Milli Məclisin Mədəniyyət komitəsinin dəstəyi, “Regional Hüquqi və İqtisadi Maarifləndirmə” İctimai Birliyi və “Gözəl yaşam” Mərkəzinin təşkilatçılığı ilə “Hiton” oteldə “Sənət unutmur” sərgisi açılıb.
Mərasimdə qeyri-ənənəvi tətbiqi sənət növü – “Strinq art” ustası Minarə Mehdinin mərhum deputat Qənirə Paşayevanın istəyi ilə yaratdığı, Şuşada doğulmuş sənət xadimlərinin portretləri və digər əsərləri nümayiş etdirildi. Təqdimatın təşkilatçısı Arzu Bağırova ölkədə qeyri-hökumət təşkilatları üçün yaradılan şəraitdən söz açdı, rəhbərlik etdiyi ictimai birliyin vətəndaş cəmiyyətinin güclənməsinə töhfəsindən, bölgələrdə gördüyü işlərdən danışdı.
O, təşkilatın 6 il öncə məhz Qənirə Paşayevanın xeyir-duası ilə fəaliyyətə başladğını bildirdi. Qeyd etdi ki, Minarə Mehdi ilə ötən il Milli Məclisin Mədəniyyət komitəsində görüşmüşdük. Qənirə xanım ona belə bir ideya vermişdi ki, Qarabağın ünlü dahi şəxsiyyətlərini tabloya çəksin. Sənətdə fərqli yanaşma – yalnız mismar və saplarla bu rəsmləri hazırlamaq ağır zəhmət tələb edir. Qərara aldıq ki, bu sərgi keçirilməlidir. Həm Qənirə xanımın doğum gününə “Ruhu şad olsun!”– hədiyyəsi kimi, həm də onun Minarə xanıma verdiyi sözü yerinə yetirdik.
Milli Məclisin deputatları Arzu Nağıyev, Jalə Əliyeva, Aydın Hüseynov, Ceyhun Məmmədov, Məşhur Məmmədov, Mətbuat Şurasının sədri Rəşad Məcid sərginin keçirilməsini mərhum deputata vəfa borcu kimi dəyərləndirdilər, rəssamın orijinal yaradıcılığından söz açdılar.
Mərasimin aparıcısı, Milli Məclisin Mədəniyyət komitəsinin eksperti Əkbər Qoşalı bildirdi ki, Qənirə xanım deyirdi ki, bu əsərlər Qarabağdakı muzeylərə, mədəniyyət müəssisələrinə təqdim olunacaq.
Mərasimdə iştirak edən digər deputatlar Anar İsgəndərov, İlham Məmmədov, Tamam Cəfərova, Pərvin Kərimzadə, Vüqar İsgəndərov, şəhid ailələrinin üzvləri, sənət adamları çıxış edərək Qənirə Paşayevanın qısa, lakin mənalı ömür yolundan, ölkənin ictimai-siyasi həyatındakı rolundan danışıb, xatirələrini bölüşdülər.
Xalq artisti Simarə İmanovanın oxuduğu “Şirin dəmlər, şirin çağlar bir-bir gəlib düşər yada. Ürək deyər ayrılığın üzü dönsün bu dünyada”– ifası zalda duyğulu anlar yaşatdı.
Rəssam Minarə Mehdi təqdimatın təşkilatçılarına və qonaqlara minnətdarlıq etdi.
Zərifə BƏŞİRQIZI
XQ
