“Amerikanın səsi” radiosunun məlumatına görə, erməni lobbisinin köhnə müştərisi Adam Şiff Azərbaycana qarşı sərt sanksiyaların tətbiq olunmasını, o cümlədən, ölkəmizə illik maliyyə yardımı ayrılmamasını tələb edib. Əlbəttə, ABŞ konqresmeninin bu fikirləri dövlət maraqlarına zidd olsa da, ölkə siyasətinin xüsusiyyətləri belə fikirlər səsləndirməyə şərait yaradır. Dövlət Departamenti rəhbərinin Azərbaycanın önəmindən danışdığı bir vaxtda, A.Şiff Cənubi Qafqaz regionunu 30 il terror yuvasına çevirmiş və hələ də təhlükə mənbəyi olaraq qalan Ermənistana dəstək verilməsi təklifini irəli sürüb.
Adam Bennett Şiff əslən yəhudidir. 1987-1993-cü illərdə Kaliforniyanın Mərkəzi Bölgə Prokurorluğunun prokuroru işləyib. Harvard Hüquq Məktəbində hüquq doktoru dərəcəsi alıb. Göründüyü kimi, sanballı elmi bazası var və beynəlxalq hüquq problemlərini yaxşı bilir. Amma siyasi karyerasını beynəlxalq hüquqdan üstün tutan A.Şiff erməni lobbisinin daimi müştərisinə çevrilib. Hər fürsətdə Azərbaycana böhtan atmağa çalışır, ABŞ-ı erməniləri dəstəkləməyə çağırır. Amma ABŞ-da da özlərini ədalətin, məzlumun haqqının müdafiəçisi sayanların da adları müxtəlif korrupsiya əməllərində hallanır. Uzun illərdir Birləşmiş Ştatlarda Konqresində erməni lobbisinin qatı müdafiəçisi Frank Pelloni, Adam Şiff, Robert Dold, Bred Şerman kimi konqresmenlər, yaxud Barbara Bokser və Robert Menendes kimi senatorlar, eləcə də digərləri külli miqdarda erməni vəsaitləri hesabına Azərbaycana qarşı hər cür qərəzli sifarişi yerinə yetirirlər.
Xatırladaq ki, 2023-cü maliyyə ili üzrə ölkənin müdafiə büdcəsi layihəsinə ermənipərəst demokrat kon-qresmenlərdən Robert Menendes və Aleks Padila tərəfindən iki, Ceki Şpeyer, Frank Pelloni, Adam Şiff və Toni Kardenas tərəfindən isə 5 düzəliş təklif olunmuşdu. Onlardan 682 və 724 saylı düzəlişlər ABŞ-ın Azərbaycana yardımlarına qadağa qoyulmasını özündə ehtiva edirdi. Ötən ilin dekabrında ABŞ Nümayəndələr Palatası ermənipərəst konqresmenlər tərəfindən 2023-cü maliyyə ili üzrə ölkənin müdafiə büdcəsi layihəsinə təklif olunan Azərbaycan əleyhinə düzəlişləri qəbul etmədi. 858 milyard dollarlıq müdafiə büdcəsini ehtiva edən Milli Müdafiə Səlahiyyət Qanunu (NDAA) layihəsinə 350 nəfər səs vermişdi. Ancaq ermənipərəst kon- qresmenlər – demokratlardan Adam Şiff, Frank Pellon, Cudi Çu və respublikaçılardan Qas Bilirakis sənədi dəstəkləməmişdilər.
Məlumdur ki, konqresmen Adam Şiff Kaliforniya ştatında ABŞ-dakı erməni icmasının nümayəndələrinin yaşadığı bölgəni təmsil edir. O, həmişə erməni tərəfini dəstəkləyir. Adam Şiffin və digər ermənipərəst konqresmenlərin Azərbaycanın işğal olunmuş ərazilərində təşkil edilmiş qondarma rejimin nümayəndəsinə “təbrik məktubu” göndərmələrini də unutmadıq. Hüquq təhsili almış A.Şiff gözəl bilir ki, Ermənistan beynəlxalq hüququn əsas prinsiplərinə, BMT Təhlükəsizlik Şurasının və digər beynəlxalq təşkilatların qərarlarına zidd olaraq Azərbaycanın Dağlıq Qarabağ bölgəsinin və ona bitişik yeddi rayonun 30 il işğal altında saxlamışdı. Halbuki, A.Şiff kimilər insanların hüquqlarına, ümumbəşəri dəyərlərə və qanunun aliliyinə sadiq olduqlarını sübut etmək üçün Ermənistanı qanunsuz əməllərdən çəkindirməyə, işğal olunmuş ərazilərdən çəkilməyə və konstruktiv şəkildə sülh danışıqlarını davam etdirməyə çağıra bilərdilər. Lakin ötən müddət ərzində A.Şiff kimi ermənipərəst konqresmenlər beynəlxalq hüququn yox, işğalçı Ermənistanın qanunsuzluğuna bəraət qazandırmışdılar. A.Şiff kimi erməni lobbisinin müştəriləri bu bədnam siyasəti dəyişmir, əksinə, Ermənistanın postmüharibə dövründə sərgilədiyi qeyri-konstruktiv mövqeyi dəstəkləyirlər.
Fevralın 8-də ABŞ Prezidenti Co Baydenin Konqresin hər iki palatasına illik müraciəti zamanı Konqresdəki erməni lobbisinin veteranı Adam Şiff Ağ Ev sahibinin nitqini dinləmək üçün “DQR-in ABŞ-dakı daimi nümayəndəsi” Avetisyanı dəvət etmişdi. A.Şiff düşünürdü ki, Co Bayden və Dövlət Departamenti, eləcə də “ABŞ-dakı və dünyadakı erməni diasporunun nümayəndələri Avetisyanın qanunverici orqandakı varlığını Konqresin sülh tərəfdarı olmağı heç vaxt dayandırmayacağına dair güclü bir siqnal” kimi qiymətləndirəcəklər. Təbii ki, ermənipərəst konqresmenin “bu siqnalı” zalın divarlarından kənara çıxmadı. Axı, qanundankənar “diplomat”ın Konqresdə olmasını necə “siqnal” kimi qəbul etmək olar?! Beynəlxalq hüquqa açıq-aşkar hörmətsizlik nümayiş etdirən amerikalı qanunverici A.Şiffi öz ərazi bütövlüyünü bərpa edən və postmüharibə dövrünün sülh gündəliyini dəstəkləyən Azərbaycana qarşı sanksiya tətbiq etməyə çağırır.
Təbii ki, Prezident Co Bayden Administrasiyası öncə ABŞ-ın maraqlarını gözləyir. Ağ Ev də gözəl anlayır ki, beynəlxalq təhlükəsizliyin və enerji təhlükəsizliyinin təmin olunması məsələsində Azərbaycanı Ermənistan ilə eyni tərəziyə qoymaq olmaz. Azərbaycanın geosiyasi və geoiqtisadi ağırlığı çox böyükdür. Bu günlərdə ABŞ Dövlət katibi Antoni Blinkenin Yunanıstan səfəri çərçivəsində Azərbaycanın əhəmiyyətindən danışması bunu təsdiqləyir. Belə ki, Afinada yunan həmkarı ilə keçirdiyi mətbuat konfransında dövlət katibi bildirib ki, Yunanıstan–Bolqarıstan qaz kəmərinin işə düşməsi nəticəsində əvvəllər Rusiya qazından asılı olan Sofiya öz tələbatını tam şəkildə Azərbaycandan gələn tədarüklər hesabına ödəyə biləcək: “Yunanıstan ilə yeni qurulmuş interkonnektor Bolqarıstana bu mənbədən imtina etməyə imkan verir. Nəticədə gələn il ölkə istehlak etdiyi qazın 100 faizini Azərbaycan və ABŞ-dan idxal edəcək”.
Qeyd edək ki, Yunanıstan–Bolqarıstan qaz interkonnektoru 2022-ci il oktyabrın 1-də istifadəyə verilib. Açılış mərasimində çıxış edən Azərbaycan Prezidenti İlham Əliyev bu layihəni “tarixi” adlandırmış və əlavə etmişdi ki, Yunanıstan–Bolqarıstan interkonnektoru Avropanın enerji təhlükəsizliyinin möhkəmləndirilməsində və qaz təchizatının şaxələndirilməsində mühüm rol oynayacaq: “Avropanın enerji xəritəsini dəyişmiş Cənub Qaz Dəhlizi qitə üzrə ən böyük infrastruktur layihələrindən biridir. Azərbaycan Cənub Qaz Dəhlizini başlayan tərəf olmaqdan qürur hissi duyur. Cənub Qaz Dəhlizi qazı istehlakçılara yeni marşrutla, o cümlədən, yeni mənbədən nəql edir. Bu vaxta qədər yeganə mənbə Xəzərin Azərbaycan sektorunda yerləşən “Şahdəniz” qaz yatağı olmuşdur. Lakin Azərbaycanın bir neçə digər qaz yatağında hasilat bu yaxınlarda başlayacaq və təchizat həcmlərinin artırılmasına töhfə verəcəkdir”
Göründüyü kimi, ABŞ hökuməti milli maraqlarından çıxış edərək, Azərbaycanın Qərbin enerji təhlükəsizliyinə verdiyi töhfəni yüksək qiymətləndirir. Bu ilin yanvarında Nümayəndələr Palatasının kəşfiyyat komitəsindən uzaqlaşdırılan qatı ermənipərəst A.Şiffin çağırışları da yalnız seçkilərdə həmişə dəstək gördüyü erməni lobbisini razı salmağa yarayır.
S.ELAY, “Xalq qəzeti”