20 Yanvar faciəsinin qurbanları xaricdə də ehtiramla yad edildi
Hər il olduğu kimi, bu il də 20 Yanvar faciəsinin ildönümü ilə bağlı xarici ölkələrdə çoxsaylı tədbirlər keçirilib.
Çin
“XQ”nin məlumatına görə, Azərbaycanın Çindəki səfirliyində keçirilən anım mərasimində bu ölkədə yaşayan soydaşlarımız iştirak ediblər. Səfir Bünyad Hüseynov faciənin səbəbləri və o zaman hökm sürən ictimai-siyasi vəziyyətlə bağlı geniş məlumat verərək bildirib ki, dövlətin öz əliyalın vətəndaşlarının üzərinə ağır zirehli hərbi texnika göndərməsi, dinc əhalinin gülləbaran edilməsi misli görünməmiş qanlı cinayət idi. SSRİ rəhbərliyi qətliamı gizlətməyə çalışsa da, Heydər Əliyevin qətiyyəti nəticəsində faciə dünya ictimaiyyətinin diqqətinə olduğu kimi çatdırılıb, ona hüquqi-siyasi qiymət verilib. Diplomat vurğulayıb ki, 20 Yanvar hadisələri Azərbaycan tarixində böyük rəmzi məna daşıyan şanlı səhifələrdən biridir. Həmin hadisələr zamanı onlarla mülki şəxsin öldürülməsi, yaralanması və həbs olunması xalqımızı qorxutmayıb, əksinə, daha sıx birləşdirib.
Rusiya
Azərbaycanın Rusiyadakı səfirliyində keçirilən toplantı səfir Polad Bülbüloğlu və səfirlik əməkdaşlarının diplomatik nümayəndəliyin girişində faciə qurbanlarına həsr olunan bannerin qarşısına gül qoymaları ilə başlayıb.
Bildirilib ki, ulu öndər 1990-cı il yanvarın 21-də Azərbaycanın Moskvadakı daimi nümayəndəliyinin binasına gələrək burada mətbuat konfransı keçirib, törədilən cinayətləri kəskin şəkildə pisləyib, onları dinc əhaliyə qarşı terror adlandıraraq, siyasi-hüquqi qiymət verilməsini və səbəbkarların cəzalandırılmasını tələb edib, bununla da Azərbaycan xalqı ilə həmrəyliyini nümayiş etdirib.
P.Bülbüloğlu çıxışında həmin qanlı günlərdə baş verənləri ətraflı təsvir edib, eləcə də öz xatirələrini bölüşüb.
***
Sankt-Peterburqda keçirilən tədbir “Sankt-Peterburq və Leninqrad vilayətinin Azərbaycan Milli-Mədəni Muxtariyyəti” ictimai təşkilatı və şəhərdəki baş konsulluğumuz tərəfindən birgə təşkil edilib.
Baş konsul Sultan Qasımov çıxış edərək, o qanlı gecədə baş verən hadisələrdən danışıb.
Fransa
Azərbaycanın Fransadakı səfirliyi və UNESCO yanında daimi nümayəndəliyin birgə təşkilatçılığı ilə Parisdə 20 Yanvar şəhidlərinin xatirəsi ehtiramla anılıb.
Səfir Leyla Abdullayeva, daimi nümayəndə Elman Abdullayev, Fransadakı diplomatlarımız Sen-Klu qəbiristanlığına gələrək, Azərbaycan Xalq Cümhuriyyəti hökumətinin Versal sülh konfransında iştirak etmiş nümayəndə heyətinin rəhbəri Əlimərdan bəy Topçubaşovun, nümayəndə heyətinin üzvü Ceyhun Hacıbəyovun məzarlarını ziyarət edib və əklil qoyublar.
Sonra Azərbaycan xalqının milli azadlıq və ərazi bütövlüyü uğrunda mübarizəsindən danışılıb. 20 Yanvarın yaddaşlara həm hüzn və qürur, həm də milli azadlığın oyanış günü kimi həkk olunduğu vurğulanıb. Bildirilib ki, 44 günlük Vətən müharibəsi nəticəsində torpaqlarımız işğaldan azad edilib, Azərbaycanın ərazi bütövlüyü və dövlət suverenliyi tam bərpa olunub. 20 Yanvar, eləcə də Qarabağ müharibəsi şəhidlərinin qisası alınıb.
***
Ölkəmizin Avropa Şurası yanında daimi nümayəndəliyində Strasburqda yaşayan Azərbaycan icması üzvlərinin iştirakı ilə baş tutan tədbirdə şəhidlərin xatirəsi bir dəqiqəlik sükutla yad edilib.
Daimi nümayəndə Fəxrəddin İsmayılov yanvarın 19-dan 20-nə keçən gecə baş vermiş hadisələrin ölkəmizin müstəqillik mübarizəsindəki rolundan bəhs edib, həmin hadisələrin xalqımızın yenilməz iradəsinin rəmzinə çevrildiyini söyləyib. O qeyd edib ki, üstündən uzun illər keçməsinə baxmayaraq, sovet qoşunlarının Azərbaycanda törətdiyi qırğının ağrı-acısı unudulmayıb və şəhidlərin xatirəsinin qəlblərdə əbədi yaşayır.
Azərbaycan icmasının üzvü Mustafa Alınca 20 Yanvar hadisələrindən sonra Strasburqda Azərbaycanın haqq səsinin beynəlxalq ictimaiyyətin diqqətinə çatdırılması məqsədilə aparılan fəaliyyətlərdən danışıb, məhz bu faciənin azərbaycanlıların təşkilatlanmasını zərurətə çevirdiyini deyib.
İsveçrə
Azərbaycanın BMT-nin Cenevrə bölməsi və digər beynəlxalq təşkilatlar yanında daimi nümayəndəliyi 20 Yanvar şəhidlərinin xatirəsinə ehsan verib.
Mərasim Cenevrə İslam Mədəniyyəti Fondu nəzdində fəaliyyət göstərən məsciddə şəhərdə məskunlaşan qaçqın, yoxsul və ehtiyacı olanlar üçün təşkil edilib. Daimi nümayəndəlik əməkdaşları tərəfindən məscid ziyarətçilərinə qanlı Yanvar hadisələri barədə ətraflı məlumat verilib, hadisə qurbanlarının ruhuna dualar oxunub.
İsrail
İsrailin Yerusəlim və Afula şəhərlərində də anım tədbirləri keçirilib. “Azİz” İsrail-Azərbaycan Beynəl-xalq Assosiasiyasının Yerusəlimdəki şöbəsinin təşkilatçılığı ilə baş tutan tədbirdə qurumun rəhbəri Aleksandr Aqranovski həmin məşum gecədə baş verənlərdən danışıb.
Assosiasiyanın vitse-prezidenti, Azərbaycan Mədəniyyət Mərkəzinin direktoru Yeganə Salman diqqətə çatdırıb ki, Azərbaycanı təmsil edən soydaşlarımız harada yaşamalarından asılı olmayaraq, onlar da sovet silahlı qüvvələrinin aralarında uşaqların, qadınların və qocaların olduğu günahsız sakinlərə qarşı törətdiyi qanlı qırğını unutmurlar. Həmin günlərdə müxtəlif millətlərdən olan vətəndaşların, o cümlədən yəhudi əsilli azərbaycanlılar Yan Meeroviç, Aleksandr Marxevka və Vera Bessantinanın da şəhid olduqları vurğulanıb.
Sonra Diasporla İş üzrə Dövlət Komitəsinin təqdim etdiyi “Qanlı qərənfillər” sənədli filmi nümayiş etdirilib. Azərbaycan Mədəniyyət Mərkəzinin təşkilatçılığı ilə Afulanın mərkəzi kitabxanasında keçirilən anım tədbirində də bu film nümayiş etdirilib. Müxtəlif millətlərin nümayəndələrinin qatıldıqları tədbirdə Azərbaycan tarixinin ən kədərli səhifələrindən olan 20 Yanvar faciəsi barədə məlumat verilib, hadisə şahidlərinin xatirələri səsləndirilib.
Almaniya
Azərbaycanın Almaniyadakı səfirliyində keçirilən toplantıda səfir Nəsimi Ağayev qanlı Yanvar faciəsinin Azərbaycan xalqının əzmini qıra bilmədiyini, əksinə onun azadlıq uğrunda mübarizəsini daha da alovlandıraraq respublikada sovet hakimiyyətinə son verdiyini və 1991-ci ilin oktyabrında Azərbaycanın dövlət müstəqilliyini bərpa etdiyini vurğulayıb.
Azərbaycan–Almaniya Forumunun icraçı direktoru Pərviz Yazdani çıxışında 20 Yanvar faciəsinin Azərbaycan xalqının milli özünüdərk prosesindəki rolundan danışıb. Almaniyanın yenidən birləşməsi və Azərbaycanın SSRİ-dən ayrılaraq öz müstəqilliyini bərpa etməsi arasında müqayisə aparan Yazdani 20 Yanvar faciəsinin Azərbaycan xalqının tarixi yaddaşına əbədi həkk olunduğunu bildirib.
Tədbir Berlində fəaliyyət göstərən azərbaycanlı pianoçu Fidan Ağayeva-Edlerin ifası ilə davam edib. Anım tədbiri çərçivəsində, həmçinin faciə ilə bağlı fotosərgi təşkil olunub.
Qətər
Qətərdəki səfirliyimizdə keçirilən mərasimdə Azərbaycan icmasının nümayəndələri və səfirliyin əməkdaşları iştirak ediblər.
Faciənin baş verdiyi dövrə nəzər salan səfir Mahir Əliyev o günlərin gərgin ictimai-siyasi hadisələrindən, Ermənistanın Azərbaycana qarşı əsassız ərazi iddialarından söz açıb, faciəni törədənlərin məqsədinin Azərbaycan xalqının iradəsini qırmaq, azadlıq eşqini məhv etmək istəyi olduğunu vurğulayıb.
20 Yanvar faciəsinin 34-cü ildönümü ilə əlaqədar Azərbaycan Xarici İşlər Nazirliyinin yaydığı bəyanat Qətər XİN-ə və ölkədə akkreditə olunmuş xarici ölkələrin diplomatik nümayəndəliklərinə göndərilib. Tədbirin sonunda şəhidlərin xatirəsinə ehsan süfrəsi açılıb.
Gürcüstan
Gürcüstanın Saqareco rayonunun Qaraçöp kəndində (Yor-Muğanlı) 20 Yanvar və 9 Aprel şəhidlərinin xatirəsi yad olunub.
Səfirlik əməkdaşları, Saqareco rayonunun meri Aftandil Qulikaşvili, ictimaiyyət nümayəndələri, 20 Yanvar şəhidi Ələsgər Qayıbovun yaxınları, məktəblilər Qaraçöp kəndindəki “Şəhidlik” memorialı önünə əklil qoyub, gül dəstələri düzüblər.
Səfir Faiq Quliyev Azərbaycan və gürcü xalqlarının müstəqillik uğrundakı mübarizəsindən, sovet imperiya qüvvələrinin xalqlarımızın mübarizə əzmini qırmaq üçün törətdiyi dəhşətli cinayətlərdən, vəhşiliklərdən söz açıb. Bildirib ki, imperiya qüvvələri 1989-cu il aprelin 9-da Gürcüstanda və 1990-cı il yanvarın 20-də Azərbaycanda qırğınlar törətsə də, heç nəyə nail ola bilməyiblər. Xalqlarımız şəhidlərin qanı bahasına suverenliyini bərpa edib, müstəqil dövlət qurublar. Diplomat bildirib ki, 20 Yanvar faciəsi zamanı 6 Gürcüstan azərbaycanlısı şəhid olub. Onlardan biri də Qaraçöp kənd sakini Ələsgər Yusif oğlu Qayıbovdur. Azərbaycan və gürcü xalqları öz qəhrəmanlarını heç zaman unutmayacaqlar, onların əziz xatirəsi daim qəlbimizdə yaşayacaq.
Mer Aftandil Qulikaşvili bildirib ki, qəhrəman övladlarımızın qanı-canı bahasına qazanılan müstəqillik heç zaman süquta uğramayacaq. Sonra səfirliyin əməkdaşları və kənd ağsaqqalları şəhidin doğulduğu evdə olub, ailə üzvləri və yaxınları ilə görüşüblər.
Səudiyyə Ərəbistanı
Azərbaycanın Səudiyyə Ərəbistanındakı səfirliyində keçirilən anım tədbirinə səfirliyin akkreditə olunduğu Bəhreyn və Omanda yaşayan həmvətənlərimiz də virtual formatda qoşulublar.
Səfir Şahin Abdullayev 20 Yanvar faciəsi barədə danışıb. Baş verənləri dəhşətli cinayət adlandırıb. Daha sonra həmvətənlərimiz faciə ilə bağlı ürək sözlərini bölüşüblər. Səudiyyə Ərəbistanında yaşayan həmvətənlərimiz Mətanət Süleymanova (Duyğulu) və Nigar Xəlilova 20 Yanvar faciəsinə həsr etdikləri şeirləri oxuyublar. Tədbirdə Omanda yaşayan azərbaycanlı musiqiçi Emilya Mütəllibzadənin 20 Yanvar faciəsinə həsr etdiyi videoçarx nümayiş etdirilib.
ABŞ
Azərbaycanın Los Ancelesdəki Baş Konsulluğunda “1990-cı ilin Qara Yanvarı: Azərbaycanın azadlığa gedən yolu“ adlı anım mərasimi düzənlənib.
Mərasimdə Los Ancelesdə fəaliyyət göstərən xarici ölkələrin baş konsulları, şəhərdəki konsulluq korpusunun nümayəndələri, elm və mədəniyyət xadimləri, dost icmaların rəhbərləri və icma üzvləri, yerli universitetlərin professorları, Azərbaycan icmasının üzvləri və digərləri iştirak ediblər.
Baş konsul Ramil Qurbanov çıxış edərək, qanlı 20 Yanvar hadisələri barədə məlumat verib. Çıxışın ardınca faciə ilə bağlı Baş Konsulluq tərəfindən hazırlanmış qısa film nümayiş olunub.
Daha sonra Bakıda doğulan məşhur violonçel ifaçısı Ruslan Biryukov çıxış edərək, Qara Yanvar faciəsi, həmin dövrdə Bakıda yaşayan ailəsi ilə birgə şahid olduğu hadisələr və baş verənlər barədə acı xatirələrini bölüşüb.
Tədbirin davamında Ruslan Biryukov və pianoçu Valeriya Morqovskayanın ifasında Fikrət Əmirovun “Poema monoloq”, Qabriel Furenin “Yuxudan sonra” və Arif Məlikovun “Məhəbbət əfsanəsi” əsərləri səsləndirilib.
Çex Respublikası
Ümumxalq Hüzn Günü ilə bağlı Çex Respublikasındakı səfirliyimizdə keçirilən tədbirdə çıxış edən səfir Adış Məmmədov müstəqilliyini bərpa etdikdən sonra Azərbaycanın keçdiyi yol, əldə etdiyi iqtisadi yüksəliş, xalqımızın qəhrəmanlıq salnaməsində yeni parlaq səhifə olan 44 günlük Vətən müharibəsi və postmünaqişə mərhələsində həyata keçirilən işlər barədə iştirakçıları məlumatlandırıb.
Müstəqilliyimizin qorunması və torpaqlarımızın işğaldan azad olunması uğrunda xalqımızın apardığı müqəddəs mübarizənin kökündə 20 Yanvar ruhunun dayandığını deyən səfir bu ruhun həmişə yaşayacağına əminliyini ifadə edib. Tədbir çərçivəsində Qanlı Yanvar hadisələrini əks etdirən videoçarx nümayiş olunub və fikir mübadiləsi aparılıb.
İtaliya
İtaliyadakı səfirliyimizdə keçirilən anım tədbirində bildirilib ki, ötən əsrin sonlarında Azərbaycan xalqının başladığı azadlıq, müstəqillik, dövlət-çilik mübarizəsi çətin, lakin şərəfli yol keçərək bu gün daha əzmlə davam etməkdədir.
Bu mübarizənin yaxın keçmişimizdəki ən şanlı səhifələrindən biri də 1990-cı ilin 20 Yanvar hadisələridir. Dövlətimizə qarşı daim xain planlar hazırlayan qüvvələr 1990-cı ildə xalqımızın misli görünməmiş həmrəyliyi və birliyi nəticəsində böyük uğursuzluğa düçar oldular. Həmin düşmənlərə qarşı ikinci belə cavabı xalqımız məhz 44 günlük Vətən müharibəsində bir daha verdi.
Rumıniya
Buxarest şəhərinin “Tey” parkında yerləşən ulu öndər Heydər Əliyevin büstü önünə Rumıniya–Azərbaycan Dostluq Cəmiyyətinin, “SOCAR Petroleum SA” şirkətinin nümayəndələri, səfirliyin əməkdaşları gül dəstələri düzüblər.
Səfir Qüdsi Osmanov çıxış edərək 20 Yanvar hadisələrini Azərbaycanın suverenliyi, müstəqilliyi və ərazi bütövlüyü uğrunda mübarizənin dönüş nöqtəsi adlandırıb, bu hadisələrinin xalqımızın tarixində faciə ilə yanaşı qəhrəmanlıq ehtiva etdiyini söyləyib.
Niderland
Haaqada Azərbaycan-Türk Mədəniyyət Dərnəyinin keçirdiyi tədbiri dərnəyin rəhbəri Tuğrahan Aşkın açıb və faciə haqqında məlumat verib. Sonra “Ondört Masumlar” məscidinin İmamı Şeyx Mehmet Olqun şəhidlərin ruhuna dualar oxuyub.
Niderland Azərbaycan-Türk Mədəniyyət Dərnəyinin rəhbəri İlhan Aşkın, eləcə də Azərbaycanın Niderland Krallığındakı səfirliyinin birinci katibi Səbinə Sadıqlı tədbir iştirakçılarına 20 Yanvar faciəsinin ölkəmizin tarixindəki rolundan danışıb, onun müstəqilliyimizin bərpası yolunun başlanğıcı olduğunu bildiriblər. Eyni zamanda vurğulanıb ki, Vətən müharibəsində ərazi bütövlüyünü bərpa edən Azərbaycan bu gün bölgədə sülh gündəliyi həyata keçirir.
***
Ümümxalq Hüzn Günü ilə bağlı ölkəmizin Belarusdakı, Özbəkistandakı, Xorvatiyadakı, Macarıstandakı, Latviyadakı səfirliklərində, Qazaxıstanın Aktau şəhərindəki Baş Konsulluğunda da anım mərasimləri keçirilib.
Litvanın Veyseyay şəhərindəki Mədəniyyət evində “Azərbaycan və Litva müstəqillik yolunda: 1990-cı və 1991-ci illərdə Bakıda və Vilnüsdə Yanvar hadisələri” adlı fotosərgi təşkil olunub.
Bundan əlavə, anım günü ilə əlaqədar İordaniya, Misir, Bəhreyn, Malayziya, İsveç və Litvanın media orqanlarında yazılar dərc olunub.
Britaniya
20 Yanvar faciəsinin ildönümü ilə əlaqədar Britaniya Parlamentinin Nümayəndələr Palatasında ilkin qanunvericilik təşəbbüsü irəli sürülüb.
Qanunvericilik təşəbbüsündə 1990-cı il yanvarın 20-də sovet qoşunlarının Bakıya yeridilməsi nəticəsində 150-yə yaxın mülki şəxsin həlak olduğu qeyd edilib. Parlamentdə Azərbaycanla dostluq qrupunun sədri Bob Bləkmən tərəfindən irəli sürülmüş bu təşəbbüsdə 20 Yanvar hadisələrini yad etməklə bağlı bütün parlamentarilərə çağırış ünvanlanıb.
Səxavət HƏMİD
XQ