Yaxud 70 illik ömrün “Xalq qəzeti”ndə keçən 44 ili

İnsanlar mətbuatın nə demək olduğunu dərk edəndən bəri bu müqəddəs dəyə­rimizin “həyatında” dövri olaraq çoxsaylı yeniliklərin, dəyişikliklərin şahidi olublar. Əvvəlcə bir, iki və ya dörd səhifəlik qəzetlə ərsəyə gələn mətbuat sonra öz yolunu çoxsəhifəli jurnal, radio, daha sonra televiziya və nəhayət, elektron informasiya vasitələri ilə davam etdirməli olmuşdur. 

Ancaq mətbuatın həyatındakı dəyi­şikliklər bununla da bitmir. Əvvəllər mət­buat vasitəsi üçün yaza bilən müəllif və hərfləri tanıyan oxucu lazım idi. Sonra bunlarla yanaşı, himayədar (sponsor ) da lazım oldu. Daha sonralar abunəçilərə, müxtəlif istiqamətli texniki işçilərə və nə­hayət, reklamçılara ehtiyac duyuldu. Bu yazımızın qəhrəmanı da məhz həmin so­nuncuların – reklam mütəxəssislərinin ən üzdə olan simalarındandır. 

O vaxtlar ölkədə yeganə olan Azər­baycan Dövlət Universitetinin (indiki BDU) jurnalistika fakültəsini bitirən, seç­diyi peşənin ən incə məqamlarını dərin­dən öyrənən, təxminən, 44 il eyni kollek­tivdə çalışan, müxbir olaraq “Kommunist” kimi aparıcı rəsmi qəzetin bir neçə şöbə­sində uğurla fəaliyyət göstərmiş bir həm­karımız haqqında olan sətirlərdə onun şöbə müdiri vəzifəsində çalışdığı otuz ili xatırlatmağımız təsadüfi deyil. Çünki SSRİ-nin çökməsindən sonra postsovet məkanının bütün rəsmi qəzetləri özünü maliyyələşdirən və ya təsərrüfathesablı quruma çevrildiyinə görə həmin redak­siyaların mühüm vəzifələrindən biri də məhz kollektiv üzvlərinin maraqlarını qo­ruya biləcək qədər reklam cəlb etmək idi. Bəri başdan deyək ki, Ruslan Rəfizadə bütün fəaliyyəti dövründə bu işin öhdə­sindən uğurla gəlmişdir. Bu arqumentimi­zi əsaslandırmaq üçün əlimizdə çoxsaylı faktları sadalamaq fikrinə düşsək, uzun bir siyahı alınar. Təkcə onu deyim ki, mənə etdiyi unudulmaz yaxşılıq 2006-cı ildə Həcc ziyarətində olarkən müqəddəs Allah evinin – Kəbənin təvafı zamanı gö­zümün qarşısına ilk növbədə gələn Rus­lanın təmənnasız köməyi oldu, ona və övladlarına sidq-ürəkdən dualar dilədim.

O, indi çalışdığı “Xalq qəzeti”nə 1980-ci ildə – o vaxtlar ali rəhbər orqan olan Azərbaycan KP MK-nın təyinatı ilə göndərilmişdi. Sonradan isə taleyini bir­dəfəlik bu nüfuzlu redaksiya ilə bağlamış və hələ də kollektivin sıralarındadır. Biz onu kamil reklam mütəxəssisi kimi təq­dim etsək də, hər gün qəzetdə gedən yazıların hamısına diqqətlə nəzər salır və bir çox məsələlərə öz münasibətini bildirir. Xüsusən, kimlərinsə Azərbaycan dilinə sırımaq istədiyi yad ifadələrin qəzet səhifəsinə gətirilməsinə ciddi şəkildə eti­raz edir. Həmin məsələ mənim də “yaralı yerim” olduğuna görə, Ruslan müəllimin bütün irad və etirazlarını dəstəkləyirəm. 

Az qala, hər gün ondan “bizim müəl­limlərimiz belə öyrətməyiblər” – ifadəsini eşidirəm. Yeri gəlmişkən, mən BDU-nu və jurnalistika fakültəsini bitirməsəm də, həmin fakültənin müəllimlərini bəlkə də oranın məzunları qədər tanıya bilmişəm. Çünki Ruslan Rəfizadə hər gün universi­tet müəllimləri haqqında bir əhvalat danı­şır, hansısa maraqlı məqamı və ya ustad saydığı insanların tövsiyələrini yada salır. Elə bir gün olmur ki, respublikanın tanın­mış, millətsevər ziyalıları olan Mir Cəlal, Nəsir İmanquliyev, Nurəddin Babayev, Seyfulla Əliyev, Şirməmməd Hüseynov, Famil Mehdi, Tofiq Rüstəmov, Əliş Nəbili, Yalçın Əlizadə, Cahangir Məmmədli, Akif Rüstəmov, Mahmud Mahmudov və Nəsir Əhmədli kimi müəllimləri haqqında nə isə danışmasın. 

Elə artıq vəfat etmiş və ya burada ça­lışmayan iş yoldaşlarını da daim ehtiram­la xatırlayır və maraqlı xatirələr danışır. Etiraf edir ki, Rəşid Mahmudov, Alp Ağa­mirov, Kazım Ələkbərov, Cəmil Əlibəyov, Ramiz Əhmədov, Şamil Şahməmmədov, Rafael Nağıyev, Cəlil Xəlilov, Əşrəf Ha­cıyev, Telman Heydərov, Telman Əliyev, Firdovsi Zamanov, Firudin Rəsulov, Ra­fiq Həsənov, İlham Rəhimli, Ziyəddin Sul­tanov və jurnalistikanı müqəddəs peşə sayan, qədir-qiymətə çatdıran digər in­sanlardan həm yaradıcılıq, həm də həyat dərsi almışdır. 

Bir məqamı da xüsusilə vurğulamaq istəyirəm. Ruslan Rəfizadə bəlkə də ölkə mətbuatında barmaqla sayıla biləcək jur­nalistlərdəndir ki, həm redaksiyanın, həm də əməkdaşların üzləşdiyi hansısa çətin­liklərin aradan qaldırılmasına cidd-cəhdlə çalışır və istəyinə nail olur. Bu işdə onun prinsipiallığına və qanunları yaxşı bilmə­sinə həsəd aparmaq olar. Üstəlik, uzun illərdir ki, “Xalq qəzeti” redaksiyası həm­karlar ittifaqı komitəsinin sədridir. Ma­raqlıdır ki, onun otuz ildən çox rəhbərlik etdiyi həmin posta yiyələnməyə başqa ki­minsə iddialı olduğunu görməmişik. Hər halda, mənim burada çalışdığım 27 ildə belə bir söz eşitməmişəm. Çünki, əvvə­la, kimsə o vəzifəni Ruslan müəllim kimi apara biləcəyinə əmin deyil. İkinci, onun redaksiya həmkarlar ittifaqı komitəsinin sədri olması kollektiv üzvlərinin hamısına sərf edir. O, iş yoldaşlarının məişət qay­ğılarından tutmuş istirahətinə, narahatlıq­larına qədər hər məsələdə ürək genişliyi ilə əlindən gələni əsirgəmir.

Hörmətli oxuculara bu sətirlərin qəh­rəmanı haqqında xatırlatmaq istədiyimiz başqa bir fakt isə ondan ibarətdir ki, Rus­lan Rəfizadə ötən əsrin əvvəllərində istiq­lal mübarizəsində, erməni soyqırımlarına və xalqımıza yönəlmiş digər qəsdlərə qarşı mübarizədə öndə getmiş Rəfibəy­lilər nəslinə mənsub ailədə doğulub, tər­biyə alıb. Onun bir çox üstün keyfiyyətləri məhz bu nəslin xalq işinə sədaqətindən, insanlara xeyirxah münasibətindən qay­naqlanır. 

Danışır ki, otuzuncu illərdə bütün nəslimizi repressiyaya məruz qoyub, pərən-pərən salıblar. Hələ də qohumla­rımızın çoxu qürbətdə yaşayır: “Nənəm, anam və üç dayım sürgün taleyi yaşa­yıblar. Atam-anam (hər ikisi Rəfibəylilər­dəndir) ömürləri qorxu, təlaş və səksəkə içərisində keçib. Bütün bunlara bax­mayaraq, Vətəndə qalan qohum-əqrə­bam hər sahədə namusla çalışıb, xalqa gərəkli olub. Mən nəslimlə öyünməkdən çox, onun adına layiq olmağa çalışmı­şam. Düzü, o qədər ağrı-acılar çəkmişik ki, Rəfibəyli olmağımla öyünmək arxa planda qalıb”.

Peşəkar jurnalist, təəssübkeş kollek­tiv üzvü, gözəl ailə başçısı, səmimi dost, “Tərəqqi” medallı Ruslan Rəfizadəni anadan olmasının 70 illiyi münasibətilə ürəkdən təbrik edir, ona cansağlığı və yeni-yeni uğurlar arzulayırıq! 

İttifaq MİRZƏBƏYLİ
XQ