Ölkəmizin hər yerində olduğu kimi, cənub mirvarisi Lənkəranın təhsil və mədəniyyət ocaqlarında da görkəmli Azərbaycan şairi və mütəfəkkiri Məhəmməd Füzulinin anadan olmasının 530 illiyi münasibətilə silsilə tədbirlər keçirilir. Lənkəran Dövlət Universiteti (LDU) və Astara Pedaqoji Kollecində təşkil olunan ədəbi-bədii gecələri tələbə-gənclər maraqla qarşılayıblar.
LDU-da Lənkəran – Astara Regional Mədəniyyət İdarəsi ilə birgə düzənlənən mərasimdə Füzulinin yaradıcılığını əks etdirən əl işlərindən ibarət rəsm sərgisinə baxış keçirilib, dahi söz ustasının əsərlərinə bəstələnmiş musiqilər, şairin yaradıcılığından seçmə nümunələr ifa olunub.
Astara kollecində isə ədəbi-bədii yubiley tədbiri “Könül mülkünün sultanı” adlandırılıb. Əvvəlcə dahi şairin poetik dünyasına həsr olunmuş video-çarx nümayiş etdirilib. Sonra təhsil ocağının direktoru, professor Kamran Kazımov Prezident İlham Əliyevin sərəncamı ilə qeyd olunan yubileyin önəmindən danışıb. Digər natiqlər gecənin təşkilinin gənclərin xalqımızın milli-mənəvi sərvətlərinə, klassik irsimizə olan marağını artıracağını bildiriblər.
Zəfər ORUCOĞLU,
Azərbaycan Jurnalistlər Birliyinin üzvü
