Xəbər verdiyimiz kimi, “XalqTv”nin informasiya dəstəyi ilə gerçəkləşən “Ulduzlu görüşlər” layihəsinin ilk görüşü Azərbaycan Dövlət Pedaqoji Universitetinin professor, tələbə, müəllim heyəti ilə keçirilmişdi. Növbəti görüş Azərbaycan Dövlət İqtisad Universitetinin nəzdində fəaliyyət göstərən Maliyyə-İqtisad Kollecində reallaşıb.
Görüşdə "Ulduz" jurnalının baş redaktoru, Əməkdar jurnalist, şair Qulu Ağsəs, baş redaktor müavini, yazıçı Təranə Vahid, şöbə redaktorları şair Dayandur Sevgin və Taleh Mansur, eləcə də Azərbaycan Yazıçılar Birliyinin mətbuat xidmətinin rəhbəri, şair Xəyal Rza iştirak ediblər.
Görüşdən öncə qonaqları təhsil ocağının direktoru Davud Davudov qəbul edib. Səmimi söhbətdən sonra kollecin akt zalında görüş başlanıb. Kollecin direktor müavini Murad Muradov 90 illik tarixi olan təhsil ocağı haqqında danışıb və qonaqları təqdim edib.
Jurnalın əçəkdaşları ədəbiyyat və həyat, ədəbi zövqün formalaşdırılması haqqında fikirlərini bölüşüb, tələbələrə öz tövsiyələrini verib, onları maraqlandıran sualları cavablandırıblar. Müəlliflərin yeni şeirlərinin səsləndirilməsi ilə görüşə əlavə rəng qatılıb. Səmimi ruhda keçən görüşün sonunda tələbələrə “Ulduz” jurnalının müxtəlif sayları hədiyyə edilib.
XQ
