Yubiley ilində birləşmiş Azərbaycan kinematoqrafiyasından hamı böyük uğurlar gözləyir

Dünən Nizami Kino Mərkəzində Milli Kino Günü münasibətilə bayram toplantısı keçirildi.

Mərasimin əvvəlində xüsusi ola­raq hazırlanmış, Azərbaycan kinosu­nun keçdiyi yola işıq salan, həmçinin ümummilli lider Heydər Əliyevin kino­ya və bu sahədə çalışan sənətkarlara hərtərəfli qayğı və diqqətini ayrı-ayrı kadrlarda əks etdirən video-çarx nüma­yiş etdirildi.

Azərbaycan kinosunun 125, “Azər­baycanfilm” kinostudiyasının 100 illik yubileylərinin də qeyd edildiyi kino gü­nündə çıxış edən Mədəniyyət naziri Adil Kərimli milli kinematoqrafiyanın keçdiyi uzun və uğurlu yoldan danışdı. Nazir milli-mənəvi dəyərlərin yaşadıl­masında və dünyaya çatdırılmasında, gənc nəslin vətənpərvərlik ruhunda böyüməsində kinonun müstəsna rol oynadığını qeyd etməklə yanaşı, son illər sahəyə dövlət qayğısının artırılma­sını da xüsusi olaraq vurğuladı. O, bu sahədə mövcud qüsurların aşkar edil­məsində və aradan qaldırılmasında bir­gə fəaliyyətin vaciblyini vurğuladı. Nazir ümummilli lider Heydər Əliyevin sənətin bu növünə daim qayğı ilə yanaşdığını, ayrı-ayrı filmlərin ərsəyə gəlməsində onun müstəsna xidmətlərini tədbir işti­rakçılarının nəzərinə çatdırdı. 

A.Kərimli çıxışında xalqımızın dəyərli sənətkarları, Xalq artistləri Şə­fiqə Məmmədova və Rasim Balayevin rəhbərlik etdikləri kinematoqrafiya itti­faqlarının birləşib bu sahəni arzuedilən müstəviyə çıxaracağına əminliyini bil­dirdi. Hər iki sənətkarı səhnəyə dəvət edən nazir onlara milli kinonun inkişa­fında göstərdikləri xidmətlərə görə Mə­dəniyyət Nazirliyinin xüsusi Fəxri dip­lomlarını təqdim elədi.

Yubiley mərasimində çıxış edən Xalq artisti Şəfiqə Məmmədova 2 Avqust Milli Kino Günü münasibətilə Azərbaycan Kinematoqrafçılar İttifaqı­nın təsis etdiyi Milli Kino Mükafatının yubiley ilində bir deyil, iki nəfərə verilə­cəyini açıqladı. Yubiley ilinin laureatları Ayaz Salayev və Aydın Kazımzadə ol­dular. Ş.Məmmədova yubiley münasi­bətilə ittifaq üzvlərinin Fəxri fərmanla təltif etdiyini bildirdi və mükafatlandırı­lanların siyahısını oxudu. 

Xalq artisti Rasim Balayev son illər hökumət, o cümlədən Mədəniyyət Na­zirliyi tərəfindən sahəyə artan diqqəti razılıqla qeyd etdi və milli kinematoq­rafiyanın tənəzzül illərindən, nəhayət, inkişaf dövrünə qədəm qoyacağına, gözəl filmlərlə tamaşaçıları sevindirə­cəyinə inamını ifadə etdi. Sonra o, baş­çılıq etdiyi qurumun mükafatlarını lau­reatlara təqdim elədi. 

Sonda “Avanqard” kamera orkest­rinin ifasında milli kino musiqimizdən nümunələr ifa olundu. 

Mərasimdə Özbəkistanın Mədə­niyyət naziri Ozodbek Nazarbekov da iştirak edirdi. O, avqustun 1-dən 4-dək Bakıda keçirilən Özbəkistan Mədəniy­yəti Günləri çərçivəsində Azərbaycan­da səfərdədir. 

İ.HƏSƏNQALA, “Xalq qəzeti”