ciddi problemlər “qazandığını” göstərir. Bəs Ermənistanda daxili ictimai-siyasi və­ziyyətin belə gərginləşməsinə, dövlətin xalqın, xalqın isə dövlətin qanına susa­masına səbəb nədir? Hansı “sehirli əl” Ermənistanı addım-addım yaxınlaşdığı vətəndaş müharibəsi təhlükəsindən xilas edə bilər?

Erməni Ermənistandan başqa hər yerdə xoşbəxtdir

Ermənistanda xalqla hökumət ara­sındakı dərin uçurumun ən başlıca sə­bəbi rəsmi İrəvanın rüşvət və korrup­siya siyasəti ilə bağlıdır. Hakimiyyətin qanunsuz yolla daha çox sərvət topla­maq üçün ölkədəki korrupsiyaya “yaşıl işıq” yandırması, vətəndaş hüquqlarının kütləvi şəkildə pozulması, əhalinin sosial rifahının yaxşılaşdırılması istiqamətində heç bir addımın atılmaması, işsizlik və digər problemlər fonunda cinayətkarlığın sürətlə artması Ermənistanı faktiki olaraq vətəndaş müharibəsi həddinə çatdırıb. Hər il minlərlə erməninin Ermənistanı tərk etməsi, Afrikadan tutmuş uzaq Ame­rikaya qədər ən müxtəlif ölkələrə pənah aparması, terror dövlətindəki daxili və­ziyyətin nə qədər acınacaqlı olduğunu göstərir.

Məlumat üçün qeyd edək ki, vaxtilə Qarabağda – işğal edilmiş Azərbaycanm ərazilərində məskunlaşan ermənilərin böyük əksəriyyəti 44 günlük Vətən mü­haribəsindən sonra Ermənistana deyil, xarici ölkələrə üz tutub ki, bu da ermə­nilərin Ermənistandan başqa hər yerdə özlərini xoşbəxt hiss etdiklərini göstərir. Bu, Ermənistan hakimiyyəti ilə sadə er­məni vətəndaş arasındakı ziddiyyətlərin nə qədər dərin və uzlaşmaz olduğunun isbatıdır. 

Terror dövlətindəki proseslərin təhlili göstərir ki, hakimiyyətdə təmsil olunan məmurlar öz şəxsi ambisiyaları naminə erməni toplumuna təzyiqi artırdıqca, top­lum da öz eyni amansızlıqla hakimiyyətə təzyiq göstərməkdə, onu ifşa etməkdə, zəiflətməkdədir. Əslində, Ermənistanın həm iqtisadi, həm siyasi, həm də digər mənəvi-psixoloji baxımdan xarici qüv­vələrdən asılı hala düşməsinin səbəb­lərindən biri də, onun xalqın dəstəyindən məhrum olmasıdır. Ermənistanda haki­miyyət və xalqın uzlaşmaq, problemlərin həlli üçün bir araya gəlmək üçün heç bir səy göstərməməsi, bu sahədə ən kiçik təşəbbüs belə ortaya qoymaması tərəflə­rin bir-birinə güzəştə getməyəcək qədər dərindən nifrət bəslədiyini əks etdirir. Bu isə o deməkdir ki, Ermənistanda dövlət cəmiyyəti, cəmiyyətin isə dövləti tükən­dirməkdə davam edəcək.

Sülh sazişi və ictimai-siyasi “hannibalizm” 

Ermənistandakı ictimai-siyasi, mənə­vi-psixoloji “hannibalizmin” qarşısını ala biləcək yeganə amil sülh sazişinin imzalanması, Bakının sülh səylərinin dəstəklənməsidir. Çünki Ermənistandakı daxili gərginliyi alovlandıran ən başlıca amil iqtisadi tənəzzül, sosial sahədəki fəlakətli vəziyyətdir ki, bütün bu prob­lemləri Azərbaycanla sülh sazişini imza­lamaqla ortadan qaldırmaq mümkündür. Azərbaycanla normal münasibətlərin qu­rulması ölkəmizin moderatorluğu ilə ger­çəkləşən regional layihələrindən İrəvanın yararlanmasını təmin edə bilər ki, bu da Ermənistan iqtisadiyyatının canlanması baxımından həyati əhəmiyyətə malikdir. Bu, erməni toplumunun da sosial rifa­hına müsbət mənada əhəmiyyətli təsir göstərə, cəmiyyətdəki qəzəb və nifrəti, ümidsizlik və çarəsizliyi azalda bilər. Bü­tün bunlar onu göstərir ki, Azərbaycanla sülh sazişinin imzalanması Ermənistan üçün bu baxımdan xilas yolu ola bilər. Lakin rəsmi İrəvanın hələ də sülh sazi­şindən yayınması, Azərbaycana qarşı təxribatlara əl atması, Ermənistan haki­miyyətinin özünün və erməni toplumunun qurtuluşdan uzaq olduğunu göstərir. 

Proseslərin gedişatı Ermənistanda hakimiyyət və xalq arasındakı mübarizə­nin daha da alovlanacağından, tamamilə açıq müstəviyə keçəcəyindən xəbər ve­rir. Bu isə Ermənistan üçün yeni kütləvi həbslər və sui-qəsdlərlə yanaşı, həm də qanlı etiraz aksiyaları, silahlı qarşıdurma və vətəndaş müharibəsi deməkdir.

Seymur ƏLİYEV