Türkdilli region və dövlətləri birləşdirən yayım platformasının qurulması ilə bağlı ölkəmizdə iş planı hazırlanır. Prosesin sürətləndirilməsi məqsədilə mütəxəssislər araşdırmalara cəlb olunub. Bu barədə XQ-yə məlumat verən Mədəniyyət Nazirliyinin Media və Kommunikasiya şöbəsinin müdiri Aynur Kərimli bildirdi:

– Qeyd edilən platformasının yara­dılması ilə bağlı Mədəniyyət Nazirli­yində danışıqlar aparılıb. Müzakirələrdə “BBC-Maestro” layihəsinin strateji və biznes üzrə məsləhətçisi Nina Larıçeva və “ATA-Association of Turkic Animation” təşkilatının sədri Oktay Yusibov iştirak ediblər. Burada aylıq və ya illik abunə mo­delinə əsaslanan platformanın öz daxilində yerli və beynəlxalq məzmunları (dublyaj) əhatə etməsi məsələsinə toxunulub. Plat­formada tamaşaçılara yüksək keyfiyyətli, mədəni rezonans doğuran proqramların təqdim olunması da danışıqların mövzusu olub. 

Yerli kino sənayesinin inkişafı dublyaj infrastrukturunun dəstəklənməsini, yeni iş yerlərinin açılmasını və müasir rəqəmsal məkanda Azərbaycan dilinin dəstəklənmə­si üçün prioritet olan bu seqmentdə bizne­sin stimullaşdırılmasını nəzərdə tutur. Bu məqsədlər üçün “Yaradıcı Azərbaycan” proqramı çərçivəsində xüsusi tədbirlərin həyata keçirilməsi planlaşdırılır.

Nazirlik rəsmisi əlavə etdi ki, belə bir ehtiyac Azərbaycan Respublikası Prezi­dentinin müvafiq Fərmanı ilə təsdiq edil­miş "Azərbaycan Respublikasının Mədə­niyyət Nazirliyi haqqında Əsasnamə"yə və “Azərbaycan Respublikasının 2022–2026-cı illərdə sosial-iqtisadi inkişaf Strategiya­sı”nın Tədbirlər Planının müvafiq bəndin­də də əksini tapıb. Həmin müddəanın icrası üzrə mədəniyyət və yaradıcı sənayelər (MYS) sahəsində bazar iştirakçılarının fəaliyyətinin dəstəklənməsi, o cümlədən istehsalat bazasının təkmilləşdirilməsi və sahəvi klasterləşmənin təşviqi prioritet məsələdir.

Ceyhun ALIŞLI
XQ