120 illik tarixi olan Azərbaycan kinosu dünya kinematoqrafiyasında özünəməxsus yerlərdən birini tutur. Sovet dövrü filmlərimizi hətta kinematoqrafiyamızın ən parlaq nümunələri hesab etmək olar. Lakin müstəqilliyimizin bərpasından sonra etiraf edək ki, Azərbaycanda kino sənayesi müəyyən tənəzzül dövrünü yaşadı.
Təkəmseyrək sanballı filmlərdən başqa ciddi və sanballı ekran əsərləri ərsəyə gətirilmədi. Əvəzində şit, darıxdırıcı, heç bir məzmun və mahiyyəti,tərbiyəvi əhəmiyyəti olmayan serial sənayesi inkişaf etməyə başladı. Qısası, kino zövqümüz korlandı, dünya kinosu səviyyəsində çəkiləcək hansısa filmin ortaya qoyulmasına olan inamımız isə zəiflədi. Lakin düşünürük ki, dövlətin ciddi müdaxiləsi kinematoqrafiyamızın “ağ atlı oğlan”ına çevrilə biləcək. Bu baxımdan, Azərbaycanda kinematoqrafiya sahəsində dövlət siyasətinin həyata keçirilməsinin təkmilləşdirilməsi, Azərbaycan kinematoqrafiyasının beynəlxalq rəqabətə davamlılığının təmin edilməsi, yerli istehsal və yayım infrastrukturunun müasirləşdirilməsi məqsədilə Prezident fərmanı ilə Mədəniyyət Nazirliyinin tabeliyində “Azərbaycan Respublikasının Kino Agentliyi” publik hüquqi şəxs yaradılması təqdirəlayiqdir.
Fərmanla müəyyən edilib ki, Agentlik Azərbaycanda kinematoqrafiyanın inkişafının, o cümlədən yerli və müştərək kino istehsalının dəstəklənməsi, kino mədəniyyəti təbliğinin təşkili, kinematoqrafiya müəssisələrinin və kino sənayesi iştirakçılarının fəaliyyətinin, eləcə də bu sahədə yeni informasiya-kommunikasiya texnologiyalarının və innovasiyaların tətbiqinin stimullaşdırılması, dünya kinematoqrafiyasına inteqrasiya sahələrində fəaliyyət göstərən, Nazirliyin tabeliyindəki kinematoqrafiya müəssisələrini idarə edən və onların fəaliyyətinə nəzarəti həyata keçirən publik hüquqi şəxsdir.
Azərbaycan Respublikası Prezidentinin fərmanı ilə yaradılan Azərbaycan Respublikasının Kino Agentliyi publik hüquqi şəxsin ən yaxın zamanda fəaliyyətə başlaması üçün nazirlik tərəfindən aidiyyəti qurumlarla birgə lazımi tədbirlər həyata keçirilir. Mədəniyyət Nazirliyindən bildirilib ki, quruma rəhbər təyinatı, onun strukturunun təsdiq olunması, maddi-texniki baza ilə təmin edilməsi və s. istiqamətlərdə müvafiq işlər görülür.
Qənaətbəxş cavab hesab etmək olar. İnam var ki, tezliklə kinematoqrafiyamızda dirçəliş dövrü başlayacaq. İstedadlı aktyorların üzə çıxarılması, incəsənət duyumlu, geniş erudusiya, nitq, dünyagörüşü ölçülərinə cavab verən film oyunçularımızın bir arada cəmlənməsi, onların dolanacaq üçün ölkədən getməsinin qarşısı alınacaq. Nəticədə, dünya standartlarına uyğun gələn, normal büdcəsi, təsirli ssenari və rejissor işi olan filmlər izləyə biləcəyik. Nəhayət, biz də öz filmlərimizin dünyada yayılması və izlənmə arealı ilə öyünəcəyik.
Anar TURAN, “Xalq qəzeti”