№ 172 Bakı şəhəri, 19 mart 2024-cü il

“Sahibkarlıq sahəsində aparılan yox­lamaların tənzimlənməsi və sahibkarların maraqlarının müdafiəsi haqqında” Azər­baycan Respublikasının Qanununda dəyi­şiklik edilməsi barədə” Azərbaycan Respub­likasının 2023-cü il 9 iyun tarixli 903-VIQD nömrəli Qanununun icrası ilə əlaqədar Azərbaycan Respublikası Nazirlər Kabine­tinin bəzi qərarlarında dəyişiklik edilməsi haqqında

Azərbaycan Respublikası Konstitusiya­sının 119-cu maddəsinin səkkizinci abzasını rəhbər tutaraq, “Sahibkarlıq sahəsində apa­rılan yoxlamaların tənzimlənməsi və sahib­karların maraqlarının müdafiəsi haqqında” Azərbaycan Respublikasının Qanununda dəyişiklik edilməsi barədə” Azərbaycan Res­publikasının 2023-cü il 9 iyun tarixli 903-VIQD nömrəli Qanununun icrasını təmin et­mək məqsədilə Azərbaycan Respublikasının Nazirlər Kabineti qərara alır:

1. Azərbaycan Respublikası Nazirlər Ka­binetinin 2006-cı il 8 may tarixli 120 nöm­rəli Qərarı (Azərbaycan Respublikasının Qa­nunvericilik Toplusu, 2006, № 5, maddə 464 (Cild I) ilə təsdiq edilmiş “Mülki dövriyyəsi məhdudlaşdırılmış əşyaların dövriyyəsinə və onun şərtlərinin gözlənilməsinə nəzarət Qay­daları”nda aşağıdakı dəyişikliklər edilsin:

1.1. II hissə üzrə:

1.1.1. 2.3-1-ci bəndin ikinci cümləsində “risk qiymətləndirilməsi” sözləri “risklərin idarə olunması” sözləri ilə əvəz edilsin;

1.1.2. 2.6-cı bəndin ikinci cümləsinə “xü­susi icazə sahibinə dair məlumatlar” sözlərin­dən sonra “(sahibkarlara münasibətdə yoxla­nılması nəzərdə tutulan yoxlama obyektinə dair məlumatlar (adı, ünvanı, təsviri və s.)” sözləri əlavə edilsin;

1.1.3. 2.7-ci bəndə (birinci halda) “xüsusi icazənin sahibinə” sözlərindən əvvəl “sahib­kar olmayan” sözləri əlavə edilsin və həmin bənddən “sahibkarlıq subyekti olan xüsusi icazənin sahibinə, həmçinin yoxlamanın sa­hibkarlıq sahəsində aparılan yoxlamaların vahid məlumat reyestrində qeydiyyata alın­ması barədə çıxarışı” sözləri çıxarılsın;

1.1.4. aşağıdakı məzmunda 2.7-1-ci bənd əlavə edilsin:

“2.7-1. Səlahiyyətli dövlət orqanlarının vəzifəli şəxsi (şəxsləri) xüsusi icazənin sahi­bi olan sahibkara və ya onun səlahiyyətli nü­mayəndəsinə öz xidməti vəsiqəsini (şəxsiyyət vəsiqəsi ilə birlikdə), yoxlamanın aparılması haqqında qərarın surətini və yoxlamanın sa­hibkarlıq sahəsində aparılan yoxlamaların vahid məlumat reyestrində qeydiyyata alın­ması barədə çıxarışı təqdim etməlidir.”;

1.1.5. 2.8-ci bəndin birinci abzasına aşa­ğıdakı məzmunda ikinci cümlə əlavə edilsin:

“Xüsusi icazə sahibləri olan sahibkarlar barəsində yoxlamanın aparılması zamanı yoxlama tədbirlərini həyata keçirən müvafiq dövlət orqanlarının vəzifəli şəxsləri “Sahib­karlıq sahəsində aparılan yoxlamaların tən­zimlənməsi və sahibkarların maraqlarının müdafiəsi haqqında” Azərbaycan Respubli­kası Qanununun 4-2.2-ci maddəsində nəzər­də tutulan qadağalara riayət etməlidirlər.”;

1.1.6. aşağıdakı məzmunda 2.9-1-ci bənd əlavə edilsin:

“2.9-1. Xüsusi icazə sahibləri olan sa­hibkarlar barəsində yoxlamanın aparılması zamanı yoxlama tədbirlərini həyata keçirən müvafiq dövlət orqanlarının vəzifəli şəxsləri və sahibkarlar “Sahibkarlıq sahəsində apa­rılan yoxlamaların tənzimlənməsi və sahib­karların maraqlarının müdafiəsi haqqında” Azərbaycan Respublikasının Qanununda nəzərdə tutulmuş hüquqları həyata keçirir və vəzifələri yerinə yetirirlər.”;

1.2. III hissənin mətnində “Azərbay­can Respublikasının qanunvericiliyi ilə” söz­ləri “qanunla” sözü ilə əvəz edilsin. 

2. Azərbaycan Respublikası Nazirlər Ka­binetinin 2017-ci il 6 dekabr tarixli 542 nöm­rəli Qərarı (Azərbaycan Respublikasının Qa­nunvericilik Toplusu, 2017, № 12 (II kitab), maddə 2490 (Cild I); Azərbaycan Respubli­kası Nazirlər Kabinetinin 2024-cü il 13 fevral tarixli 86 nömrəli Qərarı) ilə təsdiq edilmiş “Yoxlama və digər nəzarət tədbirləri çərçi­vəsində yoxlayıcı orqanlar tərəfindən fiziki və hüquqi şəxslərdən malların (məhsulların) götürülməsi, daşınması, saxlanması, zərərsiz­ləşdirilməsi və ya məhv edilməsi Qaydası”n­da aşağıdakı dəyişikliklər edilsin:

2.1. 4.4-cü bəndin üçüncü cümləsində “sifarişli poçt vasitəsi ilə mal sahibinin ünva­nına” sözləri “sifarişli poçt göndərişi vasitə­silə mal sahibinin qeydiyyat ünvanına, mal sahibi tərəfindən elektron poçt və ya digər poçt ünvanı təqdim edildikdə isə həmin ün­vana” sözləri ilə əvəz edilsin;

2.2. 6.1-ci bənd aşağıdakı redaksiyada verilsin:

“6.1. Malların tədqiqi (sınağı) barədə qə­rara əsasən götürülən məhsul nümunələrinin dəyərinin ödənilməsi, onların saxlanılması, tədqiq (sınaq) edilən parametrlərin dəyiş­məz saxlanılması, daşınması, tədqiqi, alınmış nəticələr barədə məlumat verilməsi, məh­sulun daha sonrakı satışı və ya utilizasiyası ilə əlaqədar yaranan xərclər yoxlayıcı orqan tərəfindən ödənilir.”;

2.3. 6.7-ci bəndə “mal sahibinə” sözlərin­dən sonra “və ya onun səlahiyyətli nümayən­dəsinə” sözləri, “sifarişli poçt vasitəsilə” söz­lərindən sonra isə “mal sahibinin qeydiyyat ünvanına, mal sahibi tərəfindən elektron poçt və ya digər poçt ünvanı təqdim edildikdə isə həmin ünvana” sözləri əlavə edilsin.

Əli ƏSƏDOV,
Azərbaycan Respublikasının Baş naziri