Xalq rəssamı Rasim Babayevin ən gözəl rəsm əsərlərindən biri də “Ailə” tablosudur. Onun yaradıcılığında xüsusi yer tutan bu əsərdə rəssam öz prototipini təsvir edib. Tablonun yaranması fırça ustasının fəaliyyətinin erkən dövrlərinə – 1971-ci ilə təsadüf edir.
Əsərin kompozisiyasının mərkəzində ata, ana və uşaqların obrazları göstərilib. Ailə ayaqyalın, nimdaş paltarda və yarıçılpaq təsvir edilib.
Sənətşünasların fikrincə, bu cür təsvirlər sənətdə sosialist realizmi ənənələrinin hakim olduğu dövr üçün qəbuledilməz idi. Elə buna görə əsər Moskvada sərgiləndiyi zaman keçmiş SSRİ-nin mədəniyyət naziri Yekaterina Furtseva tərəfindən rədd edilmiş, sərgi salonundan kənarlaşdırılmışdı.
Əsərin kompozisiyasına gəldikdə isə deyə bilərik ki, tabloda əsasən solğun tonlara, mavi, ağ, qəhvəyi rənglərə üstünlük verilib.
Bu əsər bizə zamana, məkana ilişib qalmaqdansa, yalnız irəliləməyi öyrədir.
Hazırda tablo Azərbaycan Dövlət Rəsm Qalereyasının kolleksiyasında saxlanılır.
Leyla HADİ
tələbə-jurnalist