Havanın soyuq və şaxtalı olmasına baxmayaraq, Azərbaycanın Qarabağ iqtisadi rayonunda qızıl–mis yataqlarının qanunsuz istismarına qarşı Laçın–Xankəndi yolunda keçirilən etiraz aksiyası davam edir, dinc etirazçılar aksiyanın keçirildiyi ilk gündən etibarən dünya ictimaiyyətini ekologiyanı qorumağa çağırırlar.
Azərbaycan həqiqətləri dünya ictimaiyyətinin diqqətinə çatdırılmaqda davam edir. Portuqaliyanın paytaxtı Lissabonda KAICIID Beynəlxalq Dinlərarası və Mədəniyyətlərarası Dialoq Mərkəzinin Direktorlar Şurasının 28-ci sessiyasında Şeyxülislam Allahşükür Paşazadə məruzə ilə çıxış edib. O, Laçın yolu ilə bağlı ölkəmizə qarşı səsləndirilən ittihamların yalan və iftira olduğunu vurğulayıb və iştirakçıların nəzərinə həqiqətləri çatdırıb.
Xarici mətbuatda Azərbaycan Prezidenti cənab İlham Əliyevin Münxen Təhlükəsizlik Konfransı çərçivəsində “Dağları aşmaq? Cənubi Qafqazda təhlükəsizliyin qurulması” mövzusunda keçirilən plenar iclasda suallara verdiyi cavablar diqqət mərkəzindədir. Qeyd olunur ki, dövlətimizin başçısı Qarabağdakı erməni azlığın hüquqları və təhlükəsizliyi ilə bağlı müzakirələrin aparılmasına razıdır. Lakin bu müzakirələri erməni icmasının Qarabağda doğulmuş və bütün ömrü boyu orada yaşamış nümayəndələri ilə, Qarabağda rəhbər mövqe tutmaq üçün Rusiyadan “gizli yolla keçirilmiş” şəxslə yox. Bildirilir ki, Azərbaycan PrezidentiLaçın–Xankəndi yolunun blokada olmadığını bəyan edir: “Dekabrın 12-dən bizim vətəndaş cəmiyyəti fəallarımız keçid məntəqəsinə gələndən indiyədək 2500-dən çox nəqliyyat vasitəsi, o cümlədən Rusiya sülhməramlılarının və Qırmızı Xaçın təmsilçilərinin yük avtomobilləri keçib. Qarabağdan, demək olar ki, 100 pasiyent müalicə üçün Qırmızı Xaç tərəfindən Ermənistana aparılıb. Beləliklə, yol açıq olduğu halda biz bunu necə blokada adlandıra bilərik?!”.
Beynəlxalq münasibətlər üzrə analitik Masil Dəmirov qəzetimizə açıqlamasında bildirdi ki, cənab İlham Əliyev ekoaksiya ilə bağlı mühüm mesajları ilə dünya ictimaiyyətinin diqqətini əsl həqiqətlərə yönəltdi. Sözügedən plenar iclas zamanı bildirib ki, Qarabağdakı erməni icmasının nümayəndələri ilə praktiki təmaslara başlamağa hazırıq: “Prezidentimiz qeyd etdi ki, mütləq şəkildə Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs – Ruben Vardanyan bizim ərazimizi tərk etsin. Çünki xüsusi gündəliklə göndərilmiş bu adam ərazilərimizi tərk etməyənə qədər danışıqlar ləngiyəcək”.
Analitik bildirdi ki, dövlət başçımız iclasda işlədilən “Dağlıq Qarabağ” ifadəsinə sərt reaksiya verərək xatırladıb ki, “Dağlıq Qarabağ” sözü artıq qüvvədən düşüb, Azərbaycanda “Dağlıq Qarabağ” adlı inzibati ərazi vahidi yoxdur.
M.Dəmirov qeyd etdi ki, Ermənistanın baş naziri Nikol Paşinyan isə iclasda həyasızcasına Laçın yolunun bağlı olduğunu, Qarabağın ermənilər yaşayan ərazilərində humanitar, eləcə də enerji və qaz böhranının baş verdiyini bildirib. Lakin faktiki olaraq yol açıqdır, buna şüb-hə ilə yanaşmaq olmaz.
***
Dinc aksiyanın təşkil olunduğu ərazidən Rusiya sülhməramlılarına və Beynəlxalq Qırmızı Xaç Komitəsinə məxsus avtomobillərin sərbəst keçidinə şərait yaradılıb. Dünən, ümumilikdə, 70-ə yaxın humanitar yük daşıyan avtomobil yoldan keçib. Avtomobillərin içərisində erməniəsilli şəxslər ilə yanaşı, uşaq bezləri və qidalar da Xankəndiyə aparılıb. Bu, bir daha onu göstərir ki, aksiyanın təşkil olunduğu ərazi humanitar məqsədli maşınların keçidi üçün tam açıqdır.
Rizvan FİKRƏTOĞLU, “Xalq qəzeti”