Estoniya parlamentinin (Riigikogu) Estoniya-Azərbaycan parlamentlərarası dostluq qrupu Xocalı soyqırımının 31-ci ildönümü ilə bağlı bəyanat yayıb.
Ölkəmizin Estoniyadakı səfirliyindən AZƏRTAC-a bildirilib ki, bəyanatda Estoniya-Azərbaycan Parlament Qrupu tərəfindən Xocalı soyqırımının 31-ci ildönümü ilə əlaqədar Azərbaycan xalqına dərin hüznlə başsağlığı verilib.
Bəyanatda deyilir: “Biz 1992-ci il fevralın 25-dən 26-na keçən gecə 600-dən çox günahsız dinc sakinin, o cümlədən çoxlu uşaq, qadın və yaşlının qətlə yetirildiyi Xocalı qətliamını qətiyyətlə pisləyirik. Bu kütləvi qətlin səbəbkarları ədalət qarşısında cavab verməlidirlər.
Inanırıq ki, regionun bütün ölkələrinin suverenliyi və ərazi bütövlüyü, eləcə də beynəlxalq səviyyədə tanınmış sərhədlərinin toxunulmazlığı hüququ var. Biz Azərbaycan Respublikasının regionun yenidən qurulmasında göstərdiyi səylərini dəstəkləyir və müxtəlif icmaları davamlı sülh və inteqrasiyaya nail olmaq üçün sıx əməkdaşlıq etməyə çağırırıq”.
Bəyanat Estoniya-Azərbaycan parlamentlərarasi dostluq qrupunun sədri Sven Sester, sədr müavini Mixail Korb, qrupun üzvləri İqor Kravçenko, Aadu Must, Heljo Pikhof, Erki Savisaar, Aivar Soerd və Raivo Tamm tərəfindən imzalanıb.